Kayonza: Umugabo yafashwe afite umurima w’urumogi iwe mu rugo

0
222
SANGIZA ABANDI IYI NKURU

Umugabo wo mu Karere ka Kayonza mu Murenge wa Kabarondo yasanganywe umurima w’urumogi yari yarahinze iwe mu rugo, avuga ko yaruhinze yiteguye kwirengera ingaruka zizamubaho naramuka afashwe.

Uyu muturage yafashwe mu ijoro ryakeye ryo kuwa 20 Mutarama 2021. Uru rumogi yari yararuhinze mu murima uri iwe mu rugo mu gikari mu Mudugudu w’Akagarama mu Kagari ka Kabura mu Murenge wa Kabarondo.

Umunyamabanga Nshingwabikorwa w’Umurenge wa Kabarondo, Kagabo Jean Paul yabwiye IGIHE dukesha iyi nkuru ko uyu muturage bamufashe nyuma y’amakuru yatanzwe n’umuyobozi w’umudugudu ubwo nawe yabibwirwaga n’abana ko mu gikari cy’uyu mugabo hariyo umurima uhinzemo urumogi.

Ati “Ni amakuru twahawe n’umuyobozi we w’umudugudu ko hari umuturage we wahinze urumogi, yaragiye mu gikari iwe akorotira urugo rwe maze kumuzenguruko w’inzu asa n’uwuhashyira uturima tw’igikoni, ni ahantu hanini cyane ku buryo kuhagera byasabaga guca mu nzu ye imbere.”

Gitifu yakomeje avuga ko ku mugoroba aribwo bafashe uyu mugabo bamujyana iwe bamugejejeyo abereka uwo murima yahinzemo urumogi.

Ati “ Ni umurima munini urebye ntubuzemo nka metero 30, twamuganirije atubwira ko yabikoze yabitekerejeho ngo yari abizi ko nibamufata bazamuhana akanafungwa ngo ariko yabikoze abizi, harimo ibiti 157 harimo n’ibyatangiye kuzana imbuto nini ku buryo ashobora kuba yasaruraga nubwo we yaduhakaniye.”

Gitifu Kagabo yakomeje avuga ko abaturage baturanye n’uyu mugabo babwiye ubuyobozi ko mu rugo rw’uyu mugabo nta muntu ujya uhagera ngo kuko batinya ko yabagirira nabi, ngo yari umuntu batinya cyane.

Yavuze ko kugira ngo babimenye bifashishije umwana muto ajyayo agiye kubasura arangije acaho ibibabi arabazanira basanga ni urumogi, uwo mwana ngo yababwiye ko ari ibiti byinshi bimeze gutyo ni ko gutangira gushaka uko yafatwa.

Gitifu Kagabo yasabye abaturage kujya bafatanya n’ubuyobozi bagakumira abantu nk’aba bahinga urumogi bagamije kwangiza rubanda.

Ati “Abaturage turabasaba gukomeza kwirinda ibiyobyabwenge kuko nta cyiza cyabyo uretse kubangiza, ikindi turabasaba gukomeza kuduha amakuru y’abacuruza ibiyobyabwenge kugira ngo tubafate bakurikiranwe.”

Kuri ubu uyu muturage yashyikirijwe Sitasiyo ya RIB ya Kabarondo, Akagari ka Kabura ni kamwe mu gakunzwe gufatirwamo ibiyobyabwenge inshuro nyinshi, urugero ni nko mu cyumweru gishize kuko hafatiwe umugabo wari uri gucuruza kanyanga, icyo gihe yarirutse asiga ubuyobozi kanyanga imwe yacuruzaga asiga ayimennye indi irafatwa.

Ni urumogi ruhinze ku bisa n’uturima tw’igikoni mu rugo rw’uyu mugaboAho uru rumogi ruhinze bivugwa ko nta bantu bahageraga


SANGIZA ABANDI IYI NKURU

LEAVE A REPLY

Please enter your comment!
Please enter your name here