Guverinoma ya Amerika yajyanye Google mu rukiko

0
46
SANGIZA ABANDI IYI NKURU

Guverinoma ya Leta Zunze Ubumwe za Amerika, yatanze ikirego irega Google iyishinja kubangamira ihangana risesuye ku isoko.

Muri iki kirego cyatanzwe ku wa 20 Ukwakira, ubuyobozi bwa Trump buvuga ko Google ishora akayabo k’amafaranga mu bikorwa bigamije gutsikamira ibindi bigo by’ikoranabuhanga bikora nk’ibyo ikora.

Buri mwaka ngo Google iha miliyari z’Amadorali ibigo bikomeye bikora telefoni nka Apple na LG, Motorola na Samsung kugira ngo muri telefoni bikora, ishakiro ryayo ryo kuri internet (search engine) rizaze ari ryo ryemejwe.

Aya mafaranga kandi ngo Google inayishyura ibigo bikora porogaramu zifashishwa mu gushakisha kuri internet, nka Mozilla na Opera kugira ngo nabyo bijye bishyira imbere iri shakiro ryayo. NI ibintu bifatwa nk’amakosa mu bucuruzi kuko bibangamira ihangana risesuye bikaba byaba intandaro yo guhomba kw’abandi no kubura amahitamo ku bakiliya.

Nubwo Leta ikomeje kwerekana ko ibyo Google ikora atari byo, abayobozi b’iki kigo bo ntibabikozwa kuko bavuga ko mu byo bakora byose ntaho barenga ku mabwiriza mpuzamahanga agenga ubucuruzi.

Umuyobozi ushinzwe ibikorwa bya Google ku Isi akaba n’umunyamategeko wayo, Kent Walker yavuze ko kuba abantu benshi bakoresha ishakiro ry’iki kigo atari uko babuze amahitamo cyangwa bahatiriza kuba ari ryo bakoresha.

Ati “Abantu bakoresha Google kuko ari byo baba bahisemo, ntabwo ari ukubera ko baba babihatirijwe, cyangwa kuko baba babuze andi mahitamo.”

Ku bijyanye no kuba bishyura ibigo bikora telefoni na porogaramu za mudasobwa zikoreshwa kuri internet, kugira ngo telefoni n’izi porogaramu bikora zize zemejemo ishakiro rya Google, Walker yavuze ko nta kosa ririmo kuko ibyo bakora bikorwa n’ibindi bigo bitandukanye birimo n’ibikora ibyo kurya, aho nabyo byishyura amaguriro atandukanye kugira ngo ashyire ibicuruzwa byabyo aho abakiliya bashobora kubona byoroshye.

Kugeza ubu iki kirego cya guverinoma ya Trump gishyigikiwe na Leta 11 zirimo Arkansas, Florida, Georgia, Indiana, Kentucky, Louisiana, Mississippi, Missouri, Montana, South Carolina na Texas.

Google ishinjwe kubangamira ihangana risesuye ku isoko nyuma y’uko na Facebook yagiye ishinjwa ikosa nk’iri. Bimwe mu bitekerezo bitangwa na guverinoma ya Amerika ni uko ibigo nk’ibi binini bikora ibintu bitandukanye byazajya bigabanywamo amashami hagendewe ku byo akora kugira ngo bidakomeza kubangamira ibindi ku isoko.


SANGIZA ABANDI IYI NKURU

LEAVE A REPLY

Please enter your comment!
Please enter your name here