Menya ingano y’umutungo wa za miliyari ubarirwa umuherwe Kabuga Felicien n’uko yawubonye

0
281
SANGIZA ABANDI IYI NKURU

Kabuga Felisiyani kuri ubu ukurikiranyweho ibyaha birimo kuba umuterankunga w’ishyirwa mu bikorwa rya Jenoside yakorewe Abatutsi mu 1994, yaba ari umwe mu baherwe bazwi w’ibihe byose mu Rwanda, hakurikijwe imibare itangwa kugeza ubu y’agaciro k’imitungo ye n’umugore we Josephine Mukazitoni.

Inyandiko dukesha ikinyamakuru The Cinema Holic ivuga ko umutungo ubarirwa Kabuga Felicien kugeza mu mpera za 2020, ungana n’amadolari ya Amerika miliyoni 50, ni ukuvuga hafi miliyari 50 uyabaze mu mafaranga y’u Rwanda, kandi uyu mutungo ukaba utabariyemo imitungo yasize mu Rwanda ubwo yahungaga kuko yagiye igurishwa n’ikigo gishinzwe gucunga imitungo yasizwe na beneyo.

Iki kinyamakuru kivuga ko hari inyandiko z’imyirondoro ya Kabuga zigaragaza ko mu mitungo afite harimo amazu menshi akodeshwa mu bihugu bitandukanye, cyane cyane muri Kenya aho yamaze imyaka myinshi yihishe. Muri ayo mazu harimo iy’agatangaza iri mu mujyi wa Nairobi mu gace kitwa Kilimani. Bivugwa kandi ko mu bihugu afitemo agatubutse harimo u Bufaransa n’Ubusuwisi.

Tugarutse mu myaka yo hambere, ubukire bwa Kabuga n’uko yabukoresheje nibyo byatumye ubu yitwa “umuterankunga wa Jenoside”, Kabuga yari umucuruzi ukomeye wabanaga bya hafi n’umuryango wa Habyarimana Juvenal wari Perezida w’u Rwanda, ndetse yari bamwana we kuko yari yarashyingiye kwa Habyarimana.

Yagize uruhare mu ishingwa rya komite y’agateganyo y’ikigega cy’umutekano w’igihugu (“Comité Provisoire du Fonds de Défense Nationale – FDN”), ayibera umuyobozi, ndetse anaba umuyobozi wa komite nyobozi ya radiyo/televiziyo RTLM.

RTLM yahamagariraga abahutu kwica abatutsi. Urutonde rw’abanyamigabane b’ibanze b’iyi radiyo, rwariho abantu 1136, aho umugabane utagombaga kujya munsi y’amafaranga ibihumbi bitanu. Kabuga ni umwe mu banyamigabane b’iyi radiyo batanze amafaranga menshi mu ishingwa ryayo.

Mu bikorwa bindi bikomeye Kabuga yamenyekanyemo cyane harimo icyo kugura toni 581 z’imihoro yakoreshejwe muri Jenoside.

Muri Gashyantare 1994, umukozi wa sosiyete CHILLINGTON yemeje ko isosiyete yabo yari imaze kugurisha u Rwanda mu mezi make, imihoro myinshi iruta kure ubwinshi iyo bari baratumije mu mwaka wose wa 1993.

Impapuro zisaba impushya zo kuzana ibintu mu gihugu zasuzumwe na ‘Human Rights Watch’ hagati ya Mutarama 1993 na Werurwe 1994, zigaragaza ko toni 581 z’imihoro zinjijwe mu Rwanda.

Iyo mihoro yatumijwe yose hamwe ku giciro cya miriyoni 95 z’amafaranga y’u Rwanda, yatanzwe n’umunyemari Kabuga abinyujije muri Kompanyi ye yitwaga ETS.

Ese amafaranga Kabuga yari afite yayakuye he ?

Ikinyamakuru UKWEZI dukesha iyi nkuru cyageze mu gace kavukamo Kabuga ndetse kubw’amahirwe tuza kuhasanga bamwe mu bo mu muryango we barimo Katabarwa Martin uvuga ko ari umuvandimwe wa hafi wa Kabuga cyane ko bahuje Sekuru.

Mu kiganiro ikinyamakuru ukwezi dukesha iyi nkuru bagiranye na Katabarwa yabaviriye imuzi ibijyanye n’uko Kabuga yatangiye ibikorwa by’iterambere kugeza ubwo yaje kuba umuherwe uhambaye.

Yagize ati “Kabuga yakuze ari umwana kimwe n’abandi, yaje kuba umuhinzi n’utundi tuntu tw’ubucuruzi ariko mu Rwanda haza kuza ikintu cyo gukora forode abantu bakuraga mu Rwanda bajyana muri Uganda.”

Yakomeje agira ati : “Kabuga we yabanje kujya afata impu z’inka akazijyana I Kabare muri Uganda agakuramo amafaranga, bukeye haza kuza ikindi kintu cyo kugurisha ikawa, ubwo akajya za Kiramuruzi ajyanye igare kuzana ikawa, ubwo akazijyana muri Uganda.”

Uyu musaza Katabarwa uvuga ko afite imyaka isaga 90, ahamya ko yabyirutse imbere ya Kabuga, ariko ngo yamubonagamo umuntu ufite umutima wo gushakisha no gushabika cyane ko atigeze yicara adafite ibintu acuruza.

Katabarwa avuga ko Kabuga iyo aza kuba yarize yari kuba umuherwe cyane ko abantu babashaga gukora izo forode baranageze mu ishuri babashaga kujyana ibyo bintu mu bindi bihugu by’amahanga.

Ati “Ntabwo yize, yewe no kumenya gusoma no kwandika amaze kugera I Kigali, yaje gushyiraho umuntu wamwandikiraga akanamusomera ubundi akajya amwigisha gusoma no kwandika.”

Muri rusange uyu Katabarwa avuga ko Kabuga yacuruje imiti y’inka, impu, ikawa ndetse n’imyenda ya caguwa.

Ati “Caguwa imaze kuboneka, Kabuga yahise atangira kuyicuruza cyane, akajya akorera hariya iwabo.”


SANGIZA ABANDI IYI NKURU

LEAVE A REPLY

Please enter your comment!
Please enter your name here