PAC yagaragaje ko mashini za Positivo zateje leta igihombo

0
1183
SANGIZA ABANDI IYI NKURU

Abadepite bagize Komisiyo y’Inteko Ishinga amategeko ishinzwe gukurikirana ikoreshwa ry’umutungo n’imari by’igihugu, PAC, bagaragaje ko hari ibihombo leta imaze kugira bifitanye isano n’uruganda rwa Positivo ndetse ko bishobora kwiyongera, basaba inzego bireba kubikurikirana.

Kuri uyu wa Gatanu nibwo PAC yakiriye abayobozi b’Ikigo cy’Igihugu Gishinzwe Ikoranabuhanga (RISA), ngo bisobanure ku makosa yagaragajwe n’Umugenzuzi Mukuru w’Imari ya Leta, muri raporo y’umwaka wa 2018/2019.

Muri iyo raporo, Umugenzuzi Mukuru w’Imari hari aho yagaragaje ko mudasobwa 7246 zatanzwe n’uruganda rwa Positivo BGH zangirikiye mu bubiko, kugira ngo zongere gukora bisaba ko Ikigo cy’Igihugu cy’Uburezi (REB) kigenda kizisana gahoro gahora, ngo zibashe kwifashishwa mu mashuri azwi nka smart classrooms.

Depite Bakundufite Christine yavuze ko mu igenzura byagaragaye ko hari amasezerano Guverinoma y’u Rwanda yagiranye n’ikigo Africa Smart Investments-Distributions, ASI-D Ltd, ajyanye na mudasobwa 19483 za Positivo zagombaga gutangwa hirya no hino mu mashuri, zifite agaciro ka miliyari 3 na miliyoni 651 Frw.

Gusa mu igenzura ryaje gukorwa mu 2018, basanze hari imashini 7246 zifite agaciro ka miliyari 1 na miliyoni 253 Frw zapfuye zitarakoreshwa.

Umuyobozi Mukuru wa RISA, Innocent Muhizi, yasobanuye ko uruganda rwa Positivo BGH rumaze kujyaho, rwakoraga mudasobwa, leta ikishyura ikazikwirakwiza mu mashuri no mu bigo bya leta.

Ngo haje gutekerezwa uburyo ba rwiyemezamirimo bagira uruhare mu kuzikwirakwiza kugira ngo zigere ku banyarwanda benshi, ari nabwo buryo ASI – D Ltd yatangiyemo.

Mbere yo gukwirakwiza izo mashini mu mashuri, ASI – D ngo yafashe inguzanyo muri BRD nayo iyisaba ingwate, ihabwa ububiko bwarimo mudasobwa ibihumbi 19 ari nazo zaje kuvukaho ibihombo.

Muhizi ati “Byari mu rwego rwo kuzifata bakazicuruza, ku buryo harimo na gahunda yo kugira ngo bazagere abo batangira no kuzijyana hanze y’igihugu. Ariko hagiye habamo ibibazo byinshi, icya mbere cyari kijyanye n’umwimerere wa mudasobwa, ku buryo zagiye zitangira kugira ibibazo, bigatuma noneho abantu batazigura cyangwa se n’abazifashe kuzishyura bitoroha.”

“Icya kabiri, haje indi gahunda ya leta ibangikanye n’iyo nayo yatanze izindi mudasobwa mu mashuri, kandi mu by’ukuri na ASI-D ariho yacuruzaga hirya no hino, bityo bitera ikibazo kuri ASI-D kugira ngo ishobore gukomeza muri izo gahunda.”

Izo mashini ngo zatangwaga ku mwenda, abantu bakagenda bishyura mu byiciro, abo nibo batakomeje kwishyura uko bikwiye.”

Muhizi yavuze ko ASI – D yari yasinyanye amasezerano na leta mbere yo gutanga mudasobwa, irangije inaka inguzanyo muri BRD ya leta, ndetse no mu mpamvu zandindije icyo kigo leta irimo kuko yatangije gahunda yo gutanga mudasobwa ibangikanye n’iyari yakiwe inguzanyo.

Ati “Bivuga ngo uwo mwenda nubwo icyo kigo cyawufashe, leta yarawufashe nanone yishyura amafaranga yagombaga kwishyura Positivo. Uwo mwenda wagiye kuri ASI-D, ariko leta iravuga iti nimutange mudasobwa, umwenda muzagende muwishyura buhoro buhoro.”

Ni icyemezo cyafashwe na Minisiteri y’Imari n’igenamigambi yari ihagarariye leta ari nayo nyiri BDF yatanze inguzanyo ikanafatira ingwate ya mudasobwa ibihumbi 19, maze umwenda wo muri BRD bawukurirwaho muri banki, ariko byemezwa ko ayo mafaranga azishyurwa, RISA ikabikurikirana, za mudasobwa zari zarafashwe nk’ingwate nazo zirarekurwa.

Muhizi ati “Hakozwe amasezerano avuguruye avuga ko ASI -D yihaye gahunda, bumvikana amezi 30 kugira ngo igende yishyura buhoro buhoro ya mafaranga yari ibereyemo BRD. Umugenzuzi ubwo yazaga bari bamaze kwishyuraho amafaranga make, miliyoni 167 Frw.”

Byateganywaga ko bagomba kwishyura miliyoni 117.37 Frw buri kwezi uhereye muri Mutarama 2018, bikarangirana na Kamena 2020 amafaranga yose yarangiye uko yari miliyari 3.6 Frw.

Nyamara nyuma y’amezi 18, ni ukuvuga kugeza muri Kamena 2019, hari hamaze kwishyurwa miliyoni 167 zingana na 8%, aho kuba miliyari 2.1 Frw zagobaga kuba zimaze kwishyurwa.

Bwa bubiko bwa mudasobwa bwaje kurekurwa, ari abagenzuzi baza gusangamo mudasobwa ibihumbi 12 zikimeze neza zihabwa REB izikwirakwiza mu mashuri, hasigara mudasobwa 7246 basanze zifite ibibazo birimo batiri zarapfuye.

Muhizi yakomeje ati “Izo nazo zagiye zisanwa, ubungubu 1728 zarakozwe zitangwa mu mashuri, byumvikane ko zigenda zisanwa uko habonetse amafaranga yo kuzikoresha. 1024 zitegereje ko zibona amabatiri yatumijwe kugira ngo nazo zitangwe mu mashuri, hanyuma izindi 2028 zo tuzakora, ni nko gufata imwe ugafata ibice byayo, ugakoresha indi.”

Depite Jeanne d’Arc Uwimanimpaye, yabajije RISA uruhare REB yaba yaragize mu gutuma izo mudasobwa zipfa, ku buryo ariyo yashyizweho ikiguzi cyo kuzikoresha ngo izishyure, Muhizi asobanura ko ari uko byabaye inshingano ya leta.

Yakomeje ati “Ikibazo cyabayeho ni uko amasezerano leta yagiranye na rwiyemezamirimo ASI-D ariyo ataragenze neza, kandi mu by’ukuri wajya kureba ugasanga harimo gahunda bari bahawe yo gukwirakwiza mudasobwa, noneho leta nayo hari izindi irimo gukwirakwiza mu mashuri, ibyo ngibyo bigatuma batabona uko bakwirakwiza nabo mu mashuri.”

Depite Bakundufite Christine yabajije uburyo bamaranye mudasobwa igihe kirenga umwaka batarazigenzuye kugeza ubwo bazirebye bagasanga zitagikora, ntibinakorwe mu gihe cy’umwaka umwe watangwaga na Positivo.

Ati ”Iyi miliyari imwe na miliyoni magana ane ni amafaranga menshi cyane, iyo hatabaho uburangare Positivo yari kubaha imashini nzima. Aya mafaranga ni nde tuyabaza?”

Muhizi yavuze ko ahanini icyishe mudasobwa atari uko bazihawe zipfuye, ahubwo byatewe no kumara igihe kinini mu bubiko kuko hapfuye za batiri, kandi ngo barazigenzuraga.

Ati “Igenzura ryarakorwaga ariko ntabwo ryabaga ryimbitse ku buryo bwageza aho rigaragara ibibazo biri tekiniki birimo. Navuga ko ahanini byaterwaga no kutagira ibikoresho, igenzura twakoraga kwari ugufata imashini tukagenzura ko ikora neza, bakavuga ngo turabona imeze neza.”

“Ariko hari ibindi byinshi bijyanye n’imikorere yayo, bisaba ibikoresho byihariye na laboratwari mu by’ukuri mu Rwanda tudafite.”

Depite Uwimanimpaye Jeanne d’Arc yavuze ko bibabaje cyane kuba umushinga nk’uyu ukomeje guhombya leta akayabo.

Ati “Birababaje kumva ko Positivo tukiri kuyihombamo, kuva ku munsi wa mbere Positivo ni igihombo kuri leta, ngira ngo Isi irabizi uko byagenze. Birababaje ko na n’ubu ubwo turi kubisohokamo, tukiri kubihombamo.”

Umugenzuzi Mukuru w’Imari ya Leta, Obadiah Biraro, yavuze ko nubwo igihombo cyamaze kugaragaragara ku mashini zifite agaciro ka miliyari 1.3 Frw, hari impungenge ku myishyurire ya miliyari zisaga ebyiri zisigaye, kuko nazo ari umutungo wa Leta.

Ati “Hari ibishoboka ko BRD nayo izishyuza Minecofin miliyari 2 Frw, icya gatatu niba Minecofin na BRD barafunze amaso, aho nta gihe kizagera BRD igahomba miliyari 2 Frw, noneho kubera ko uwagombaga kubigenzura witwa Minecofin asa n’uwabibemereye?”

Yavuze ko ibi ari ibibazo bijyanye n’imicungire y’amasezerano, kandi bikomeje kugenda gutya byarushaho guhombya leta, ari nayo mpamvu bigomba gufatirwa imyanzuro.

Umuyobozi Mukuru wa RISA, Innocent Muhizi, yijeje ko bagomba gukora ibishoboka byose ku buryo “aya mafaranga arenga miliyari 2 Frw Leta itazayahomba, ari nayo mpamvu bari “gukora cyane kugira ngo yishyurwe na ASI-D.”

Gusa nta cyizere abadepite bagize kuko bijyanye n’igihe cyari gishize, nta bwishyu bufatika burimo kwinjira mu isanduku ya leta.

Depite Uwimanimpaye yongeyeho ati “Nari ngiye kubaza impamvu abahawe mudasobwa banze kwishyura, ariko dutange urugero nk’izo bahaye mu Nteko zipfuye, ubu bazabwira inteko ngo yishyure? Niyishyura umugenzuzi mukuru w’imari wa leta azabibara mu mafaranga yasesaguwe kuko baduhaye izindi mudasobwa!”

Yahise anabihuza na mudasobwa zihabwa abanyeshuri muri za kaminuza zitangirwa ku mafaranga asaga 500.000 Frw, ugasanga abazitunze benshi zarapfuye, ku buryo hari impungenge z’uko abanyeshuri bazishyuzwa mudasobwa zitabagiriye umumaro.

src:igihe.com


SANGIZA ABANDI IYI NKURU

LEAVE A REPLY

Please enter your comment!
Please enter your name here