Nyagatare: Umwana w’imyaka irindwi yishwe na gerenade

0
892
SANGIZA ABANDI IYI NKURU

Umwana w’imyaka irindwi wo mu Karere ka Nyagatare mu Murenge wa Rwimiyaga yaturikanywe n’igisasu cyo mu bwoko bwa ’Grenade’ yari ishaje arapfa. Ni nyuma yo kuyihondahonda aziko ari icyuma gisanzwe ngo akigurishe.

Ibi byabaye mu gitondo cyo kuri uyu wa Kane tariki ya 5 Kanama 2020 mu Mugudugu wa Rukundo mu Kagari ka Kacundezi mu Murenge wa Rwimiyaga.

Amakuru avuga ko uyu mwana yabonye ikintu cy’icyuma munsi y’urugo rw’iwabo agatangira kugicukura kugira ngo akijyane kukigurisha ku bantu bagura ibyuma, uko agihondahonda ni ko kumuturikana akomereka cyane mu mutwe no ku maguru bamujyana kwa muganga aba ari ho apfira.

Umuvugizi wa Polisi y’u Rwanda mu Ntara y’Iburasirazuba, CIP Twizeyimana Hamdun yabwiye IGIHE ko uwo mwana yakomeretse cyane ajyanwa kwa muganga nyuma aza gupfa.

Ati “ Ni umwana wagiye munsi y’urugo rw’iwabo ahabona ikintu agira ngo ni icyuma gisanzwe, arwana nacyo agicukura kugira ngo ajye kukigurisha, uko akomeza guhondahonda rero nibwo yagihonze gihita kimuturikana, yari wenyine.”

CIP Twizeyimana yasabye abaturage kwirinda guhondahonda ibintu by’ibyuma babona batazi neza.

Ati “Kariya gace ni agace kabereyemo intambara igihe kirekire, abantu bakwiriye kwirinda gucokoza ibintu by’ibyuma batazi ngo barimo barashakisha ibintu by’ibyuma byo kugurisha.”

Uyu mwana w’imyaka irindwi ngo yakomeretse cyane mu mutwe no ku maguru, akaba yahise ajyanwa ku kigo Nderabuzima cya Bugaragara ahita yoherezwa ku bitaro bya Nyagatare ari naho yaguye.


SANGIZA ABANDI IYI NKURU

LEAVE A REPLY

Please enter your comment!
Please enter your name here