Abigaga muri Kaminuza zafunzwe bugarijwe n’ibibazo by’ingutu

0
123
SANGIZA ABANDI IYI NKURU

Mu mpera za Kamena 2020, Minisiteri y’Uburezi yambuye Kaminuza eshatu ibyangombwa bizemerera gukora nyuma yo gusanga zugarijwe n’ibibazo bitazibashishaga gutanga uburezi bufite ireme.

Ayo mashuri yafunzwe arimo Kaminuza ya Kibungo (UNIK) yamenyekanye mu myaka ishize nka UNATEK, Indangaburezi College of Education na Christian University of Rwanda.

Uretse ibibazo by’ubukungu, amakimbirane n’imanza izo Kaminuza zasize; hari n’ikibazo cy’abanyeshuri ibihumbi bazigagamo basigaye batazi aho berekeza.

Nubwo amashuri yari amaze amezi ane afunze kubera icyorezo cya Coronavirus, biteganyijwe ko azasubukura muri Nzeri uyu mwaka.

Mu gihe abandi bazaba basubiye ku mashuri yabo, abigaga mu mashuri yafunzwe bo ntibaramenya icyerekezo.

Nzisabira Népo yigaga mu mwaka wa nyuma muri Christian University of Rwanda mu ishami ry’Ikoranabuhanga.

Yatangaje ko mu mwaka bigamo we na bagenzi be bari bararangije amasomo yose, baranditse ibitabo bategereje kubisobanura (défence), gusa ubu ngo ntibazi uko bizagenda.

Ati “Harimo abanyeshuri bari bararangije barasoje défence, harimo n’abanyeshuri barimo abigaga ikoranabuhanga bari bararangije gutanga ibitabo byabo banishyura amafaranga yo “kudefanda”, dutegereje ko hajyaho ingengabihe. Coronavirus yajemo bataraduha uko bizakorwa, amasomo yose yari yararangiye. Twifuzaga ko ibyo bitabo twatanze babiha agaciro ntitube twasubiramo.”

Nzisabira yavuze ko hari n’ibibazo byo gutinda guhabwa ibyangombwa bibajyana mu yandi mashuri aho bazakomereza amasomo, icyakora akavuga ko bagitegereje icyo amashuri bigagaho azabikoraho.

Umuyobozi w’Inama Nkuru y’Amashuri Makuru na Kaminuza (HEC), Dr Rose Mukankomeje, yatangaje ko nta guhangayika abanyeshuri bakwiriye kugira, mu gihe bujuje ibyo basabwa.

Ibyo basabwe ni ugushaka ibyangombwa byose bigaragaza amasomo bari bamaze kwiga n’amanota (transcript), hanyuma bakabishyikiriza amashuri yigenga afite ibihuye n’ibyo bigaga mu mashuri yafunzwe, bakiyandikisha.

Ati “Twaricaye dukorana inama n’izo kaminuza zose zigenga kuko UR iruzuye, turababwira ngo twagize ibyago amashuri yagenze nabi none mworohereze abanyeshuri bazaza kwiyandikisha iwanyu. Tuvugana n’ariya mashuri yafunzwe, turababwira ngo mutegure amanota y’abanyeshuri, mubahe ibyangombwa, muborohereze.”

Icyakora Dr Mukankomeje yavuze ko kaminuza zigenga zitazapfa kwakira abo banyeshuri gusa, ahubwo zizabanza gusuzuma ibyo bize n’ibigomba kwigishwa mu mashami yabo.

Ati “Bazazana ibyangombwa byabo babikorere isuzuma, barebe niba uvuze uti ndi mu mwaka wa gatatu barebe niba warize ibijyanye n’ibyo bigisha, bakwakire. Nta mpamvu bazabangira keretse bujuje abanyeshuri.”

Hari abarimu banze gutanga amanota

Amashuri yafunzwe, amenshi yari afite ibibazo by’amikoro ku buryo yari abereyemo abakozi bayo amadeni.

Nka Kaminuza ya Kibungo, mu byatumye ifungwa harimo kuba yari imaze amezi 18 itishyura abarimu byanatumye abenshi bigendera, kwambura abarimu miliyoni 360 Frw bayigurije n’ibindi. No mu zindi kaminuza zafunzwe ibibazo nk’ibyo byari bihari.

Umunyeshuri utifuje ko amazina amazina ye atangazwa,wigaga muri Kaminuza ya Kibungo, yavuze ari aho iryo shuri ryakoreraga mu karere ka Ngoma yagiye gushaka inyandiko zigaragaza ibyo yari amaze kwiga (transcript).

Yavuze ko ahamaze iminsi ibiri we na bagenzi be bategereje ko bahabwa izo nyandiko ariko abakozi babishinzwe bakabasaba gukomeza kwihangana, ku buryo nta cyizere ko bazazibona vuba.

Uwo munyeshuri yifuza ko Leta yakwinjira muri icyo kibazo kuko gishobora kuba kiri guterwa n’ibibazo abarimu bafitanye n’ubuyobozi bamwe bakanga gutanga amanota, mu gihe ayo manota ariyo ashingirwaho batanga ibyangombwa.

Ati “Niba abarimu baramaze gusezererwa mu kazi bakaba bari mu rugo cyangwa muri gahunda zabo, nta munyeshuri wemerewe kubahagamara ngo bazane amanota kandi ibizamini byarakozwe. Birumvikana Leta ikwiriye gushaka uko ifasha abanyeshuri, abarimu bakohereza amanota bigakorwa bikarangira »

Nzisabira na we yavuze ku ishuri yigagaho, mu biga ikoranabuhanga mu mwaka urangiza hari amasomo ane bakoze ibizamini ariko ntibabona amanota kuko abarimu bagiye bayafatira ngo babanze kwishyurwa.

Ati “Hari nk’amasomo tuba tutarabonera amanota, umwarimu niba atarishyurwa ntabwo yapfa kuyatanga. Ibyo bibazo birahari. Dufite ikibazo ko abanyeshuri bashobora kujya gufata “transcript” bakazifata zituzuye kandi bazi ko amasomo bayize.”

Dr Mukankomeje yavuze ko ibibazo by’abarimu na Kaminuza bikwiriye gukemurwa hagati y’impande zombi kuko ari zo zifitanye amasezerano ariko abanyeshuri bakoroherezwa.

Ku bavuga ko bari barasoje amasomo basigaje gusobanura imishinga bakoze, Dr Mukankomeje yavuze ko bisaba isesengura n’ibyangombwa bibyerekana.

Ati “Byose bazabisuzuma twarabibasabye. Ntabwo bazabasubiza inyuma ngo bajye kubatangiza nabo bazi neza ko bashobora kuba barerera hariya, ingorane bahuye nazo barazizi ariko bazakora ku buryo ireme ry’uburezi baryubahiriza.”

Umuyobozi wa Kaminuza y’Ubukerarugendo n’Ikoranabuhanga, UTB Dr Kabera Callixte, yavuze ko hari abanyeshuri batangiye kwakira bigaga mu mashuri yafunzwe.

Yavuze ko ntawe barandika kuko hari ibyangombwa babanza kubasaba, babyuzuza bigasesengurwa, bagahabwa igisubizo.

Ati “Ubu baraza tukabereka ibisabwa, tukababwira ko bazana ibigaragza amanota yabo kugira ngo tubandike. Ntawe turatangira kwandika. Biraterwa nu’uburyo boroherezwa muri izo kaminuza, iyo babibonye baraza tugahita tubakemurira.”

Ku bavuga ko bari barasoje amasomo, Dr Kabera yavuze ko bazakurikiza amabwiriza ya HEC.

Ati “Iyo umuntu yarangizaga, ibyo byo bisaba kwemezwa na HEC kuko amategeko dufite nta muntu winjira muri Kaminuza yindi atagiye kuyiga nibura 50 % by’amasomo yari asigaje. Twe dufata ibyo yamaze kwiga tukabigereranya n’ibyo twigisha tukareba ngo ni iki atize ugereranyije n’ibyo agomba kwiga kugira ngo abone dipolome yacu.”

Mu bindi bibazo abanyeshuri bagaragaje ni uburyo mu gihe igihugu kiri guhangana n’icyorezo cya Coronavirus, hakwiriye uburyo bwiza bwatuma babona ibyangombwa ku mashuri bigagaho mu buryo buboroheye, kuko gutonda umurongo buri munsi babitegereje bishobora kuba inzira yo kwandura.

Minisiteri y’Uburezi yasabye amashuri yafunzwe gusobanurira abanyeshuri n’abakozi bayo uko bimeze kandi bakanahabwa ibijyanye n’amasezerano y’akazi nkuko amategeko abiteganya.

Yanasabye kandi ko Kaminuza zifasha abanyeshuri bazigagamo kubona inyandiko zibafasha kwiga ahandi mu mashami basanzwe bigamo.

src:Igihe


SANGIZA ABANDI IYI NKURU

LEAVE A REPLY

Please enter your comment!
Please enter your name here