MINEDUC yijeje abarimu ko igiye kubashyiriraho isoko ryihariye rizaba rihendutse

2
14927
SANGIZA ABANDI IYI NKURU

Minisiteri y’Uburezi n’Ikigo gishinzwe Uburezi (REB) byagaragaje ko hari ibyifuzo bitandukanye abarimu bagiye batanga ngo imibereho yabo igende neza, bikiri kwigwaho birimo kugira iguriro ryabo ryihariye n’ibindi.

Byatangajwe kuwa 5 Ukwakira, ubwo hizihizwaga umunsi ngarukamwaka wahariwe mwarimu.

Kuri uyu munsi, abarimu bagaragaje imbogamizi bagihura nazo zirimo amikoro make aterwa no kuba umushahara bahabwa utabasha guhangana n’ibiciro biri ku masoko, no kuba koperative Umwalimu SACCO, idatanga inguzanyo ihagije, bigatumwa hari imishinga yagutse umwarimu atabasha gutangira.

Umuyobozi Mukuru wa REB, Dr Ndayambaje Irenée, yavuze ko hari gutekerezwa ku ishyirwaho ry’iguriro ry’abarimu n’izindi gahunda zigamije kunganira amikoro y’abarimu.

Yagize ati “Hari agaseke karimo ibyifuzo n’ibitekerezo bitandukanye, abarezi bakomeje gutanga mu bihe byatambutse. Muri byo harimo iguriro rya mwarimo rizaba ririmo iby’ibanze bikenerwa bizaba bihendutse, kandi rikazegerezwa abarimu hirya no hino mu gihugu.”

Yakomeje agira ati “Hari no kuba abana b’abarimu bazajya bafashwa mu mashuri. Hari kandi n’ibijyanye no kuvugurura umushahara w’abarimu ukajyana n’ibiciro biri ku masoko. Minisitiri w’Uburezi yavuze ko ibyo byose bizwi, bishatse kuvuga ko bizakomeza kuganirwaho n’inzego zinyuranye mu gihigu, kandi bigasubizwa.”

Minisitiri w’Uburezi, Dr Uwamariya Valentine, yijeje abarimu ubuvugizi, bihereye ku kongera amafaranga muri Koperative Umwalimu Sacco.

Yagize ati “Kuba wazamura umushahara kugeza aho umuntu yumva anyuzwe, biragoye kandi byafata igihe kini. Turi kubakorera ubuvugizi, ku buryo mu ngengo y’imari umwaka utaha ikigega cya SACCO cyazongerwamo amafaranga, kikabasha gufasha abarimu.”

Ku rundi ruhande ariko hari n’ibyakozwe mu rwego rwo kuvugurura umwuga w’ubwarimu mu Rwanda. Muri ibi harimo kuvugurura sitati igenga umwuga w’ubwarimu mu Rwanda aho hashyizweho ibyiciro bizajya bituma bazamurwa mu ntera mu kazi ndetse no mu mushahara ku buryo bizaha imbaraga abakiri bato bifuza gukora uyu mwuga.

Mu 2012 kandi nibwo Guverinoma y’u Rwanda yatangije gahunda yo kubakira abarimu amacumbi hagamijwe kugira ngo abakorera mu bice by’icyaro babone ahantu hiyubashye ho gucumbika kandi habereye mwarimu.

Mu bindi byakozwe harimo gahunda nka Girinka Mwalimu, kuborohereza kwiga, mudasobwa ku barimu n’ibindi.


SANGIZA ABANDI IYI NKURU

2 COMMENTS

LEAVE A REPLY

Please enter your comment!
Please enter your name here