Ngoma: Umusore w’imyaka 19 arashinjwa gufata ku ngufu umwana w’imyaka 8

0
218
SANGIZA ABANDI IYI NKURU

Umusore ufite imyaka 19 wo mu Murenge wa Gashanda mu Karere ka Ngoma ari gushakishwa n’inzego z’umutekano nyuma yaho aketsweho gusambanya umwana w’umukobwa ufite imyaka umunani.

Ibi byabaye ahagana saa Kumi zo kuri uyu wa Mbere tariki ya 3 Kanama 2020 mu Mudugudu wa Nyakarambo mu Kagari ka Mutsindo.

Umunyamabanga Nshingwabikorwa w’Umurenge wa Gashanda, Buhiga Josué, yabwiye IGIHE ko zimwe mu mpamvu bashingiraho bakeka uyu musore harimo kuba yari ari kumwe n’uyu mwana mu nzu bifungiranye nyuma akaza kuburirwa irengero.

Yagize ati “Bambwiye ko umwana yahamagawe n’uwo musore ngo agende amubwire, agezeyo amwambura imyenda aramusambanya umwana ataha arira abibwira abayeyi, nabo babigeza ku buyobozi. Umusore rero yahise acika aburirwa irengero na n’ubu turacyamushakisha, ibi rero nibyo dushingiraho tumukeka.”

Gitifu Buhiga yakomeje avuga ko kuri ubu kubufatanye n’inzego z’umutekano bari kumushakisha mu buryo bushoboka kugira ngo afatwe aryozwe ayo mahano niba koko yayakoze.

Ati “Ubu ntabwo twakwemeza ko yabikoze ariko dukurikije ukuntu yagiye kwihisha byatumye tumukeka, ahantu hose twahashyize abashinzwe umutekano ngo bamushakishe, abaturage nabo bari kudufasha.”

Umwana wasambanyijwe yajyanywe ku Bitaro Bikuru bya Ngoma kugira ngo asuzumwe ndetse yitabweho n’abaganga mu gihe uwo musore agishakishwa.


SANGIZA ABANDI IYI NKURU

LEAVE A REPLY

Please enter your comment!
Please enter your name here