Donald Trump yahagaritse Tik Tok na WeChat muri Amerika

0
104
SANGIZA ABANDI IYI NKURU

Perezida Donald Trump yashyizeho iteka rigamije gukumira imbuga ebyiri nkoranyambaga z’Abashinwa TikTok na WeChat ku gukorera muri Leta Zunze Ubumwe za Amerika mu minsi 45 iri imbere mu gihe cyose zizaba zitagurishijwe na Sosiyete zazikoze zo mu Bushinwa.

Amerika ishinja imbuga nkoranyambaga zakozwe n’Abashinwa ko zifashishwa mu bikorwa by’ubutasi na Guverinoma yabwo. Mu minsi ishize yari yavuze ko ibikorwa bya TikTok muri Amerika bigomba kuva mu maboko ya ByteDance Ltd, sosiyeye yo mu Bushinwa bikagenzurwa n’indi yo muri Amerika kandi nabwo leta ikazahabwa ku mafaranga yaguzwe, kuko ngo ariyo izaba yabigizemo uruhare.

Gusa muri iri teka, ntabwo havugwamo ko hari umubare w’amafaranga azajya mu isanduku ya leta mu gihe izi mbuga nkoranyambaga zizaba zigurishijwe.

Nihashira iminsi 45 izi mbuga zitaragurishwa, zizahita zikumirwa muri Amerika ntizongere gukora.

TikTok yamuritswe mu 2018 iboneka mu ndimi 39 kugeza ubu. Ni rumwe mu mbuga nkoranyambaga zikoreshwa cyane muri iki gihe aho nibura bibarwa ko ku kwezi rukoreshwa n’abantu barenga miliyoni 800.

Mu Bushinwa, ByteDance yakoze TikTok ifite urundi rubuga nkoranyambaga rwanamuritswe mbere yayo mu 2016 rwitwa Douyin. 57% by’abantu bakoresha izi mbuga nkoranyambaga babarizwa mu Bushinwa, mu gihe 36% barukoresha biganje muri Aziya. Ubu TikTok na Douyin ziza ku mwanya wa 15 ku isi mu mbuga nkoranyambaga zikoreshwa cyane.

Ubu habarwa nibura abantu miliyari 2.2 bamanuye uru rubuga kuri internet barutunze muri za telefoni zabo. Muri bo harimo miliyoni 175 bo muri Leta Zunze Ubumwe za Amerika. Imibare igaragaza ko abantu barukoresha barutakajeho miliyoni 90.7 z’amadolari mu mwaka ushize.

Mu gihe cy’ibyumweru bitandatu uru rubuga rugomba kuba muri Amerika rufite ba nyirarwo bashya. Sosiyete ya Microsoft ni imwe mu ziri mu biganiro bigamije kurugura ndetse umuyobozi wayo Satya Nadella yatangaje ko bagiye kwihutisha ibiganiro by’ubugure nyuma yo kuvugana na Perezida Trump.

Trump ku wa Mbere w’iki cyumweru yavuze ko TikTok igomba kuba yabonye umugizi wo muri Amerika bitarenze ku wa 15 Nzeri.

Hashize igihe inzego z’umutekano muri Amerika ziri mu iperereza kuri TikTok aho ishinjwa ko itanga amakuru y’abantu bayikoresha kuri Guverinoma y’u Bushinwa mu gihe iyiyasabye.

WeChat yo ni urubuga nkoranyambaga abantu bakoresha bandikirana ndetse rushobora no gukoreshwa mu kwishyurana. Ni urubuga rudakoreshwa cyane hanze y’u Bushinwa ariko biragoye ko ubuzima bushobora korohera umuntu uri mu Bushinwa mu gihe cyose atarukoresheje kuko rukoreshwa no kurusha uburyo busanzwe bwa email.


SANGIZA ABANDI IYI NKURU

LEAVE A REPLY

Please enter your comment!
Please enter your name here