Amb.Joe Habineza yavuze amagambo akomeye nyuma y’uko yirukanwe mu kazi yakoraga bikavugisha benshi

0
4259
SANGIZA ABANDI IYI NKURU

Mu cyumweru gishize nibwo Amb. Joseph Habineza yahagaritswe ku kazi yari amaze igihe akora ku mwanya w’Umuyobozi Mukuru (CEO) w’ikigo cy’ubwishingizi buciriritse cya Radiant Yacu Ltd. N’ubwo abantu batandukanye bagiye bavuga impamvu zaba zaratumye yirukanwa, we ubwe bigaragara ko atashatse kugira icyo abyeruraho ndetse n’uwamuhaye uyu mwanya yararuciye ararumira. Gusa hari bimwe mu bintu yagiye atangaza uko izi nkuru z’iyirukanwa rye zacicikanaga, bishobora guhuzwa byoroshye n’ibyo bihe arimo.

Joseph Habineza benshi bakunda kwita Joe, ni umwe mu bantu basanzwe bakunda kuvugisha itangazamakuru ndetse no kugaragaza byeruye ibitekerezo n’ukuri kumurimo, nyamara abanyamakuru bose bagerageje kumubaza iby’iyirukanwa rye bose nta n’umwe yigeze yerurira. Gusa nanone akunda kugaragaza ibitekerezo bye cyane abinyujije ku mbuga nkoranyambaga.

Muri iyi nkuru, turareba amwe mu magambo akomeye arimo n’inyigisho yafasha benshi, Joe Habineza yanyujije ku mbuga nkoranyambaga zirimo Twitter ariko cyane cyane agace k’inkurushusho yanyujije ku rubuga rwa Whatsapp (Status). Turahera mu mpera z’icyumweru gishize nyuma yo kwirukanwa mu kazi n’ubwo bitahise bimenyekana.

Kuri Twitter Joe Habineza yanditse tariki 8 Kanama amagambo agira ati : “Imana ntiyakwemera ko ibibi bitugeraho kereka igihe ifite umugambi wihariye, cyahe iba ishaka kunyuza imigisha ihambaye muri ibyo biruhije. Nta mwijima uhoraho iteka kandi n’aho uri haba hari inyenyeri. Baho buri munsi ufite intego nziza”

Mu byo Joe Habineza yatangaje kuri uru rubuga akabisubiramo ubugira kabiri, tariki 9 no kuri uyu wa Kabiri tariki 11 Kanama 2020, harimo amagambo asobanura ko inzira rukumbi yakugeza ku byishimo ari uguhagarika guhangayikira ibintu birenze ubushobozi bw’ugushaka kwawe.

Hari inkurushusho cyangwa icyo twakwita nk’igitekerezo, Joe Habineza yasangije abantu ku rubuga rwa Whatsapp (Status), kuri uyu wa Mbere mu gihe inkuru zivuga kwirukanwa kwe zacicikanaga. Iyi nkuru n’ubwo yatangaje igice cyayo, turayibagezaho uko yakabaye guhera ku ntangiriro kugeza ku musozo wayo aho buri wese aba agomba kumva isomo riyirimo.

Icyo iyo nkuru ivuga…

Hari umugore wari ufite imbwa y’inyangamugayo yizeraga cyane kuburyo yayisigiraga umwana we akajya mu yindi mirimo itandukanye. Yaragarukaga iteka agasanga umwana asinziriye ameze neza, imbwa imuri iruhande imucungiye umutekano.

Igihe kimwe ariko haje kuba ikintu kidasanzwe. Umugore nk’ibisanzwe yasize umwana we yizeye ko imbwa imurinda hanyuma ajya guhaha. Ubwo yagarukaga, yasanze hari ibintu biteye ubwoba. Imyambaro y’umwana yari yacagaguritse, kandi hari amaraso menshi mu cyumba yari yasizemo umwana.

Byaramurenze, atangira gushakisha umwana ariko mu gihe ataramubona ahita abona ya mbwa iri munsi y’igitanda, umunwa wayo wuzuyeho amaraso abona ko nta gushidikanya yamuririye umwana. Nta kuzuyaza nk’uko benshi muri twe bahita babigenza, yafashe inkoni akubita ya mbwa kugeza ipfuye.

Arangije kwica imbwa ashakisha mu nzu hose agirango byibura arebe ko yabona ibisigazwa by’umubiri w’umwana we imbwa yari yariye. Ageze hafi y’igitanda, yaje kubona ko umwana ameze neza, ari ku buriri ndetse ntacyo yabaye, ahita anabona ibice by’inzoka yapfuye, asobanukirwa neza ko imbwa ye yari amaze kwica ari yo yarwanye n’inzoka iyirinda kuba yamurira umwana, ariko nyine uwo mugiraneza (imbwa) yari yamaze gupfa.

Ntacyo yari agishoboye gukora kuko imbwa yahamubereye, ikamurindira umwana adahari, ikitanga ku bw’ikibondo cye, yari yahubutse ayica ataramenya neza niba ibyo yibwira ari ukuri. Amarira yatangiye kuzenga mu maso, aricuza bikomeye.

ISOMO : Si byiza mu buzima ko wihutira gucira abandi urubanza, ngo utangire kubavugaho ibibi cyangwa kubatekerezaho ibibi nyamara utazi ukuri kose kw’ikibyihishe inyuma.

src:ukwezi


SANGIZA ABANDI IYI NKURU

LEAVE A REPLY

Please enter your comment!
Please enter your name here