MINEDUC yashyize hanze amatariki icyiciro cya kabiri cy’abanyeshuri bo mu mashuri yisumbuye bazasubira ku masomo.

1
3657
SANGIZA ABANDI IYI NKURU

Minisiteri y’Uburezi (Mineduc) yatangaje gahunda ivuguruye izakurikizwa mu byumweru bibiri biri imbere ubwo icyiciro cya kabiri cy’abanyeshuri bo mu mashuri yisumbuye bazaba basubiye ku masomo.

Ingengabihe y’amasomo yatanzwe na Mineduc igaragaza ko kuwa 23 Ugushyingo 2020, hateganyijwe gusubukura amasomo abanyeshuri bari mu cyiciro cya kabiri. Ni ukuvuga abanyeshuri biga mu mwaka wa mbere, uwa kabiri n’uwa kane w’amashuri yisumbuye n’amashuri y’imyuga n’ubumenyingiro (TVET) mu cyiciro cya gatatu biga bacumbikirwa.

Mu rwego rwo korohereza abo banyeshuri kugera ku mashuri yabo, kuri uyu wa Gatanu tariki 6 Ugushyingo 2020 Mineduc yashyize hanze gahunda y’uburyo bazasubirayo.

Ku wa Kane, tariki ya 19 Ugushyingo 2020, hazagenda abanyeshuri biga mu bigo by’amashuri biri mu turere twa Huye, Gisagara mu Ntara y’Amajyepfo; Gakenke mu Ntara y’Amajyaruguru; Ngororero, Nyabihu mu Ntara y’Iburengerazuba na Bugesera mu Ntara y’Iburasirazuba.

Ku wa Gatanu, tariki ya 20 Ugushyingo 2020, hazagenda abanyeshuri biga mu bigo by’amashuri byo mu turere twa Nyarugenge, Gasabo na Kicukiro mu Mugi wa Kigali; Nyanza mu Ntara y’Amajyepfo; Musanze mu Ntara y’Amajyaruguru; Nyamasheke , Rusizi mu Ntara y’Iburengerazuba na Ngoma , Kirehe mu Ntara y’Iburasirazuba.

Ku wa Gatandatu, tariki ya 21 Ugushyingo 2020, hazagenda abanyeshuri biga mu bigo by’amashuri biri muri Ruhango, Nyamagabe na Nyaruguru mu Ntara y’Amajyepfo; Gicumbi na Rulindo mu Ntara y’Amajyaruguru; Karongi, Rutsiro mu Ntara y’Iburengerazuba na Rwamagana, Kayonza mu Ntara y’Iburasirazuba.

Ku Cyumweru, tariki ya 22 Ugushyingo 2020, hazagenda abanyeshuri biga mu bigo by’amashuri byo muri Muhanga, Kamonyi mu Ntara y’Amajyepfo; Burera mu Ntara y’Amajyaruguru; Rubavu mu Ntara y’Iburengerazuba na Gatsibo, Nyagatare mu Ntara y’Iburasirazuba.

Mineduc yasabye ababyeyi kubahiriza ingengabihe y’ingendo uko iteganyijwe, bohereza abana hakiri kare kugira ngo bagere ku mashuri yabo bitarenze saa kumi n’imwe z’umugoroba, kandi bambaye umwambaro w’ishuri. Basabwe kandi guha abana babo amafaranga y’urugendo azabageza ku mashuri bigaho no kwishyura amafaranga y’ishuri y’igihembwa cya kabiri.

Abanyeshuri basabwe gukomeza kubahiriza amabwiriza ajyanye no kwirinda icyorezo cya COVID-19 mu gihe cy’ingendo no ku mashuri harimo kwambara neza agapfukamunwa.

Nk’uko byakozwe ku cyiciro cya mbere, Mineduc yatangaje ko mu rwego rwo korohereza abanyeshuri mu ngendo, abahagurukira i Kigali n’abandi banyura i Kigali berekeza mu zindi Ntara, bazafatira imodoka kuri Stade i Nyamirambo zibajyana ku mashuri bigaho.


SANGIZA ABANDI IYI NKURU

1 COMMENT

LEAVE A REPLY

Please enter your comment!
Please enter your name here