Minisitiri w’Ubuzima Dr.Ngamije yakebuye abanyonzi bambara ingofero z’abafundi

0
231
SANGIZA ABANDI IYI NKURU

Minisitiri w’Ubuzima, Dr Daniel Ngamije, yakebuye abantu bakora akazi ko gutwara abantu n’ibintu ku magare bazwi nk’abanyonzi, bamaze iminsi bagaragara bambaye ingofero zagenewe kurinda abafundi impanuka igihe bari mu kazi aho kwambara izagenewe abatwara amagare.

Inama y’Abaminisitiri yateranye ku wa 25 Nzeri, mu myanzuro yafashe harimo n’uko abakora umwuga wo gutwara abantu ku magare basubukura ibikorwa byabo ariko buri wese yasabwe ‘kubahiriza amabwiriza y’inzego z’ubuzima ndetse no gukoresha ingofero zabugenewe (casque) kugira ngo birinde banarinda abo batwara ingaruka zaturuka ku mpanuka.’

Nyuma y’iki cyemezo abanyonzi batangiye kugaruka mu muhanda ariko abenshi bakagaragara bambaye ingofero zisanzwe zimenyerewe ku bafundi, ibintu byatumye abantu batangira kwibaza niba ingofero zagenewe abafundi zishobora no gukoreshwa ku magare.

Bamwe muri aba banyonzi bavuga ko bahisemo kwambara ingofero z’abafundi, kuko abayobozi babo bababwiye ko nta kibazo abandi bakavuga ko bazambara kubera kubura aho bagurira izabugenewe.

Abanyonzi bakorera mu Karere ka Musanze baganiye n’itangazamakuru bavuze ko bafashe umwanzuro wo kwambara ingofero z’abafundi nyuma yo kubaza abayobozi babo bakababwira ko ntakibazo.

Umwe muri aba banyonzi witwa Noheli Jean Baptiste yagize ati “Twabyutse mu gitondo kare kare dusanga Polisi mu muhanda n’abasekirite b’amagare, batwirukana mu muhanda bavuga ko udafite ingofero atemerewe kwinjira mu muhanda. Abayobozi bacu batubwira ko ingofero z’abafundi na zo zemewe ngo icyo bapfa ni ukubona ingofero”.

Uretse abavuga ko ingofero z’abafundi nazo zemewe abandi bavuze ko bazikoresha kubera kutamenya aho bagurira izabugenewe.

Charles Hategekimana aganira na The NewTimes yashimye guverinoma yafashe umwanzuro wo kubagarura mu muhanda ngo bakore ariko agaragaragaza ko bari guhura n’imbogamizi yo kumenya aho bakura ingofero zabugenewe.

Ati “Kugeza ubu ntituzi ubwoko bw’ingofero tugomba kugura, ibiciro byazo n’aho twazikura, ndakeka guverinoma ikwiye gutanga amakuru yisumbuyeho ajyanye n’aya mabwiriza mashya, bitagenze gutyo twaguma mu gihirahiro.”

Ubwo yari mu kiganiro yagiranye n’itangazamakuru ku wa 2 Ukwakira 2020, Minisitiri Dr Ngamije yagarutse kuri iki kibazo asaba abanyonzi kwirinda kwambara izi ngofero z’abafundi kuko zifite icyo zagenewe cyihariye.

Ati “Ingofero z’abafundi ntabwo ari kimwe n’ingofero z’abatwara amagare, n’uburyo ziteye buratandukanye, turi kubishyiramo ingufu ngo abanyonzi babone ingofero nziza zibarinda impanuka na COVID-19”.

Minisitiri w’Ubuzima yakomeje avuga ko iyi minisiteri n’iy’ubutegetsi bw’igihugu ziri gukorana n’amashyirahamwe y’abanyonzi hirya no hino mu gihugu, kugira ngo haboneke ingofero zabugenewe z’abanyonzi.

Ku rundi ruhande hari abandi banyonzi bagaragara batambaye izi ngofero wababaza impamvu bakavuga ko ari ikibazo cy’amikoro cyane ko bagarutse mu muhanda badaheruka gukorera amafaranga kandi bakaba nibura basabwa agera ku bihumbi 14 Frw kugira ngo bagure iyabo n’uy’umugenzi. Ku banyonzi barangije kugura ingofero z’abafundi basaba ko mu gihe izabugenewe zaboneka bahindurirwa badaciwe andi mafaranga


SANGIZA ABANDI IYI NKURU

LEAVE A REPLY

Please enter your comment!
Please enter your name here