Joe Biden yiteguye gukura leta zunze ubumwe z’Amerika mu mwijima Trump yabajyanyemo

0
88
SANGIZA ABANDI IYI NKURU

Joe Biden wamaze kugenwa nk’umukandida uzahagararira ishyaka ry’aba-démocrates mu matora ya Perezida azaba mu Ugushyingo uyu mwaka, yavuze ko intego ye ari ukuvana abanyamerika mu mwijima bamazemo igihe, kubera Perezida Donald Trump.

Biden wahoze ari Visi Perezida wa Amerika yavuze ko Trump bazahangana mu matora, yateje umujinya, ubwoba n’amacakubiri mu mitima y’abanyamerika.

Uyu musaza w’imyaka 77 yabitangaje kuri uyu wa Kane mu gusoza inteko idasanzwe y’ishyaka ry’aba-democrates, ari nayo yemerejwemo nk’umukandida uzabahagararira.

Muri iyo nteko yabaga mu buryo bw’ikoranabuhanga hirindwa icyorezo cya coronavirus, Biden yavuze ko nahabwa amahirwe agatorwa, azakorera neza abaturage.

Yagize ati “Nzaba inshuti y’umucyo aho kuba iy’umwijima. Ni igihe ngo twe abaturage dushyire hamwe. Nitutagira ikosa na rimwe dukora, ibi bihe by’umwijima tuzabivamo.”

Yavuze ko umunsi w’amatora uri mu biganza by’abanyamerika, bagahitamo “inzira y’agahinda, kubura ibyiringiro, amacakubiri n’urwikekwe, cyangwa se inzira y’umucyo n’ubumwe.”

Yavuze ko aya matora afite ikintu kinini avuze kuri Amerika kuko ariyo azagena niba inzira bagiye kujyamo ari nziza cyangwa bakomeza inzira mbi.

Yavuze ko abanyamerika nibongera gutora Trump, ibintu bizarushaho kuba bibi.

Ati “Icyo tuzi ni uko uyu muperezida nahabwa indi myaka ine, azakomeza kuba nk’uko yari ameze mu myaka ine ishize. Perezida udafata inshingano, wanga kuyobora wirirwa agereka ibibazo ku bandi.”

Biden yakomeje agira ati “Ni umuntu uzabyuka mu gitondo yirebaho aho kureba ku miryango yanyu n’abana banyu. Ese iyi niyo Amerika mwifuza mwe n’abana banyu?”

Biteganyijwe ko amatora ya Perezida azaba tariki 3 Ugushyingo 2020. Biden azaba ahanganye na Trump utegereje kwemezwa n’ishyaka rye mu cyumweru gitaha.


SANGIZA ABANDI IYI NKURU

LEAVE A REPLY

Please enter your comment!
Please enter your name here