Kigali : Arashinja abapolisi kumumugaza no gutuma yandura Covid-19 azira kutambara agapfukamunwa

0
213
SANGIZA ABANDI IYI NKURU

Nsengimana Augustin w’imyaka 28 y’amavuko, arashinja abapolisi kumukubita bikamuviramo ubumuga ndetse nyuma bakamujyana ahantu bari bafite amakuru ko harimo abarwayi ba Coronavirus, intandaro y’ibyo byose ikaba ari uko bamubwiraga ko atambaye agapfukamunwa n’ubwo we yemeza ko yari akambaye.

Nsengimana Augustin amaze iminsi yandikira inzego zirimo Polisi y’u Rwanda, Urwego rw’Ubugenzacyaha RIB ndetse n’ibiro bya Perezida wa Repubulika asaba kurenganurwa, agaragaza akarengane yakorewe nk’uko yanabisobanuye mu kiganiro yagiranye na Ukwezi dukesha iyi nkuru.

Nk’uko bigaragara muri izo nyandiko , Nsengimana Augustin avuga ko tariki 19/06/2020 yari i Nyabugogo mu karere ka Nyarugenge mu nyubako y’amashyirahamwe, akaza guhuriramo n’itsinda ry’abapolisi bari bakuriwe na Chief Spt Ndamage Hodali bakamubwira ko bamubonye atambaye agapfukamunwa n’ubwo uyu Nsengimana we yemeza ko yari akambaye, yahakana bakamukubita bakamutera ubumuga bungana na 60% nk’uko raporo afite ya muganga wo mu bitaro bya CHUK ibigaragaza.

Akomeza avuga ko bahise bajya kumufungira kuri sitasiyo ya Polisi ya Kimisagara ariko bahagera komanda waho akanga ko bamufunga kuko yabonaga akeneye ubuvuzi, bahita bamujyana kuri sitasiyo ya Rwezamenyo aho yafungiwe kugera tariki 29/06/2020 ubwo komanda waho yavugaga ko atakomeza kumufunga binyuranyije n’amategeko cyane ko nta na dosiye yari yarakorewe.

Kuri iyo tariki ngo bamujyanye i Gikondo aho benshi bakunda kwita mu nzererezi, uyu Nsengimana akavuga ko hari hari mu kato kubera ubwandu bwa Covid-19 bwari buhari, bakamujyanamo nkana kuko bangaga kumurekura ngo ubumuga yatewe butazagaragara, we akabona ko bashakaga ko yabanza akoroherwa bakabona kumurekura.

Akigeramo ngo yahise ahandurira icyorezo cya Coronavirus, avanwamo ajyanwa i Kanyinya aho yitaweho n’abaganga aza gusezererwa mu bakize iki cyorezo tariki 30/07/2020. Nyuma nibwo yatangiye gushaka ubutabera, icyakoze agashima ubuyobozi bwa Polisi by’umwihariko Umuvugizi wayo CP John Bosco Kabera kuko bamufashije agasubizwa n’ibyo yari yarambuwe umunsi afatwa, akanahabwa itsinda ry’abapolisi bakurikirana ikibazo cye. Gusa mu byo yasubijwe ngo ntarabona telefone igezweho yo mu bwoko bwa Tecno nayo yambuwe tariki 19/06/2020.

Anenga RIB kandi kuba ikirego cye kimaze igihe gitanzwe ariko akaba atarabona ubutabera ndetse na dosiye itarigeze ishyikirizwa ubushinjacyaha ngo abamuhohoteye bakurikiranwe.

CP John Bosco Kabera, Umuvugizi wa Polisi, avuga ko uru rwego rwakiriye Nsengimana Augustin rukamutega amatwi ndetse abo avuga ko bamuhohoteye bakaba barabajijwe, anasubizwa bimwe mu byo yari yambuwe, telefone ye nayo akaba amwizeza ko izaboneka vuba. Avuga kandi ko hakiriho itsinda ry’abapolisi bakomeza kumufasha.

Ku ruhande rwa RIB, Dr Thierry Murangira uyivugira avuga ko tariki 8/8/2020 ari bwo bakiriye ikibazo cye, kikaba kirimo gukurikiranwa kandi neza hakorwa iperereza ryimbitse. Gusa uyu muvugizi ntiyatubwiye niba abo bashinjwa guhohotera Nsengimana baba bafunzwe, kuko ngo nta byinshi yavuga mu gihe iperereza ritararangira.

Ukwezi


SANGIZA ABANDI IYI NKURU

LEAVE A REPLY

Please enter your comment!
Please enter your name here