Dr Sabin Nsanzimana yasubije byinshi ku mpungenge abaturarwanda bafite ku ifungurwa ry’ingendo z’indege, bavugako ryaba imbarutso yo gukwirakwiza COVID-19.

0
155
SANGIZA ABANDI IYI NKURU

Umuyobozi Mukuru w’Ikigo cy’Igihugu cy’Ubuzima (RBC), Dr. Sabin Nsanzimana, yahumurije abafite impungenge z’ukwiyongera k’ubwandu bwa COVID-19 nyuma y’ifungurwa ry’ingendo z’indege, bitewe n’ingamba zitandukanye zafashwe mu kwirinda ko hagira abinjiza ubwandu bushya mu gihugu.

Tariki ya 1 Kanama, u Rwanda rwongeye gufungura ikirere cyarwo ku ndege zitwara abagenzi, nyuma y’iminsi 134 yari ishize ikibuga cy’indege cya Kigali gifunze, icyemezo cyafashwe ku 20 Werurwe uyu mwaka mu rwego rwo kwirinda ikwirakwira ry’icyorezo cya Coronavirus.

Urugendo nimero “WB304” ni rwo rwabimburiye izindi, ruva i Kigali rwerekeza Dubai, rukozwe na RwandAir.

Uru rugendo ni intsinzi ikomeye ku mbaraga igihugu cyashoye mu guhangana na Coronavirus, rukaba n’intangiriro izaganisha ku isubukurwa ry’ibikorwa by’ubukerarugendo bifatiye runini ubukungu bw’u Rwanda.

Nubwo hari byinshi byitezwe, hari abagaragaje impungenge ku cyemezo cyo gufungura ikibuga cy’indege, bikanga ko bishobora kuzamura ubwandu bushya, mu gihe igihugu cyari gihagaze neza mu kugihashya.

Izi mpungenge kandi zinashingira ku byabaye ahandi, aho nko mu bihugu bigize Umuryango w’Ubumwe bw’u Burayi (EU), ikigero cy’ubwiyongere bwa Coronavirus cyazamutse nyuma y’uko hasubukuwe ingendo zirimo n’iz’indege.

Dr Nsanzimana yagize ati “Urebye ku kibuga cy’indege cyacu imyiteguro ihari, barahanagura, barasukura buri kanya, hari ibikoresho bihagije, hari aho umuntu akandagira n’iyo aba yazanye virus mu kirenge ikavaho”.

Yongeyeho ko n’abazajya binjira mu gihugu bazajya bapimwa, kandi bagategekwa kuzana icyemezo cy’igipimo bafashwe mbere y’amasaha 72 ngo burire indege, kigaragaza ko batanduye.

Yakomeje “Hari hoteli zateguwe bitewe n’iyo wahitamo, muri iyo hoteli twahashyize umuganga uzaba ahari buri gihe, uwo muganga azajya agufatira igipimo, narangiza abijyane bipimwe.”

“Mu masaha 24 bazaba babonye n’ibisubizo, banatahe bakomeze gahunda. Icyo gihe, uwo muntu azaba apimwe kabiri, kuko azaba afite igisubizo yazanye, agire n’icyo ngicyo tumwipimiye aho ngaho. Buriya rero umuntu upimwe kabiri, apimishwa kiriya gipimo kireba uturemangingo, ntabwo yaducikana virus mu buryo bworoshye”.

Mu myiteguro yo gusubukura ingendo z’indege, Leta y’u Rwanda iherutse gutangaza hoteli 17 zizajya zakirirwamo abashyitsi bose binjiye mu gihugu. Ni hoteli ziri mu byiciro bitandukanye, ku buryo buri wese ashobora kwisanga mu cyiciro cye, bitewe n’uko umufuka we ungana.

Dr Nsanzimana yongeyeho ko uburyo bwo gukurikirana abinjiye mu gihugu bwizewe, ku buryo ‘n’umwe waducika twamukurikirana neza’.

Yasobanuye ko igiteye impungenge ari imyitwarire ya bamwe mu banyarwanda, irimo kugaragaza ko hari abadohotse ku ngamba zo kwirinda icyorezo cya coronavirus.

Ati “Mu by’ukuri hariya njye simpabona nk’ahantu hazatubera ikibazo, ahubwo ikibazo tugishakire aha ngaha; aho turi kugenda mu midugudu, aho turi gukorera iminsi y’isabukuru, aho turi kujya muri za restaurant, abantu bakifotozanya begeranye”.

“Ikibazo kiri muri twe, kiri mu buzima bwa buri munsi, kiri aho dutuye abantu bagikora utubari… ni ho njye mbona ikibazo nyamukuru, ni na ho turi bushyire n’imbaraga nyinshi cyane n’inzego zose dukorana. Naho kuba ingendo zasubukuwe, ku kibuga cy’indege ntabwo ari ho hazaturuka Covid-19”.

Inzego z’umutekano zikunze kwerekana abantu mu bice bitandukanye bafatwa barenze ku mabwiriza yashyizweho yo kwirinda Coronavirus. Nko mu ijoro ryo ku wa Gatanu abarenga 2000 bafashwe barenze ku mabwiriza yo kwirinda coronavirus.

Hagiye kandi hagaragara abakora ibirori mu ngo zabo bagatumira imiryango n’incuti ziturutse kure, ibintu Dr Nsanzimana yavuze ko bishobora gukongeza icyorezo cya Coronavirus.

U Rwanda rufite abarenga 2,042 banduye Coronavirus, muri bo 1,119 barakize naho batanu bitaba Imana.


SANGIZA ABANDI IYI NKURU

LEAVE A REPLY

Please enter your comment!
Please enter your name here