Bamwe mu basengera mu rusengero rw’ababatisita (IEBER) mu Karere ka Kirehe, akagari ka Rugoma ho mu murenge wa Nasho barashinja pasiteri wabo gusenya urusengero agamije kugurisha amabati.

Kuwa gatatu taliki ya 13 Gicurasi 2020 nibwo abakirisitu bazindukiye mu gisa nk’imyigaragambyo bamaganira kure ibikorwa pasiteri wabo yakoze cyo gusenya urusengero rwabo kuwa kabiri.

Kuwa kabiri taliki ya 12 Gicurasi 2020 ubwo pasiteri yazanaga abafundi ngo basenye urwo rusengero, kuruhande rwe we yavugaga ko Leta yamusabye gukuraho urwo rusengero ko rushaje kandi ko rushobora guteza impanuka.

Benshi mu bakirisitu ntibishimiye ibi nabusa, byatumye bamwe badukira Pasiteri n’abo bafundi, bashaka kubirukana bakoresheje ingufu, bamwe bashinja Pasiteri kubasenyera urusengero ashaka kugurisha amabati yarwo ngo yivure inzara muri ibi bihe bya COVID-19.

Mu majwi ya benshi bagira ga bati: ”Ntabwo Pasiteri twamwemerera ko agurisha urusengero rwacu, ni inzara ikabije yamuteye kubera Coronavirus, ariko ibyo si twe tugomba kubizira”

Umwe mu bakirisitu yagize ati: ” Yacunze twese twagiye mu mirima gukora aza saa mbiri batangira gusambura amabati. Ubwo bari bamaze gukuraho hafi 50 twabimenye turaza, dusanga abafundi hejuru tubamanurayo turayabaka uretse amabati atatu abo bafundi bajyanye Pasiteri yanze kubahemba.

Twamenye ko umukiriya w’ayo mabati yari yamuhaye avansi y’ibihumbi 70, n’amatafari bari baramaze kuyamwishyura ndetse n’urugi rwa metarike. Gitifu w’akagari na we yahageze ashaka kumuvugira tumutera utwatsi, dutegereje ubuyobozi bw’umurenge”

Ibyo abo bakirisitu bavuga, byanenzwe na Pasiteri Nemeyimana Jean de Dieu, avuga ko Leta imaze iminsi imubwira ko urwo rusengero rusenywa, ari na yo mpamvu yafashe icyemezo cyo kurusenya mu rwego rwo kwegeranya amafaranga ngo buzuze urushya ruri kubakwa.

Pasiteri avuga ko hari urundi rusengero bubatse hafi y’urwo, ari na ho bamaze iminsi basengera mbere y’uko COVID-19 igera mu Rwanda, bakaba bari muri gahunda yo gukusanya amafaranga azava muri urwo rusengero rushaje kugira ngo buzuze urwo rushya.

Ibi pasiteri yavuze birashyigikirwa n’ubuyobozi kuko ngo bamusabye gufunga urwo rusengero kuko rwateza impanuka kubera gusaza, nyuma rero nibwo benshi mu bakirisitu bahise bajya muyandi madini akaba ari nabo barikuzamura urugomo ndetse n’amagambo yo gusebya pasiteri.

Ubuyobozi bwasabye aba bakirisitu ko bakwicara hamwe na pasiteri wabo bagakemura ibibazo byabo bitabakundira bakitabaza izindi nzego zo hejuru

source: Kigali today.

20 COMMENTS

LEAVE A REPLY

Please enter your comment!
Please enter your name here