Kimenyi Yves yareze Rayon Sports muri FERWAFA

0
116
SANGIZA ABANDI IYI NKURU

Umunyezamu Kimenyi Yves uheruka gusinyira Kiyovu Sports, yareze Rayon Sports muri FERWAFA ko yanze kumuha urupapuro rumurekura mu gihe itigeze yubahiriza ibyo bari bumvikanye.

Kimenyi Yves yari afite amasezerano azarangirana n’umwaka w’imikino wa 2020/21 muri Rayon Sports.

Ahagarariwe n’Umunyamategeko Ndayambaje Gilbert, uyu mukinnyi yandikiye FERWAFA avuga ko yerekeje mu yindi kipe nyuma y’uko Rayon Sports itubahirije ibyo bari bumvikanye mu masezerano.

Ati “Yabonye indi kipe bakorana amasezerano kuko Rayon Sports itubahirije ibiri mu ngingo ya gatandatu y’ibyo bari bumvikanye, aho muri miliyoni 8 Frw yaguzwe, yahawe miliyoni 2 Frw ndetse andi miliyoni 6 Frw asigaye akaba yaragombaga kuyahabwa bitaranze tariki ya 30 Nzeri 2019, bitaba ibyo akaba afite uburenganzira bwo kwishakira indi kipe.”

Uhagariye uyu mukinnyi, yakomeje avuga ko ku wa 3 Kamena 2020, Rayon Sports yabwiye Kimenyi Yves ko ubwo tariki ya 30 Nzeri 2019, yageraga, yamumenyesheje ko ibyo bumvikanye bitubahirijwe, ariko nta kigaragaza ko uyu mukinnyi yamenyeshejwe.

Uruhande rwa Kimenyi Yves rwasabye guhabwa urupapuro rumukura muri Rayon Sports kuko nta masezerano bagifitanye, kumuha miliyoni 6 Frw yasigaye ku mafaranga yaguzwe, imishahara y’amezi abiri (Gashyantare na Werurwe) ndetse n’uduhimbazamusyi tw’imikino itatu.

Amakuru IGIHE ifite ni uko ubwo Kimenyi Yves yaherukaga guhura n’ubuyobozi bwa Rayon Sports, yasabwe kwigomwa ibyo iyi kipe imubereyemo kugira ngo yemererwe kujya muri Kiyovu Sports, ariko nayo ikaba yaragomba kugira ayo imugura, agera kuri miliyoni 2 Frw.

Kimenyi Yves wari umaze umwaka umwe muri Rayon Sports nyuma yo gutandukana na APR FC, yasimbujwe Kwizera Olivier wakinaga muri Gasogi United.


SANGIZA ABANDI IYI NKURU

LEAVE A REPLY

Please enter your comment!
Please enter your name here