Minisiteri y’Ubuzima yasobanuye ibyashingiweho mu gushyira ibice bimwe bya Kigali muri Guma mu Rugo

0
138
SANGIZA ABANDI IYI NKURU

Minisiteri y’Ubuzima yasobanuye ko gushyira imidugudu itandatu yo mu Mujyi wa Kigali mu Turere twa Kicukiro na Nyarugenge, muri guma mu rugo mu gihe cy’iminsi 15, byatewe n’uko kuva tariki ya 3 Kamena kugeza ku ya 24 Kamena, hari imidugudu ine yabonetsemo abarwayi ba Coronavirus bagera kuri 25.

Imidugudu yashyizwe muri Guma mu Rugo kuva kuri uyu wa Kane tariki 25 Kamena 2020, ni uwa Kamabuye, Akagari ka Nyarurama, Umurenge wa Kigarama muri Kicukiro, uwa Zuba, Akagari ka Nyarurama, Umurenge wa Kigarama muri Kicukiro, uwa Nyenyeri, Akagari ka Bwerankori, Umurenge wa Kigarama muri Kicukiro.

Hari kandi umudugudu wa Rugano, Akagari ka Kanunga, Umurenge wa Gikondo muri Kicukiro, uwa Kadobogo, Akagari ka Kigali, Umurenge wa Kigali muri Nyarugenge, n’uwa Gisenga, Akagari ka Kigali, Umurenge wa Kigali muri Nyarugenge.

Umunyamabanga wa Leta muri Minisiteri y’Ubuzima, Dr Mpunga Tharcisse, yabwiye Radiyo Rwanda ko mu bipimo bafite byo kuva ku itariki 3 Kamena kugeza tariki 24 Kamena, muri Kigali hagaragaye abantu 34 barwaye indwara ya Covid-19, muri abo 25 bose baturukaga mu midugudu ine yo muri Kicukiro na Nyarugenge.

Yagize ati “Ibi rero bigaragaza ko muri utu duce bishoboka ko iyi ndwara iri kugenda ikwirakwira mu baturage nk’uko byagiye bigaragara ahandi nka za Rusizi, akaba ari yo mpamvu izi ngamba zo gukumira ko indwara ikomeza gukwirakwira ahantu hatandukanye zashyizweho”.

Dr Mpunga yavuze ko gushyira imidugudu itandatu muri Guma mu Rugo, bigamije kugira ngo inzego z’ubuzima zishobore gupima abantu benshi bayituyemo, abarwayi bavurwe bityo indwara ntikomeze gukwirakwira n’ahandi hose mu gihugu.

Yakomeje avuga ko ubugenzuzi bakoze bwerekanye ko muri iriya midugudu harimo icyuho gikomeye cyane mu kubahiriza ingamba zo kwirinda Coronavirus, aho usanga abantu baragiye banduzanya hagati yabo, biciye cyane cyane mu guhererekanya amafaranga, mu kunywa inzoga ndetse n’abantu bakora ahantu hatandukanye nk’aho barimo kubaka.

Minisiteri y’Ubuzima ivuga ko hari impungenge z’uko iyi midugudu ishobora kwiyongera hakagira indi ishyirwa muri Guma mu Rugo, ikabwira abanyarwanda bose ko aho icyorezo kigeze bisaba ko buri wese ashyiramo imbaraga zidasanzwe mu kugikumira.

Minisitiri w’Ubutegetsi bw’Igihugu, Prof. Shyaka Anastase, yavuze ko gushyira iyi midugudu muri Guma mu Rugo bigamije kurinda abayirimo n’abari hanze yayo, asaba abaturage kumva ko atari igihano.

Ati “Byumvikane neza Guma mu Rugo si igihano, Guma mu Rugo ni uburinzi, ni ubutabazi, ni ineza y’abanyarwanda, ni ukugira ngo abantu twirinde iki cyorezo.”

Yasabye abashyizwe muri Guma mu Rugo kugira ikinyabupfura, ntibatangire kujya basurana urugo ku rundi ngo ni uko bari imbere mu mudugudu wagiye muri iyi gahunda.

Ibice by’iriya midugudu yashyizwe muri Guma mu Rugo birashyirwaho ibimenyetso byerekana ko abayirimo bagumamo imbere kugira ngo batagira aho bahurira n’abari hanze yayo.

Kuva umurwayi wa mbere wa Coronavirus agaragaye mu Rwanda, hamaze kuboneka abantu 850 banduye mu bipimo 126 284 bimaze gufatwa, 385 barayikize mu gihe 463 bakiri kwitabwaho n’abaganga; babiri barimo umushoferi w’imyaka 65 n’umupolisikazi nibo bitabye Imana.

src :Igihe


SANGIZA ABANDI IYI NKURU

LEAVE A REPLY

Please enter your comment!
Please enter your name here