Ibyo wamenya kuri Adham A. Hassoun wakiriwe n’u Rwanda umuturage utagira igihugu abarizwamo

0
203
SANGIZA ABANDI IYI NKURU

Guverinoma y’u Rwanda yatangaje ko yakiriye Adham Amin Hassoun, umuturage utagira igihugu wari umaze kurangiza igifungo yakatiwe azira ibyaha by’iterabwoba muri Leta Zunze Ubumwe z’Amerika.

Guverinoma y’u Rwanda yasohoye itangazo rivuga ko Adham Amin Hassoun, yoherejwe n’Ubutegetsi bwa Amerika mu ntangiro z’iki cyumweru akaba yarakiriwe ku bw’ubugiraneza.Iryo tangazo rivuga kandi ko ibi byakozwe mu rwego rwo kubahiriza amasezerano yo mu 1954 agenga abantu batagira ubwenegihugu u Rwanda rwashyizeho umukono.

Guverinoma y’u Rwanda yashimangiye kandi ko Adham Amin Hassoun yarangije igihano ke aho yari afungiwe muri gereza yo muri Amerika, agahitamo koherezwa no gutuzwa mu Rwanda.Iryo tangazo rigira riti “Hassoun yoherejwe mu Rwanda mu ntangiriro z’iki cyumweru hashingiwe ku masezerano yo mu 1954 agena imiterere y’abantu batagira ubwenegihugu, ni we wiyemereye koherezwa no gutuzwa mu Rwanda”.

Adham Amin Hassoun, kuri ubu ufite imyaka 58 y’ubukuru, yavukiye i Lebanon akaba yari umwimukira wavuye muri Palestine ajya muri muri Leta Zunze Ubumwe z’Amerika mu myaka ya 1980. Akigera muri Amerika yafunzwe bwa mbere mu 2002 azira kurenza igihe viza yamwemereraga kuba muri Amerika.

Mu 2007 yongeye gufungwa ashinjwaga kugira uruhare mu gutegura umugambi w’ubwicanyi, gushimuta no gukomeretsa abaturage b’Amerika, n’ibindi byaha by’iterabwoba yashinjwaga gukorana n’uwitwa Jose Padilla na Kifah Wael Jayyous.Bivugwa ko yamaze igihe kirenga umwaka n’igice afungiwe ahantu hatazwi, nyuma ajyanwa muri gereza ya Batavia. Yarekuwe muri iyo gereza mu mwaka wa 2018 nyuma yo kurangiza igifungo k’imyaka 15 ku byaha by’iterabwoba yashinjwaga.

Akigera hanze, bamwe mu bayobozi batangaje ko Hassoun wari urangije igifungo agiteje inkeke, bashingiye ku kuba hari imfungwa bababanaga yamushinjaga ko yateguriye muri gereza ikindi gitero yagombaga kugaba ku ruganda rwa gazi akimara kurekurwa.

Yarafashwe afungirwa muri kasho ariko biza gutahurwa ko uwo mugenzi we yamubeshyeraga, nk’uko yagiye abikora no kubandi yageretseho ikinyoma kimwe kubera kutishimira ko bamutanze kuva muri gereza.

Igihe yagezwaga imbere y’ubutabera, umucamanza yavuze ko Hassoun atari mu mugambi wagutse wo kwivugana Abanyamerika, ahubwo yakoranaga n’imiryango yatekerezaga ko igamije guhashya ubuhezanguni bw’Abayisilamu.

Nubwo bamwe mu bayobozi bo muri Amerika bahamyaga ko Hassoun ari ikihebe akwiye gufungwa burundu cyangwa akirukanwa ku butaka bw’Amerika, abamwunganira mu mategeko bakomeje kugaragaza ko arengana.Mu minsi ishize ni bwo Umucamanza Elizabeth Wolford yanzuye ko nta bihamya abamushinja bagaragaza ko ari umuntu uteje ikibazo Amerika, ategeka ko yarekurwa.

Leta Zunze Ubumwe z’Amerika zamwirukanye ku butaka bwazo ku wa Kabiri tariki ya 21 Nyakanga, ari na bwo yahisemo koherezwa mu Rwanda.

Bigenda gute ngo umuntu abe adafite ubwenegihugu

Ubundi bivugwa ko umuntu nta bwenegihugu afite iyo nta gihugu na kimwe kimwemera nk’umuturage wacyo mu buryo bwemewe n’amategeko. Bamwe mu batagira ubwenegihugu usanga ari impunzi, uretse ko hari n’abatabugira batararenga inkiko z’Igihugu bavukiyemo.

Imwe mu mpamvu zitera kuba wakwisanga nta bwenegihugu na bumwe ufite ni amategeko y’Igihugu wavukiyemo avuguruzanya, aho ibice bimwe by’Isi byemeza ubwenegihugu bishingiye ku wavugikye ku butaka (Jus soli ), mu gihe ibindi bishingira ku isano y’amaraso (Jus sanguinis).

Kuri ubu hari ibihugu bimwe na bimwe byemera kubahiriza amategeko y’imbu zombi, ariko hari aho usanga bareba uruhande rumwe, ku buryo uwavukiye mu gihugu ariko atahafite inkomoko yisanga yabuze ubwenegihugu yagera n’aho afite inkomoko agasanga bemera uwahavukiye gusa.Ibyo bituma muri Afurika habarurwa abantu batagira ubwenegihugu 715,089 ; muri Asia na Pasifika hakabarurwa miriyoni 1.582 ; u Burayi bubamo 570,53 naho muri Amerika hakabarurwa 2,460.


SANGIZA ABANDI IYI NKURU

LEAVE A REPLY

Please enter your comment!
Please enter your name here