MINEDUC yatangaje ibyo amashuri makuru na za Kaminuza bisabwa kugira ngo bifungurwe muri Nzeri.

0
1833
SANGIZA ABANDI IYI NKURU

Minisiteri y’Uburezi yamenyesheje amashuri makuru na za Kaminuza yose ko mbere y’uko yemererwa gufungura ibikorwa muri Nzeri, agomba kuba yerekanye gahunda ihamye y’umutungo wayo mu buryo burambye ku buryo azabasha kwita ku bakozi uko bikwiriye.

Tariki ya 15 Kanama ni yo tariki ntarengwa Kaminuza zahawe zigomba kuba zagaragarije iyo gahunda. Izajya igenzurwa na Minisiteri y’Uburezi hamwe n’Inama Nkuru y’Amashuri Makuru na Kaminuza, HEC, hanyuma iyo basanze idafite ubushobozi bwayibashisha gukora neza, ntiyemererwe gusubukura amasomo.

Ikibazo cy’amikoro ni kimwe mu bikomeje kubera imbogamizi amashuri makuru na za Kaminuza, byanatumye zimwe zifungwa. Hashize igihe gito Christian University of Rwanda ihagaritswe mu gihe kaminuza ya Kibungo, UNIK, nayo yafunzwe burundu.

Indangaburezi College of Education, nayo yambuwe uburenganzira bwo gukora nyuma yo kunanirwa kuzuza ibisabwa ngo ikore yemewe n’amategeko nka Kaminuza.

Minisiteri y’Uburezi yandikiye amashuri makuru na za kaminuza iyamenyesha ko asabwa kugena umutungo “uzashyigikira imikorere y’ikigo mu gihe amashuri azaba yongeye gufungura muri Nzeri 2020”.

Kaminuza izaba itagaragaje iyo gahunda ntizemererwa gufungura kugeza igihe izagaragariza gahunda y’uburyo bwo kwihaza mu bukungu mu buryo burambye ku buryo yatanga uburezi bufite ireme.

MINEDUC kandi yasabye kaminuza kwirinda kwirukana abakozi ahubwo zikifashisha ikigega cyashyizweho na guverinoma mu kuzahura ubukungu, zakamo amafaranga zakwifashisha mu kubitaho.

Hari ingamba ziteganywa na Minisiteri y’Uburezi zirimo ko mu gihe kiri imbere umuntu ugiye gufungura ishuri, usibye ibikoresho bisanzwe, azajya asabwa kwerekana ko afite ubushobozi bwo kwishyura abakozi nibura mu gihe cy’imyaka itatu.

Umuyobozi wa Kaminuza ya INES-Ruhengeri, Padiri Dr Hagenimana Fabien, atangaza ko bateganya gusubiza Minisiteri y’Uburezi berekana uko bashobora gukomeza gukora nubwo ubukungu bwahungabanye kubera Coronavirus.

Ati “Ntekereza ko badashaka kutubaza niba dufite amafaranga kuri konti ahubwo uburyo duteganya gukora tutagize ibibazo by’ubukungu bikabije. Turabyumva, ni uburenganzira bwabo kugira ngo banarinde abana n’ababyeyi bazana abanyeshuri.”

Umuyobozi wa ICK, Padiri Dr Ntivuguruzwa Barthazar, yavuze ko ubusanzwe iyi gahunda igaragaza aho amashuri makuru na za kaminuza zizakura amafaranga itajyaga isabwa, gusa ngo mbere y’uko umwaka w’amashuri utangira, wasangaga n’ubundi amashuri ateganya ingengo y’imari yo gukoresha.

Dr Ntivuguruzwa yavuze ko hari ikibazo cy’uko amashuri makuru na za kaminuza akenshi usanga apangira amafaranga azatangwa n’abanyeshuri, mu gihe mu myaka nk’ine ishize, byagiye bigaragara ko abanyeshuri bagabanuka.

Ati “Gusa hari ibintu byinshi bishobora kunganira icyo umuntu avana mu banyeshuri. Urugero nk’ubushakashatsi. Amashuri abushyizemo imbaraga, bugira icyo buvumbura, ariko hari n’ikintu umuntu ashobora kuvanamo, bugaheka abarimu n’abashakashatsi ishuri riba rifite ku buryo umuntu avanamo amafaranga aza kunganira ahemba abarimu n’abashakashatsi.”

Yavuze ko nko muri ICK, iyo umwarimu akoze ubushakashatsi, amafaranga avanyemo nk’igihembo, aba asabwa gutanga 30% ku ishuri.

Amashuri asabwa kandi guteganya aho abanyeshuri bashobora gukarabira, gutegura uburyo abanyeshuri basubira mu ngo zabo mu gihe haba hadutse icyorezo no gupanga uko basubukura amasomo yabo ariko bubahiriza amabwiriza ya Minisiteri y’Uburezi yo kwirinda ikwirakwira rya Coronavirus.

Dr Hagenimana uyobora INES-Ruhengeri yavuze ko kaminuza zikwiriye koroherezwa ku biciro by’amazi n’amashanyarazi.

Ati “Ibintu birebana n’amazi n’amashanyarazi turi mu biciro bibi, ku mazi mu gihe abo mu rugo bakoresha metero kibe nke bayabahera ku mafaranga 300, twe turi ku mafaranga arenga 800. None tugiye gukoresha amazi menshi, ku buryo urebye nabi n’ibyo byonyine byo kwirinda Coronavirus bishobora guhuhura kaminuza yari mu bibazo.

“Twakagombye gutekerezwaho, kuba kaminuza zishyura amafaranga menshi ku mazi n’amashanyarazi, biduca intege. Ni ukudushyira ku biciro byiza ku buryo imbaraga dukoresha bitaba nko kuduca intege.”

Umuyobozi w’Inama Nkuru y’Amashuri Makuru na za Kaminuza, HEC, Dr Mukankomeje Rose, aherutse gutangariza mu kiganiro Urubuga rw’Itangazamakuru ko ikibazo kaminuza nyinshi zifite gishingiye ku miyoborere mibi.

Yatanze urugero kuri Kaminuza ya Kibungo, avuga uburyo amafaranga yinjizaga yacunzwe nabi bigira ingaruka ku myigire n’imyigishirize y’abarimu.

Ati “Bagitangira bigishije neza, barakomeza ariko bigenda bigabanuka. Ubu bari bageze ku banyeshuri 800 kandi hari igihe bari bageze ku 1500 barenga. Aho ntabwo ari ikibazo cy’ubushobozi bw’abarimu.”

“Ireme ry’uburezi ryagiye rikendera kuko imiyoborere yabaye mibi, amafaranga agakoreshwa ibindi aho kugira ngo abe yajya mu bikwiriye.”

Iyi Kaminuza yafunzwe ifite igihombo cya miliyari 2.5 Frw, imaze amezi 18 itishyura abarimu byanatumye abenshi bigendera, yarambuye abarimu miliyoni 360 Frw bayigurije n’indi myenda yari ifitiye ibigo birimo RRA na RSSB.

Umuyobozi wa Kaminuza ya UTB akaba n’Umuyobozi w’Ihuriro ry’Abayobozi ba Kaminuza mu Rwanda, Dr. Callixte Kabera, avuga ko hari impamvu z’ingenzi zituma kaminuza zihura n’ibibazo, uhereye ku buryo zivuka.

Mbere y’uko kaminuza yemererwa gutangira ngo isabwa ibyangombwa birimo porogaramu zizigishwa n’ibikorwaremezo nk’aho gukorera, laboratwari n’ibindi, nyamara kwemererwa bigatwara igihe kinini.

Yakomeje ati “Ibyo rero iyo bitinze gutyo amafaranga umuntu aba yarateganyije, abo bashoramari bateganyije, usanga akoreshejwe. Ikindi cya kabiri, amakaminuza menshi iyo atangiye aba acungira ku mafaranga aturuka mu banyeshuri. Urebye rero ikiguzi cy’uburezi ubu ngubu uko kimeze, ukareba n’ibyo cyagasabye, mu by’ukuri za kaminuza zigenga zica amafaranga make ugereranyije n’ikiguzi cy’uburezi.”

Avuga ko bikwiye ko kaminuza zigenga zishyuza amafaranga yegereye aya kaminuza za leta, zigashyirirwaho igiciro fatizo nubwo hari igihe ubushobozi bw’abanyeshuri buba ikibazo. Gusa ngo baba bizeye gukora mu gihe kirekire, mu gihe ibibazo by’imiyoborere byaba bikemutse.

Yaba Umuyobozi wa ICK n’uwa INES-Ruhengeri, bahuriza ku kuba leta ikwiriye kwemerera abo yemereye guha inguzanyo yo kwiga kaminuza kuba bashobora no kwiyandikisha muri kaminuza zigenga aho kubategeka kujya mu za leta gusa.

Mu Rwanda hari Kaminuza n’amashuri makuru yigenga 24 yemerewe gukora mu gihe aya leta ari abiri.


SANGIZA ABANDI IYI NKURU

LEAVE A REPLY

Please enter your comment!
Please enter your name here