Covid-19:Abarenga miliyoni 30 maze kwandura. Ibi byatumye bimwe mu bihugu bisubizaho gahunda ya guma mu rugo

0
1103
SANGIZA ABANDI IYI NKURU

Imibare ya Johns Hopkins University yerekana ko umubare w’abantu bimaze kwemezwa n’inzego z’abaganga ko banduye icyorezo cya Covid-19 ku Isi warenze miliyoni 30.

Iki cyorezo gikomeje kwiyongera ku muvuduko uri hejuru cyane ko ku wa 13 Nzeri umubare w’abanduye wari miliyoni 28 n’ihumbi 900 mu gihe kitageze ku cyumweru uyu mubare ukaba wazamutse ugera kuri miliyoni 30 n’ibihumbi 100.

Mu bihugu bikomeje kuza imbere mu kugira ubwandu bwinshi harimo Leta Zunze Ubumwe za Amerika zifite abarenga miliyoni esheshatu, u Buhinde bufite abarenga miliyoni eshanu na Bresil ifite abagera kuri miliyoni enye.

Uku kwiyongera cyane k’umubare w’abandura mu gihe gito kwatewe ahanini n’u Buhinde bwanduyemo abarenga miliyoni mu byumweru bibiri,ndetse n’ubwandu bushya bukomeje kugaragara ku mugabane w’u Burayi.

Kuba abantu bakomeje kwandura ari benshi byatumye Israel ifata umwanzuro wo gusubizaho gahunda ya guma mu rugo ndetse n’u Bwongereza bukaba buherutse gutangaza ko nabwo buri kureba ukuntu bwayishyiraho mu rwego rwo gukumira ubwandu bushya buri kuhagaragara.

Mu kiganiro umuyobozi OMS mu Burayi, Dr Hans Kluge aherutse kugirana n’itangazamakuru ku wa 17 Nzeri yavuze ko uyu mugabane ukwiye kwitwararika kubera ko watangiye kongera kugaragaramo abantu benshi bashya bandura icyorezo cya Covid-19.

Yagize ati “Dufite ikibazo gikomeye kiri gukurira mu maso yacu, imibare y’abandura mu cyumweru ubu yarenze iyatangazwaga muri Werurwe ubwo iki cyorezo cyari ku kigero cyo hejuru mu Burayi.”

Yakomeje avuga ko ubu ibihugu byinshi by’i Burayi byatangiye kugira ubwiyongere bw’ubwandu.

Ati “Mu byumweru bibiri bishize, ibihugu birenga kimwe cya kabiri cy’ibigize u Burayi byatangaje ukwiyongera kw’abandura kuri hejuru ya 10%.”

Dr Kluge yabitangaje mu gihe mu Burayi umubare w’abanduye COVID-19 mu cyumweru kimwe urenga ibihumbi 300.

Zimwe mu mpamvu zitangwa zatumye umubare w’abandura wiyongera mu Burayi harimo kuba uburyo bwo gupima iki cyorezo bwarongerewe ndetse bugera kuri benshi, ariko hakaba n’abavuga ko biterwa n’uko abatuye uyu mugabane babaye nk’abadohoka ku mabwiriza yo kwirinda.

Mu bihugu by’ u Burayi byatangiye kongera kubona umubare munini w’abandura harimo u Bufaransa,u Butaliyani, Espanye n’u Budage.

Uretse umubare w’abandura iki cyorezo ukomeje kwiyongera n’abo gihitana bakomeje kugenda biyongera ubu ku Isi yose bakaba basatira miliyoni.


SANGIZA ABANDI IYI NKURU

LEAVE A REPLY

Please enter your comment!
Please enter your name here