Kamonyi : Abaturage bati ‘ntitubona rezo ya telefone’, Visi Meya ati ‘no mu biro by’akarere natwe icyo turagifite’

0
106
SANGIZA ABANDI IYI NKURU

Abatuye tumwe mu tugari two mu mirenge ya Runda na Gacurabwenge bavuga ko babangamiwe no kuba guhamagara no guhamagarwa kuri telefone zabo bidapfa gukunda kubera ikibazo cya rezo nke ya telefone.

Ni mu gihe muri iki gihe ubuzima bwose busa n’ubushingiye ku ikoranabuhanga rya rezo ya telefone no kuri interinete kuko muri iyi minsi biragoye kumenya ko kanaka yabyaye,yarwaye, yashyingiwe bitanyuze mu buryo bw’ikoranabuhanga riri gusimbura uburyo bwo gushyikirana binyuze mu gusurana.

Leta z’ibihugu nazo ziri gushyira imbaraga mu gutanga serivise hifashishijwe ikoranabuhanga kuko byihutisha serivise kandi bikaniga amayira n’ibyuho bya ruswa.

Mu minsi ishize ubwo umunyamakuru yari mu karere ka Kamonyi mu murenge wa Gacurabwenge yahamagawe n’abantu bagera kuri batanu ntiyabasha kumvikana nabo kubera ikibazo cya rezo ya telefone icikagurika.

Abatuye muri aka gace bavuga ko iki kibazo cya rezo nke bagisangiye n’abo mu murenge wa Runda, bakavuga ko bibagiraho ingaruka.

Umwe muri bo yagize ati “Nibyo hano rezo ya telefone ni nkeya kandi iracikagurika, kugira uvugane n’umuntu mubashe kumvikana ni tombora. Hano tubayeho mu bwigunge”.

Umuyobozi wungirije w’Akarere ka Kamonyi ushinzwe ubukungu n’iterambere akaba n’Umuyobozi w’Akarere w’agateganyo Tuyizere Thaddee avuga ko iki kibazo gihari gusa ngo bakigejeje ku nzego bireba bizeye ko kiri gukurikiranwa.

Agira ati “Network ni ikibazo, uretse n’aho wavuze no mu karere (ku biro) nimuhagera muzasanga ari nke ariko ni ikibazo twavuganye n’aya makampani y’itumanaho batubwira ko bazabikemura twizera neza rero ko babirimo kandi duhora twibutsa”.

Umunyamakuru yagerageje kuvugana na MTN kugira ngo tumenye ingamba bafite zo gukemura iki kibazo cya rezo ya telefone icikagurika hamwe na hamwe mu gihugu ariko iminsi ibaye itatu ntacyo baradutangariza.

Ku ruhande rwa Airtel Tigo, umuvugizi w’iyi kampani John Magara yavuze ko bagiye gukurikirana iki kibazo.

Src:Ukwezi


SANGIZA ABANDI IYI NKURU

LEAVE A REPLY

Please enter your comment!
Please enter your name here