Clare Akamanzi yagize uti “U Rwanda ni nka Singapore”

0
92
SANGIZA ABANDI IYI NKURU

Umuyobozi w’Urwego rw’Igihugu rw’Iterambere (RDB), Clare Akamanzi yashishikarije abashoramari bo muri Singapore kuza kuyishora mu Rwanda, ashimangira ko kuba hari abagereranya u Rwanda n’icyo gihugu ari uko bihuriye ku guteza imbere ubukungu n’imibereho myiza y’abaturage.

Yabitangaje kuri uyu Kabiri mu nama yabaye hifashishije ikoranabuhanga hasobanurwa amahirwe y’ishoramari ari mu Rwanda ku bashoramari bo muri Singapore.

Singapore ni igihugu gikize cyane kuko imibare ya Banki y’Isi yerekana ko mu mwaka umuturage wayo yinjiza $ 54 530, nibura ni miliyoni zisaga 50 Frw.

Akamanzi yavuze ko ‘abakurikirana umuvuduko w’iterambere ry’u Rwanda, barugereranya na Singapore, ku buryo hari n’abarwita Singapore ya Afurika.’

Yavuze ko impamvu bagereranya ibyo bihugu, ari umuhate bifite mu guteza imbere ubukungu bwabyo no kwita ku mibereho myiza y’abaturage babyo.

Ati “U Rwanda ni nka Singapore kuko rushyira imbere iterambere ry’ubukungu n’imibereho myiza y’abaturage barwo. Twiyemeje guteza imbere abikorera, guteza imbere ubukungu no kurwanya ubukene. Turajwe ishinga kandi no guteza imbere ubucuruzi ku buryo abikorera mu Rwanda bahangana ku ruhando mpuzamahanga.”

Akamanzi yavuze ko n’abantu benshi basura u Rwanda, barugereranya na Singapore bashingiye ku isuku bahasanga.

Ati “Iyo dusubije amaso inyuma tukareba ibyo Guverinoma y’u Rwanda yagejeje ku baturage bayo ihereye kuri zeru, twishimira kumva abantu baduhuza na Singapore.”

Yatanze ingero z’ibituma u Rwanda rugereranywa na Singapore, nk’aho ubukungu bwarwo bumaze imyaka isaga icumi buzamuka ku kigero kiri hagati ya 7% na 8 %, igabanyuka rikomeye ry’ubukene, kuba u Rwanda ruri ku mwanya wa kabiri nk’ahantu heza ho gukorera ubucuruzi muri Afurika n’ibindi.

Akamanzi yavuze ko ku bashoramari bo muri Singapore bashaka kuza gushora imari mu Rwanda, bahawe ikaze mu byiciro birimo guteza imbere ubukerarugendo n’ ibyakorewe mu Rwanda (Made in Rwanda).

Yagize ati “Muri Visit Rwanda, tumaze igihe twamamaza ku myenda y’ikipe ya Arsenal yo mu cyiciro cya mbere mu Bwongereza ndetse na PSG mu Bufaransa. Impamvu yabyo nuko u Rwanda rwashyize imbere kureshya abakerarugendo no kurugaragaza muri iyo sura ku rwego mpuzamahanga.”

“Niyo mpamvu, kureshya abubaka amahoteli, ibikorwa remezo byo gushimisha ba mukerarugendo no kwerekana u Rwanda nk’ahantu heza ho gukorera inama muri Afurika biri mu ntego zacu z’ibanze.”

Kubera guteza imbere ibikorwa remezo by’ubukerarugendo, byatumye u Rwanda kuri ruri ku mwanya wa gatatu mu kwakira inama nyinshi muri Afurika.

Singapore ni igihugu cyo muri Aziya ariko kigizwe n’umujyi umwe ufite ibice bitandukanye, ibizwi nka City State mu Cyongereza, ariko gifite ubwigenge busesuye. Gifite ubuso bwa 721.5 km². Ni igihugu cyaciye uduhigo dushoboka mu birebana n’ubukungu n’iterambere ry’abaturage, kuko aho giherereye uyu munsi, mu myaka 200 ishize hari ishyamba.

Nyamara amateka agaragaza ko icyo gihugu cyabigezeho atari ukubera imitungo kamere ihambaye gifite, ahubwo ni abaturage bakora cyane. Bashyigikirwa n’inzego z’igihugu zubatse icyizere mu bashoramari b’abanyamahanga, kikagira n’inzego zihamye zaba izifasha mu koroshya ishoramari, uburezi bufite ireme, ubukungu n’ibindi.

Iki gihugu cyigeze gukolonizwa n’u Bwongereza, kimaze imyaka 54 kibonye ubwigenge kuko mu 1965 ari bwo cyabubonye kimaze kwitandukanya na Malaysia. Muri iyo myaka cyavuye mu cyiciro cy’ibihugu bikennye kigera aho cyabaye nk’icyicaro cy’ishoramari rikomeye ryo ku Isi, kuko ibigo byinshi by’ishoramari birututse hirya no hino ku isi, bihafite icyicaro.

Singapore ni cyo gihugu cya mbere ku isi kirimo abantu batunze za miliyoni, bitari ukuvuga ko umuntu umwe afite miliyoni nyinshi cyane, ahubwo abazifite ni benshi. Icyizere cyo kubaho muri Singapore kigeze ku myaka 79 ku bagabo na 84 ku bagore.


SANGIZA ABANDI IYI NKURU

LEAVE A REPLY

Please enter your comment!
Please enter your name here