Amashuri mpuzamahanga ari mu Rwanda yatangiye umwaka hifashishwa ikoranabuhanga mu myigishirize

0
68
SANGIZA ABANDI IYI NKURU

Muri ibi bihe amashuri mpuzamahanga menshi akorera mu Rwanda ari gutangira umwaka w’amashuri, gusa kubera icyorezo cya Covid-19, imyigishirize muri aya mashuri isa n’iyamaze guhindura isura kuko hafi ya yose ubu yatangiye gukoresha uburyo bw’ikoranabuhanga aho bitari ngombwa ko umwana ahura na mwarimu amaso ku maso.

Amenshi muri aya mashuri yatangiye umwaka ku wa 7 Nzeri andi akaba yitegura kuwutangira ku wa 14 Nzeri.

Mu mashuri yatangiye amasomo harimo Dove International, Sparrow Parents International school mu gihe andi arimo Riviera High School yitegura gutangira amasomo ku wa 14 Nzeri.

Umuyobozi wa Dove International, Lisa Umulisa aherutse kuvuga ko abanyeshuri bagarutse mu buzima bw’ishuri nyuma y’igihe bari bamaze batiga.

Ati “Abanyeshuri bishimiye kugaruka muri gahunda yo kwiga bari kumwe na bagenzi babo ibi natwe biradushimisha.”

Umulisa avuga ko iri shuri ryamaze gushyiraho urubuga ruzwi nka See-Saw ruzajya rufasha abanyeshuri gukurikirana amasomo yabo nta nzitizi.

Ati “Uru rubuga rurimo amakuru yose y’umunyeshuri ndetse n’umwarimu uzajya ukurikirana ibyo bakora umunsi ku munsi.”

Nubwo amashuri mpuzamahanga asa n’ayamaze gusubukura amasomo mu ya Leta ho ntiharamenyekana igihe azongera gufungurira n’uburyo buzakoreshwa mu kwigisha ni, nyuma y’uko yose yafunze muri Weruwe mu rwego rwo kwirinda Covid-19.


SANGIZA ABANDI IYI NKURU

LEAVE A REPLY

Please enter your comment!
Please enter your name here