Impamvu FERWAFA yateye utwatsi ubusabe bwa Rayon cyo gukinisha abanyamahanga batanu

0
45
SANGIZA ABANDI IYI NKURU

Mu nama y’Inteko Rusange isanzwe y’abanyamuryango b’Ishyirahamwe ry’Umupira w’Amaguru yabaye ku wa Gatandatu ku Gisozi, kimwe mu byari byitezwe ni ukongera umubare w’abanyamahanga ariko nta mwanya byahawe kugira ngo bifatweho umwanzuro ufatika.

Ubwo ubunyamabanga bwa FERWAFA bwatumiraga iyi Nteko Rusange ku wa 16 Nzeri uyu mwaka, abanyamuryango basabwaga kureba niba hari ibitarashyizwe mu ngingo 18 zari kwigwaho, bakabyandika kugira ngo nabyo bizigweho.

Benshi mu banyamuryango (amakipe) b’Icyiciro cya Mbere bifuzaga ko umubare w’abanyamahanga wakongerwa, ukava kuri batatu basanzwe bakoreshwa muri 18 bifashishwa ku rupapuro rw’umukino.

Rayon Sports ni yo kipe rukumbi yasabye ko uyu mubare wakongerwa, ukagirwa abanyamahanga batanu.

Perezida wa Ferwafa, Rtd Brig Gen Sekamana Jean Damascène, yavuze ko impamvu iyi ngingo itahawe umwanya ari uko ubusabe bwa Rayon Sports bwatanzwe nyuma mu gihe kidakwiye, bityo buzasuzumwa ubutaha.

Ati “Nta n’icyo twaganiriyeho nk’uko biri. Ni igitekerezo cyari cyazanywe na Rayon Sports, ariko hari icyo amategeko y’ubutumire asaba. Gutumira bigomba kuba ukwezi mbere, ariko nabo ibyo bashaka ko bizigwa, bagomba kubyohereza iminsi 21 mbere mbere y’uko Inteko Rusange iba.”

“Ni ukuvuga ngo icyifuzo cyabo cyaje iminsi yararenze, ariko kubera ko ibyo baba baranditse byose twabizanye, twabamenyesheje ko bakererewe, tunababwira ko igitekerezo gishobora kuzigirwa mu zindi nzego. Nta kindi cyemezo twagifasheho.”

Perezida wa FERWAFA yavuze ko ku ruhande rwe atarwanya ko umubare w’abanyamahanga wakwiyongera, ariko na none hakwiye gushyirwaho gahunda ihamye igaragaza uburyo bakongerwa, urwego rw’abemewe n’icyo bafasha Abanyarwanda bakinana.

Ati “Abanyamahanga simbarwanya, nemeranya nabo, ariko ni abanyamahanga bameze bate dukwiye kuba dufite? Twigiraho iki? Gutekereza kuzana umunyamahanga unganya n’Abanyarwanda ntacyo uba ubamariye. Hari n’abaza kwigira hano. Ni ngombwa gufata umunyamahanga waheka ikipe nk’uko mubivuga, ufite agaciro ku buryo yagurishwa.”

Rayon Sports yasabaga ko umubare wongerwa, kuri ubu ifite abanyamahanga batandatu barimo Umunye-Congo Manace Mutatu, Umunya-Côte d’Ivoire Drissa Dagnogo n’Umunya-Mali Oumar Sidibé.

Aba biyongeraho Umunye-Congo Robert Mbelu n’Umunya-Côte d’Ivoire Jean Vital Ourega, bombi batiwe muri TP Mazembe.

Komite y’Inzibacyuho ya Rayon Sports ivuga ko yamaze koherereza itike y’indege Umunya-Mali Moussa Camara na Biramahire Abeddy ukina muri Zambia mu gihe Umurundi Nihoreho Arsène azatizwa muri Bugesera FC.


SANGIZA ABANDI IYI NKURU

LEAVE A REPLY

Please enter your comment!
Please enter your name here