Gasabo: Akurikiranyweho kwicisha umwana ishoka nyuma yo kubeshya ngo agiye kumugaburira

0
104
SANGIZA ABANDI IYI NKURU

Umusore w’imyaka 32 wo mu Murenge wa Ndera mu Karere ka Gasabo yatawe muri yombi n’Urwego rw’Igihugu rw’Ubugenzacyaha, RIB, aho akurikiranyweho icyaha cyo kwica umwana w’imyaka icyenda witwa Irimaso Evode.

Ku wa 22 Nzeri 2020 ngo nibwo uyu musore yasanze Irimaso basanzwe baturanye iwabo amukura mu bandi avuga ko agiye kumugaburira.

Nyina w’uyu mwana, Mukamana Joselyne ngo akimara kumva ibi byamwanze mu nda akurikira uyu musore agira ngo arebe aho ajyanye umwana we aza gusanga yari yahishe ishoka ku irembo.

Mu kiganiro uyu mubyeyi yagiranye na Radio1 yavuze ko yagerageje kumurwanya ariko amurusha imbaraga birangira amutemeye umwana arapfa.

Ati “Yansanze ndi kumwe n’abana bose amutoranya mu bandi mubaza aho amujyanye ati ’ngiye kumuha ibiryo’, ngenda mukurikiye nsanga yasize ishoka ku irembo. Yagiye kuyimukubita ndamumwaka andusha imbaraga ahita ayimukubita inshuro ebyiri umwana ahita apfa, nawe afata ishoka ariruka niko gutabaza abaturage.”

Uwo musore amaze kwica uyu mwana ngo yahise ahunga yiruka nk’uko bitangazwa na bamwe mu baturanyi b’uyu muryango.

Umwe mu bari hafi aho yagize ati “Nari ndi hafi aha numva uyu mubyeyi ari kuvuga ngo ni mumufate anyiciye umwana, abantu baramutangira agiye kujya iwe duhita tumufata.”

Aba baturage bakomeje bavuga ko ukurikiranyweho ubwicanyi asanzwe afite imyitwarire mibi.

Ati “Ubundi uriya muhungu yarize ariko ameze nk’ufite ikibazo mu mutwe kuko nk’iyo yabaga yasinze yagendaga akubita abantu bose bahuye gusa ni agahinda kubona umuntu wize akora ibintu nk’ibi.”

Umuvugizi w’Umusigire w’Urwego rw’Ubugenzacyaha, RIB, Dr Murangira B. Thierry, yavuze ko uyu mugabo yatawe muri yombi akaba akurikiranyweho icyaha cyo kwica.

Yagize ati “Nibyo RIB yafashe umugabo w’imyaka 32 ukurikiranyweho icyaha cyo kwica umwana witwa Irimaso Evode akoresheje ishoka; ucyekwaho icyaha kuri ubu afungiye i Ndera kuri RIB. Iperereza rikaba riri gukorwa ngo harebe icyamuteye gukora ubwo bwicanyi bubabaje.”

Mu gihe ukekwa yahamwa n’icyaha cyo kwica, yahanishwa igihano cy’igifungo cya burundu nk’uko biteganywa n’ingingo ya 107 yo mu gitabo cy’amategeko ahana ibyaha mu Rwanda.


SANGIZA ABANDI IYI NKURU

LEAVE A REPLY

Please enter your comment!
Please enter your name here