Huye:Bamaze amezi ane bavoma amazi ya robine arimo umwanda batazi aho uturuka

0
96
SANGIZA ABANDI IYI NKURU

Abaturage batuye muri imwe mu midigudu yo mu Kagari ka Cyarwa mu Murenge wa Tumba ndetse n’igice kimwe cyo mu Murenge wa Mukura mu Karere ka Huye, bavuga ko bamaze igihe kigera ku mezi ane bavoma amazi kuri robinet arimo imyanda batazi aho ituruka.

Uko bigaragara ayo mazi aza arimo imyanda imeze nk’amakara cyangwa umugese, bityo bakavuga ko bibateye impungege kuko ashobora kubagiraho ingaruka z’ubuzima.

Umwe mu baturage ati “Amezi ane arashize tuvoma amazi arimo imyanda. Twabimenyesheje Wasac baratubwira ngo bagiye kubikemura ariko imyanda ikomeza kuza kandi iriyongera.”

Mu byifuzo byabo basaba ko ikibazo cy’amazi yanduye kitabwaho bakamenya aho iyo myanda ituruka kandi kigakemurwa.

Undi ati “Buri kwezi abantu bo muri Wasac bazana fagitire batwishyuza amazi ariko se kuki tubabwira ikibazo cy’amazi yanduye ntibakiteho. Turifuza ko baza kureba aho iyi myanda ituruka bagakemura ikibazo.”

Abo baturage bavuga ko hashize igihe kigera ku kwezi kumwe abakozi bo mu Kigo cy’Igihugu gishinzwe gukwirakwiza amazi, isuku n’isukura (Wasac) baje kureba iby’icyo kibazo ariko nta gisubizo babahaye.

Umuyobozi wa Wasac ishami rya Huye, Kanamugire Vedaste, yavuze ko icyo kibazo cy’amazi azamo imyanda kuri robinet bakimenye ndetse baranagikurikirana ngi arikio bari bazi ko cyakemutse.

Ati “Icyo kibazo twaracyumvise natwe ariko icyo gihe twogeje ibigega byose nyuma yaho twoza n’imiyoboro ku buryo twari tuzi ko cyarangiye. Turongera dusubireyo turebe aho cyagaragaraga (…) tuvome amazi yaho tuyapime turebe ko koko kigihari.”

Umuyobozi wungirije ushinzwe imibereho myiza y’abaturage mu Karere ka Huye, Kankesha Annonciata, yabwiye IGIHE ko bari basabye Wasac ko icyo kibazo igikemura bityo bagiye kureba aho kigeze.

Ati “Ndakizi; twari twasabye Wasac ngo ihagere irebe impamvu ibitera reka nkurikirane menye uko bimeze. Murakoze cyane kwibutsa ndabaha igisubizo.”

Abafite icyo kibazo cy’amazi azamo imyanda kuri robinet bavuga ko kugira ngo bayatekeshe bagerageza kuyayungurura ariko bafite impungenge z’ubuzima bwabo.


SANGIZA ABANDI IYI NKURU

LEAVE A REPLY

Please enter your comment!
Please enter your name here