Ntabwo nemeranya n’abavuga ko umugabo agomba kugira umugore umwe-

0
1220
SANGIZA ABANDI IYI NKURU

Ntabwo nemeranya n’abavuga ko umugabo agomba kugira umugore umwe- Mugwiza Gerry

Umunyamakuru Muhawenimana Gerardine wamenyekanye ku mazina ya Mugwiza Gerry, yavuze ko ibyiza ari uko umugabo akwiye kugira abagore barenze umwe kugira ngo atazaterwa ibibazo n’umwe agakurizamo kwikwiyahura.

Uyu mugore avuga ko yagizweho ingaruka z’ukubyarwa n’umugabo waje kugera nyuma agasiga umugore we [Mama wa Mugwiza] akajya kwishakira undi mugore bagasezerana bigatuma Mugwiza akurira mu buzima bushaririye.

Ngo siwe byabayeho gusa kuko Sekuru ubyara Nyina yari umwarimu mu mashuri abanza, ngo yaje gusiga nyirakuru aragenda ahitwa I Rukara agezeyo yishakira undi mugore barabyara nyuma Nyirakuru wa Mugwiza asigara ari intabwa.

Mugwiza kuri ubu ni umubyeyi usanzwe ananyuza ibitekerezo ku rubuga rwe rwa YouTube yise ‘ICAN TV [Ingara Creative Arts TV], gusa ibitekerezo bye ntabwo bikunze kuvugwaho rumwe na benshi.

Kuwa Gatandatu tariki 21 Ugushyingo 2020, ikinyamakuru UKWEZI dukesha iyi nkuru cyatangaje inkuru y’ umugabo witwa Twizerimana Innocent w’imyaka 40 wari usanzwe ari umwarimu ku kigo cy’amashuri abanza cyane Ruyange.

Uyu mugabo yasanzwe yikingiranye mu nzu akanywa ikinini gisanzwe cyifashishwa mu kwica imbeba hanyuma ahita apfa.

Amakuru yavugaga ko uku kwiyahura kwe kwaturutse ku busambanyi yashinjaga umugore we, akaba yaranasize ubutumwa buca amarenga yabyo

Mugwiza avuga ko abantu bakwiye kongera kubana neza cyangwa bakareba mu mikorere yabo, ibyo babamo umunsi ku munsi niba ntaho bashobora kuba babangamira bagenzi babo.

Uyu mugore avuga ko itegeko ry’u Rwanda rivuga ko umugabo yemerewe gushaka umugore umwe hari aho ribangamira abantu kuko nk’uyu mugabo w’I Burera wiyahuye iyo aza kuba afite undi mugore wa kabiri aba yaramusanze bakaba agahunga uwa mbere.

Yagize ati “Wenda abantu banabyumve, iyo mvuze ngo ubuharike ntabwo bwari gucibwa ntabwo mba mvuze ngo babuzane nk’itegeko. Mba mvuze ngo niyo bwakwemerwa ariko bukemerwa ku bantu babifitiye ubushobozi.”

“Kuko n’ubundi ntawe ukubwira ngo ugize imyaka 40 jya gushaka umugore, ibyo rero niba ntawe ugutegeka gushaka ntihakagire n’ugutegeka gushaka umubare runaka.”

Mugwiza avuga ko hari ingero nyinshi z’abana batazi ba Se bababyara, biturutse kuri ba bagabo baca inyuma abagore babo bakajya kubyarana n’abandi bakobwa.

Yakomeje agira ati “Hari n’abava mu cyaro bagera I Kigali bakongera bakarongora nk’aho ari abasore, kubera iki uwo mugabo niba afite ubushobozi atakwemererwa kugira urugo mu Ntara akagira n’urundi I Kigali aho akorera.”

Mugwiza avuga kandi ko muri iki gihe hari abagore usanga babwira abana babo ko ba Se bapfuye kandi bariho ahubwo baragiye kubaka izindi ngo kure.

Ati “Njyewe ntabwo nemeranya n’abantu bumva ko umugore agomba kubana n’umugabo umwe, umugabo umwe ku mugore umwe. Ni uburenganzira mpabwa n’itegeko bwo kuvuga uko numva ibintu. Kuva umugabo yagira urugo mu gace runaka akagira n’urundi ahandi.”

Yakomeje agira ati “Erega ntawe ugitunga undi, umugore asigaye anyura hano n’umugabo akanyura hariya bose bagashakisha ibitunga urugo. Niba ari uko bimeze rero abantu bikumva ko ibintu byose bireba umugabo naramuka ashatse undi mugore azabura icyo abatungisha. Gute se ingo zitagira abagabo ntizibayeho ?”

Uyu mubyeyi avuga ko ibintu byose byicwa n’uko bigendera ku mitungo aho usanga umutungo wose ari uw’umugabo kuko n’ubuharike bujya gucibwa byatewe n’amakimbirane akomoka ku mitungo.

Akemeza ko ibibazo byose byakemuka ari uko umugore agize umutungo we n’umugabo akagira umutungo we.

Itegeko N°59/2008 ryo kuwa 10/09/2008 rikumira kandi rihana ihohoterwa iryo ari ryo ryose rishingiye ku gitsina, mu ngingo yaryo ya 2, igika cya 3, rivuga ko ubuharike ari “Ukugira amasezerano ya kabiri y’ubushyingiranwe aya mbere agifite agaciro”.

Igitabo cy’amategeko ahana mu ngingo ya 246, giteganya ko umuntu ugira amasezerano ya kabiri y’ubushyingiranwe aya mbere agifite agaciro ahanishwa igifungo kuva ku mezi atandatu kugeza ku myaka ibiri n’ihazabu y’amafaranga y’u Rwanda kuva ku 100.000 kugeza ku 500.000 RWF cyangwa kimwe gusa muri ibyo bihano.

Ingingo ya 247 y’igitabo cy’amategeko ahana isobanura ko ubushoreke ari imibanire nk’umugabo n’umugore ku buryo buhoraho ku bantu batashyingiranywe, umwe muri bo cyangwa bombi bafite uwo bashyingiranywe.

Uhamwe n’icyaha cy’ubushoreke ahanishwa igifungo kuva ku mezi atandatu kugeza ku myaka ibiri n’ihazabu y’amafaranga y’u Rwanda kuva ku 100.000 kugeza kuri 200.000 RWF (ingingo ya 248)

Src:ukwezi


SANGIZA ABANDI IYI NKURU

LEAVE A REPLY

Please enter your comment!
Please enter your name here