Amakipe yo mu Rwanda yatangiye guhamagara abakinnyi bayo ngo bagaruke mu kazi

0
49
SANGIZA ABANDI IYI NKURU

Ubuyobozi bw’ikipe ya Sunrise FC yo mu Burasirazuba, bwahaye abakinnyi bayo amabaruwa abasaba gusubira mu kazi bitarenze ku wa Gatanu, tariki ya 11 Nzeri 2020.

Ibikorwa byose by’imikino n’amarushanwa byasubitswe mu Rwanda guhera tariki ya 15 Werurwe nyuma y’uko Minisiteri y’Ubuzima itangaje ko hari umurwayi wa mbere wa Coronavirus wabonetse mu gihugu.

Abakinnyi b’amakipe atandukanye baba mu miryango yabo kuva muri uko kwezi, aho kugeza ubu umupira w’amaguru uri muri siporo zitaremererwa gusubukura imyitozo.

Nk’uko bigaragara mu ibaruwa Umunyamabanga Mukuru wa Sunrise FC, Ntambara Stephen, yandikiye abakinnyi ku wa Kabiri, bose basabwe kwitabira akazi bitarenze ku wa Gatanu.

Ati “Muraho mwese; Tubandikiye iyi baruwa tubamenyesha ko mugomba gusubira mu kazi bitarenze ku wa Gatanu tariki ya 11 Nzeri 2020. Izi gahunda muzazimenyeshwa mugeze i Nyagatare.”

Uyu muyobozi yabwiye IGIHE ko nubwo bahamagaje abakinnyi atari ukugira ngo batangire imyitozo, ahubwo ari mu rwego rwo kuba bari hamwe mu gihe hitegurwa ko Shampiyona itangira mu kwezi gutaha.

Ati “Ntabwo ari ugutangira imyitozo, murabizi ko gahunda yo gufungura Shampiyona, ingengabihe FERWAFA yaduhaye ni tariki ya 30 Ukwakira. Ni mu buryo bwo kugira ngo abakinnyi baze i Nyagatare, hanyuma igihe tuzabonera uburenganzira bwo gusubukura imyitozo, hatazaba cya gihe cyo gutumiza abakinnyi. Turabahemba, bagomba kuba hafi kugira ngo tubakurikirane.”

Sunrise FC yasoje umwaka ushize w’imikino wa 2019/20, iri ku mwanya wa karindwi n’amanota 30.

Hari inama zitandukanye zahuje inzego zishinzwe siporo muri ibi byumweru bibiri, hagamijwe kureba amabwiriza yakurikizwa hasubukurwa amarushanwa atandukanye mu kwezi gutaha.


SANGIZA ABANDI IYI NKURU

LEAVE A REPLY

Please enter your comment!
Please enter your name here