Michael Jackson yararaga yambaye agakingirizo buri munsi

0
380
SANGIZA ABANDI IYI NKURU

Nyuma y’imyaka 11 ishize igihangange mu muziki wa Pop, Michael Jackson, yitabye Imana, hari bimwe mu byo benshi batazi byaranze ubuzima bwe, birimo impamvu yakundaga kwambara amapantalo y’umukara ndetse n’amasogisi y’umweru.

Uyu mugabo yitabye Imana ku wa 25 Kamena 2009, icyo gihe isi yose icika ururondogoro ndetse hari benshi bari banze kwemera ko aribyo koko gusa biza kuba impamo.

Yari inkuru y’urucantege ku bakunzi b’uyu muhanzi wamamaye cyane, akiharira igikundiro mu b’ingeri zose bakundaga umuziki we, wanyuraga benshi; byageraga ku ijwi rye n’uko yabyinaga.

Mu 2013, Dr Conrad Murray wari umuganga we bwite, yavuze impamvu yakundaga kwambara amapantalo y’umukara ndetse n’amasogisi y’umweru.

Ati “Nta rutangira yagiraga iyo yashakaga kwihagarika. Nafataga igitsina cya Michael Jackson buri joro. Nabaga ngomba kumwambika agakingirizo kugira ngo amashuka ye ataza kuyatosa. Ntabwo yari azi kukiyambika, rero nabaga ngomba kubimukorera.”

Yakomeje ati “Yahoraga yambaye amapantalo y’umukara kuko nyuma yo kujya mu bwiherero yabaga afite ibitonyanga by’inkari buri kanya. Ntabwo yabashaga kuba yabihagarika, yari afite uburwayi.”

Uyu muganga yanavuze ko uyu muhanzi impamvu yahoraga yambaye amasogisi y’umweru, byaterwaga n’uburwayi yari afite mu birenge bye bwitwa ‘agonising calluses & a fungal infection’, bwari bwaratumye biba nk’ibyaboze.

Mu gitabo uyu mugabo yashyize hanze mu 2016 yise ‘This Is It’, yagize ati “Ibirenge bye byari biriho ibisa nk’ibibyimba, byari byarangiritse. Nibyo byatumaga yambara amasogisi y’umweru kubera ko yaterwaga ipfunwe n’uko bigaragara.”

Yakomeje avuga ko nyuma yamushakiye inzobere mu kuvura ibirenge, akaza kumufasha ku buryo noneho hari igihe cyageze akajya agenda atababara ndetse akanabyina nta kibazo.

Ati “Natekereje ko akeneye inzobere mu kuvura ibirenge. Nyuma y’umunsi umwe avuwe, yari yishimiye ko ashobora kugenda akanabyina atababara. Nyuma nashatse indi miti yo gukuraho burundu indwara yari afite. Byarakunze.”

“Namushakiye amavuta yo kumusiga buri gihe kuri ibyo birenge nkanamukorera massage kugira ngo nkureho ibyatumaga ibirenge bye bigaragara nabi. Ibirenge bye ni ikintu cyibazwagaho.”

Inshuti za Michael Jackson za hafi zigeze kuvuga ko ijwi rye ryumvikanaga nk’aho ari rito, atari ko byari bimeze ahubwo mu buzima busanzwe yari afite ijwi riremereye.

Liza Minnelli na David Gest bari inshuti z’uyu muhanzi za hafi, bigeze kuvuga ko ijwi rye ryari rinini cyane. Mu 2002 David Gest mu kiganiro yagiranye na Larry King yaragize ati“ntekereza ko abantu batazi Michael Jackson wa nyawe. Ntavuga kuriya mumwumva.”

Liza Minnelli we yavuze ko Michael Jackson ijoro rimwe yigeze guhamagara umugabo we yafata telefoni akamukanga, kubera ijwi yamwumvanye icyo gihe, atari asanzwe amuziho.

Mu 2005, Diane Dimond wakoreraga Court TV, yigeze kuvuga ati “Iyo wamubwiraga amakuru mabi cyangwa ukamurakaza, ijwi rye ryahitaga riba rinini cyane.”

Isuzuma ryakorewe umurambo wa Michael Jackson ryagaragaje ko imiti yahabwaga ari yo yamuhitanye ndetse umuganga we akatirwa igifungo cy’imyaka ine. Dr Conrad Murray yahamijwe icyaha cy’ubwicanyi butagambiriwe afungwa igihe kituzuye neza imyaka ibiri muri ine yakatiwe.

Indirimbo zirenga ijana Michael Jackson yakoze zarakunzwe kandi n’ubu ziracyakunzwe, ibintu bimwambika ikamba ry’Umwami wa Pop.

Benshi bibuka Michael Jackson nk’umuhanzi n’umubyinnyi w’umuhanga n’umuhate we mu guharanira Isi nziza abinyujije mu ndirimbo ze zakunzwe nka “Heal the World”, “Will you be there” n’izindi.


SANGIZA ABANDI IYI NKURU

LEAVE A REPLY

Please enter your comment!
Please enter your name here