kirehe:Dore ibimaze kuva mu iperereza kuri wa musore warashwe na polise

0
277
SANGIZA ABANDI IYI NKURU

Ku Cyumweru tariki ya 30 ahagana saa 20h30 z’ijoro, nibwo umupolisi ukorera mu Karere ka Ngoma mu Murenge wa Zaza, yarashe umusore witwa Nsengiyumva Evariste uzwi nka Black, mu bivugwa ko yashatse kumurwanya atwaye umuturage wari wahinduye urugo rwe akabari, yarenze ku mabwiriza yo kwirinda COVID-19.

Ni ibintu byatumye Polisi itangira iperereza ku mupolisi warashe uyu muturage kugira ngo hamenyekane ukuri.

Mu butumwa yanyujije kuri Twitter, Polisi y’u Rwanda yatangaje ko “Iperereza rirakomeje kugira ngo hamenyekane uko byagenze.”

IGIHE dukesha amakuru yasuye abaturage bo mu Mudugudu w’Irebero mu Kagari ka Nyagasozi mu Murenge wa Zaza, ahabereye uko kuraswa, basobanura uko byagenze n’uko uyu musore warashwe yari yarigize intakorwaho, yitwaje ko yari umusirikare nubwo yaje kwirukanwa mu 2018, kubera imyitwarire mibi.

Simugomwa Olivier utuye mu rugo ruteganye neza n’urwo barasiyeho Nsengiyumva, yavuze ko ibyabaye yabireberaga mu nzu iwe, ubwo polisi yasangaga mu rugo rw’umuturanyi abantu benshi banywa inzoga.

Ati “Nagiye kubona mbona abantu baturutse kwa Gashumba Vedaste (nyiri urugo rwasanzwemo abanywaga inzoga) abapolisi bari bamaze kumanuka bageze hano barimo kuhakomanga, nyuma nibwo hahise hasohokamo abantu baraza basakirana n’abapolisi, abo bantu basa n’abarwanya abapolisi.”

“Mu kubarwanya babasatira, uwo bita Black (warashwe) yaje asatira komanda (Commander) kuko we yavugaga ko ashaka nyir’urugo kugira ngo bajye kumubaza impamvu yaruhinduye akabari.”

Yakomeje avuga ko Black yahise ahakanira abapolisi ko uwo nyir’urugo batari bumutware, abapolisi na ba baturage banywaga inzoga ngo basa n’abagundagurana.

Black ngo yahise asingira wa mupolisi mukuru wari uhari, undi amusaba kumurekura aranga ashaka kumukubita icupa yari afite, umupolisi wari ufite imbunda ahita amurasa.

Ishimwe Sandra Nadège w’imyaka 18 y’amavuko uvuka muri uru rugo rwarasiwemo Black, we yavuze ko bijya gutangira babonye abashyitsi baje kubasura, ubwo bwari butangiye kwira. Papa we ngo yahise atumaho inzoga batangira gusangira, nyuma ngo babona Black arinjiye arabasuhuza.

Ati “Yaje yasinze ubona ko afite amakuru ko abo bantu bari mu rugo kuko bari batuwe baziranye, yinjira mu nzu baraganira, hashize iminota mike tubona abayobozi baraje babaza nyiri urugo, papa araza bahita bamwambika amapingu, bagiye kumujyana Black aritambika, abwira abapolisi ko batari bumujyane, abwira umupolisi mukuru wari uhari ko agiye kumwica, batangira guserera, hashize umwanya numva baramurashe.”

Nsengiyumva warashwe na polisi, ni umwe mu bo abaturage bavuga ko yakundaga kurangwa n’urugomo, akitwaza ko yahoze mu gisirikare ubundi agaca mu tubari no mu bacuruzi ba butike abaka inzoga z’ubuntu, abandi akabasaba amafaranga, ubyanze ngo akamukubita cyangwa agasiga amennye ibyo acuruza.

Nkunzurwanda Théoneste w’imyaka 39, yavuze ko kuva mu Ukwakira 2019 yatangiye kugirana ibibazo na Black, nyuma yo kumufatana n’abandi bahungu baje kumwiba. Icyo gihe ngo yamutwaye 200 000 Frw, n’ubuyobozi bw’Akagari na Polisi ngo bwiboneye ibimenyetso, bukora raporo birarangira.

Nyuma y’amezi abiri ngo yarongeye aragaruka, azana isuka n’umuhoro ngo aje kumwica.

Ati “Mbibonye nahise mpunga, ambuze amena ibirahure by’inzugi n’amadirishya, nyuma tujya mu rubanza abasirikare baza kumutwara arafungwa, ajya no gufungirwa i Nsinda, ariko nyuma y’ukwezi aragaruka.”

Nkunzurwanda avuga ko ashyize mu gaciro ibyo yamuhombeje byose bifite agaciro ka 280 000 Frw, ndetse ko byasaga n’aho abayobozi b’inzego z’ibanze bamutinyaga cyane ku buryo abaturage bamuregaga, bikaba imfabusa.

Bamwe mu bagore bo mu Mudugudu w’Irebero , bavuze ko kenshi iyo Black yamaraga kunywa inzoga, ikintu cya mbere cyamuzagamo ari ugushaka gufata ku ngufu umugore n’umukobwa wese bahuye.

Urugero ni Muberarugo Aline w’imyaka 24, akaba muramu wa Gashumba ibyo byose byabereyemo. Uyu mukobwa ukomoka mu Murenge wa Mugesera, ku Cyumweru mbere yuko ibi byose biba ngo yaciye kwa Black aramuhagarika ashaka kumwinjiza mu nzu ku ngufu, undi abyanze aramuhondagura amurema inguma.

Nirere Agnes ufite imyaka 51 na we yagize ati “Nkatwe abamama yatuziraga cyane, iyo yamaraga kunywa agacupa yajyaga agenda ku bagore ashaka kubaterura ngo ajye kubasambanya. Mu bantu yahigaga cyane nanjye nari ndimo, n’ejo yarabimbwiye mubaza icyo dupfa ntiyakimbwira. Iyo yakwishyiragamo yagutegaga, rimwe na rimwe ugatabarwa n’abaturage.”

Umwali Irène we yavuze ko benshi mu bakobwa n’abagore iyo bamenyaga ko yasinze, ngo abenshi batahaga bakikingirana kuko ngo iyo yakubonaga hafi yashakaga kugufata ku ngufu.

Ati “Nk’abadamu ba hano mu mudugudu twese twamutinyaga, kuko iyo yakwifuzaga kugira ngo bimuvemo byagoranaga.”

Umuyobozi w’Umudugudu w’Irebero, Nkabandi Jean Paul, we yavuze ko kuva Nsengiyumva yirukanwa mu Ngabo z’u Rwanda mu 2018, atigeze abanira neza abaturage, ngo yagaragaraga nk’ufite ikibazo cyo mu mutwe.

Ati “Amaze kugera inaha yashwanye n’umugabo, banzanira ubutumire ngo mbumuhe, muhamagaye arantuka, bukeye duhuye ngiye kubumuha arankubita, murega ku Murenge, ngiye kujya kumurega turongera turahura arankubita cyane n’abantu barebera, tugerageza kubigeza kuri RIB, yandika ikirego cyanjye ubu bari bakigifite.”

Uyu muyobozi yavuze ko atari we gusa yakubise, kuko yanakubise Umunyamabanga Nshingwabikorwa w’Akagari mu ntangiriro z’ukwezi kwa kane, ngo hari n’umugore wimutse muri uyu mudugudu kubera gushaka kumufata ku ngufu.

Yanavuze ko uyu mugabo ari we wibye imodoka y’Umunyamabanga Nshingwabikorwa w’Umurenge wa Zaza, Singirankabo Jean Claude, akayigongesha mu buryo bukomeye, ku buryo uyu muyobozi amaze amezi hafi atatu adafite imodoka.

SRC:igihe.com


SANGIZA ABANDI IYI NKURU

LEAVE A REPLY

Please enter your comment!
Please enter your name here