Ikibazo cya Rayon cyahumuye andi makipe yo mu Rwanda-RGB

0
115
SANGIZA ABANDI IYI NKURU

Umukuru w’Urwego rw’Igihugu rw’Imiyoborere, RGB, Dr Usta Kaitesi, yatangaje ko gukemura ibibazo byavugwaga muri Rayon Sports byatanze umusaruro kuko hari indi miryango yagiye irwitabaza ngo ruyifashe gukemura ibibazo ifite.

Dr Kaitesi yabibwiye abanyamakuru nyuma y’umuhango w’ihererekanyabubasha wabaye mu itorero rya ADEPR ku wa Kane.

Yavuze ko nyuma y’uko bakemuye ibibazo by’amategeko n’imiterere byari muri Rayon Sports, bagashyiraho Komite y’Inzibacyuho mu kwezi gushize, indi miryango irimo Kiyovu Sports yabitabaje ngo bayifashe.

Ati “Leta yashyizeho amategeko y’uburyo imiryango ijyaho, uko yubahirizwa. Iyo ubuyobozi buhari, wavuze ubuyobozi bwa Kiyovu Sports, ariko ngira ngo Kiyovu Sports ntibagize ibibazo ngo bibe ibibazo kuko bigiriye inama yo kutugisha inama.”

“Batugishije inama dusanga mu by’ukuri icyabateraga ikibazo atari ikibazo kinini, hari amategeko twemera nka sitati, hari na ngengamikorere.”

“Amategeko ngengamikorere rero ntashobora kuvuguruza sitati, ariko rimwe na rimwe hari ubwo abari mu muryango batabyumva kubera ubushobozi, cyangwa ababifitemo inyungu bahitamo kubibona ukundi mu miryango itandukanye twakoranye nayo.”

Umukuru wa RGB yakomeje avuga ko mu gukemura ibibazo bya Rayon Sports habonetse umusaruro wo kwishimira kuko byahumuye indi miryango igatangira kurebera hamwe ibitanoze mu bikorwa byayo.

Ati “Twakwishimira ko iyi nzira twatangiye hari umusaruro munini itangiye kuduha, iyo tuba tutarakemuye ikibazo cya Rayon Sports uko twagikemuye, Kiyovu ntiyari bugire umwete wo kutugisha inama.”

“Kuri twe turi kubona hari icyo biri gutanga nk’umusaruro birenze umuryango umwe, ubu hafi imiryango yose ya siporo yaratwandikiye itubwira kunoza, itubwira ibyaburaga kandi nibyo tugambiriye.”

Yakomeje agira ati “Ubundi abantu bakwiye kubahiriza itegeko batabihaswe. Kuba rero hari ahabaye gukoresha imbaraga n’ububasha dufite nk’Urwego rw’Imiyoborere bigatuma abatabikoraga bajijukirwa, bakagerageza kubahiriza ibyo amategeko abiteganya ni ingenzi.”

“Hari ibyanozwa mu mikorere y’imiryango ariko ibikenewe byose mu rwego rw’amategeko birahari.”

Ku wa 22 Nzeri nibwo RGB yahagaritse Komite Nyobizi y’Umuryango Rayon Sports yari iyobowe na Munyakazi Sadate, kuko yananiwe kuzuza inshingano.

Urwego rw’Igihugu rw’Imiyoborere rwashyizeho Komite y’Inzibacyuho yaragijwe Umuryango Rayon Sports n’ibikorwa byawo igizwe na Murenzi Abdallah nka Perezida, Twagirayezu Thaddée na Me Nyirihirwe Hilaire nk’abagize Komite, ikaba izakora iminsi 30 kugeza ku wa 24 Ukwakira.

Ku wa 25 Nzeri, iminsi ibiri mbere y’uko haba amatora ya Komite Nyobozi ya Kiyovu Sports, Komisiyo iyashinzwe, yandikiye RGB isaba gufashwa gusabanura amwe mu mategeko y’uyu muryango kuko hari ayagongaga bamwe mu banyamuryango, akababuza kwiyamamaza.

Urwego rw’Igihugu rw’Imiyoborere (RGB) rwabwiye iyo Komisiyo ko hakurikizwa amategeko shingiro aha uburenganzira bungana abanyamuryango bose.


SANGIZA ABANDI IYI NKURU

LEAVE A REPLY

Please enter your comment!
Please enter your name here