FERWAFA izubaka ibibuga bine bigezweho mu mushinga uzatwara miliyari 2 Frw

0
235
SANGIZA ABANDI IYI NKURU

Ishyirahamwe ry’Umupira w’Amaguru mu Rwanda (FERWAFA) rirateganya kubaka ibibuga bine by’ubwatsi bw’ubukorano (tapis synthètique) cyangwa bifite ubwatsi bugezweho mu mushinga uzatwara hafi miliyari 2 Frw.

Inama y’Inteko Rusange ya FERWAFA yabaye ku wa 5 Gicurasi 2019 yafatiwemo umwanzuro uvuga ko mu bice bitandukanye by’u Rwanda hazubakwa ibibuga 10 bizatwara miliyari 2 Frw.

Aya mafaranga FERWAFA yayashoye muri uyu mushinga mu rwego rwo gushyira mu bikorwa gahunda ya FIFA Forward 2.0 igamije guteza imbere umupira w’amaguru, aho inkunga y’agera kuri miliyoni 2$ (agera hafi kuri miliyari 2 Frw) atangwa n’Ishyirahamwe ry’Umupira w’Amaguru ku Isi, azakoreshwa mu kubaka ibibuga.

Icyo gihe, abanyamuryango ba FERWAFA bari bemeranyijwe ko miliyoni imwe y’amadolari izifashishwa mu kubaka ikibuga kiri ku rwego mpuzamahanga.

Iki kibuga cyari kuzajya gikoreshwa n’abana bigira umupira w’amaguru mu Isonga ndetse n’abandi bahabwa amahugurwa atandukanye.

Indi miliyoni imwe y’amadolari ya Amerika yari kwifashishwa mu kubaka ibindi bibuga icyenda bisanzwe (aho biri bigatunganywa bitsindagirwa) mu turere dutandukanye tw’igihugu, ahabarizwa ibigo by’icyitegererezo mu mupira w’amaguru.

Umushinga warahinduwe, ibyari ibibuga 10 byahinduwe bine bigezweho

Mu gihe hashize amezi asaga 13 uyu mwanzuro wemejwe mu Nteko Rusange ya FERWAFA, ntabwo wigeze ushyirwa mu bikorwa.

Mu kiganiro cyihariye yagiranye na IGIHE dukesha iyi nkuru, Perezida wa FERWAFA, Rtd Brig Gen Sekamana Jean Damascène, yavuze ko hari impinduka zabayeho, abanyamuryango bemeranywa ko ibibuga byakubakwa aho bishobora kwitabwaho byaba byiza bikegerezwa amakipe.

Ati “FIFA Forward 2.0 yatangiye mu mwaka ushize ikazageza mu myaka ibiri iri imbere, twabanje gufata icyemezo mu Nama y’Inteko Rusange turavuga tuti uwakubaka ibibuga by’abana bisanzwe hirya no hino, ariko dutangiye kugenda tureba ku mashuri n’ahandi twasanze twibwira ko byakwihutisha iterambere ariko bishobora kumara igihe gito.”

“Twarongeye turicara turavuga tuti ariko buriya aho kugira ngo twubake ikibuga maintenance [kwitabwaho] yacyo izagorana kikaba cyamara umwaka umwe cyangwa ibiri kandi ushaka ikibuga kizakora igihe kirekire, turongera dusubiramo mu Nteko Rusange ikurikiye [mu mpera za 2019], twumva noneho birutwa no kubaka ibibuga bine biriho tapis [ubwatsi bw’ubukorano] cyangwa by’ibyatsi kugira ngo noneho tubyegereze ahantu hari amashuri cyangwa amakipe yacu kugira ngo babyungukiremo.”

Habura iki ngo uyu mushinga utangire gushyirwa mu bikorwa?

Rtd Brig Sekamana yakomeje avuga ko batangiye kurebera hamwe uburyo ibi bibuga bine byakubakwa, aho bari kuganira n’abafatanyabikorwa batandukanye barimo n’inzego za Leta kugira ngo nibiramuka byuzuye kubyitaho bizorohe.

Ati “Icyo cyemezo gifashwe n’Inama y’Inteko Rusange iheruka mu Ukuboza, nibwo twavuze tuti ‘Ese birakorerwa he?’, ubu turi gukora inyigo z’ikibuga umwenjeniyeri wacu areba aho cyakubakwa n’igiciro cyacyo.”

“Hagati aho icyo duteganya gukora ni ukugira ngo twumvikane n’abandi twafatanya gukora igikorwa kugira ngo turebe niba tutakongera n’ibibuga. Ni ukuvuga nk’urugero, hari ahantu ushobora gukorera iterambere ry’abana ugasanga hari n’ikipe yacu y’Icyiciro cya Mbere cyangwa iy’icya Kabiri ihakinira.”

“Ikibuga ni icy’Akarere ni urugero, kirahari, igisigaye ni ukuvuga ngo ni ukubakamo ikibuga, cyangwa noneho tukabwira akarere tuti niba mushaka kuvugurura ikibuga cyanyu twafatanyije kuri 55% cyangwa kangahe ku ijana noneho tukabaka ikibuga kimwe.”

Ibibuga bishobora kwiyongera bikaba umunani

Sekamana yavuze ko nibiramuka binyuze muri ubwo bufatanye n’izindi nzego, ibyari ibibuga bine bishobora kuvamo umunani.

Ati “Muri icyo gihe dushobora kuzavanamo ibibuga birenze bine, nibyo dushaka gukora muri aya mezi kugira ngo turebe ibishoboka. Nibinanirana tuzashaka ahantu dushyira ibyo bine, ariko twumvikanye n’abo bafatanyabikorwa dushobora gukuramo hagati ya bitandatu n’umunani.”

“Niyo gahunda dufite kubera ko icyemezo cyafashwe, ubwo ahasigaye kuzagena aho ariho ni ukuzareba ahari inyungu rusange ku banyamuryango, hashobora gukoreshwa mu iterambere no mu marushanwa.”

Mu Rwanda haracyagaragara ikibazo cy’ibikorwaremezo birimo ibibuga bidahagije ku makipe akina Icyiciro cya Mbere, icya Kabiri n’ay’abakiri bato.

Gicumbi FC na Espoir FC ziri mu makipe yangiwe kwakirira imikino mu rugo mu mwaka ushize w’imikino kubera ibibuga bibi nubwo byasanwe nyuma agakomorerwa mu gihe na Musanze FC hari ibyo yabanje gusabwa gutunganya mbere y’uko Shampiyona ya 2019/20 itangira.


SANGIZA ABANDI IYI NKURU

LEAVE A REPLY

Please enter your comment!
Please enter your name here