Covid-19:Amerika igiye gukora igeragezwa rya nyuma ku rukingo rwa Coronavirus

0
310
SANGIZA ABANDI IYI NKURU

Abashakashatsi bo muri Leta zunze Ubumwe za Amerika, batangaje ko urukingo rwa mbere rwa Coronavirus rwageragejwe muri icyo gihugu rwatanze icyizere kuko rwongereye ubudahangarwa bw’umubiri w’umurwayi, bikaba biteganyijwe ko hagiye gukorwa igeragezwa rya nyuma.

Uru rukingo rwakorewe mu kigo cy’igihugu gishinzwe ubuzima muri Amerika gifatanyije na Moderna Inc., biteganyijwe ko kuwa 27 Nyakanga ari bwo hazatangira igeragezwa rya nyuma rizakorerwa ku bantu 30 000, rikaba rizemeza niba rufite ubushobozi buhagije bwo kurwanya Coronavirus.

Inzobere mu ndwara zandura Dr. Anthony Fauci, yatangaje ko aya ari amakuru meza. Itsinda ryakoze ubushakashatsi ryagaragaje ko abahawe uru rukingo bagaragaje ubudahangarwa mu maraso yabo butuma batakwandura. Ubu budahangarwa ngo bungana n’ubw’umuntu wakize Coronavirus.

Dr. Lisa Jackson wayoboye ubu bushakashatsi yavuze ko iyi ari intambwe y’ingenzi yari ikenewe kugira ngo igeragezwa rikomeze bityo hazamenyekane niba uru rukingo rushobora kurinda abantu kwandura Coronavirus.

Kugeza ubu nta gihe cyatanzwe uru rukingo ruzabonekera ariko ubutegetsi bufite icyizere ko mu mpera z’uyu mwaka ibizava mu igeragezwa rya nyuma bizaba byabonetse, kakazaba ari agahigo mu gukora urukingo.

Kugeza ubu muri Leta zunze Ubumwe za Amerika hamaze kwandura abantu miliyoni 3.48, hamaze gukira miliyoni 1.03, hamaze gupfa ibihumbi 138.


SANGIZA ABANDI IYI NKURU

LEAVE A REPLY

Please enter your comment!
Please enter your name here