Perezida Kagame yemeye irage ry’inzu n’ubutaka yahawe n’umubyeyi uherutse kwitaba Imana

0
399
SANGIZA ABANDI IYI NKURU

Perezida Kagame yemeye irage ry’inzu n’ubutaka yahawe n’umubyeyi uherutse kwitaba Imana

Perezida wa Repubulika y’u Rwanda, Paul Kagame yemeye irage ry’ubutaka n’inzu yahawe Intwaza Nyirangoragoza Marianne uherutse kwitaba Imana mu mwaka ushize.

Kuri uyu wa Kabiri tariki 24 Ugushyingo 2020, nibwo Umuyobozi w’Umuryango w’Abapfakazi ba Jenoside yakorewe Abatutsi (AVEGA) Mukabayire Valérie, yashyikirije Minisitiri muri Perezidansi, Uwizeye Judith, irage ryahawe Perezida Kagame.

Ni irage rigizwe n’ubutaka n’inzu biherereye mu Karere ka Nyamasheke mu Ntara y’Uburengerazuba ari naho habereye umuhango wo kwakira iri rage ryagenewe Umukuru w’Igihugu.

RBA dukesha iyi nkuru yatangaje ko Intwaza Nyirangoragoza witabye Imana muri Gicurasi 2019, yasize ageneye iri rage Perezida Kagame imbere y’umunyamategeko akaribitsa AVEGA.

Intwaza Nyirangoragoza yasize avuze ko impamvu yaraze Perezida Kagame ari uburyo yitaye ku mibereho ye nyuma y’ubuzima bubi yanyuzemo amaze kubura abana be 10 n’umugabo muri Jenoside yakorewe Abatutsi.

Ubutumwa bwanyujijwe ku rukuta rwa Twitter rwa AVEGA, buvuga ko uyu Mukecuru mbere y’uko atabaruka yavuze ko “Nyakubahwa Perezida wa Repubulika Paul Kagame yaranyubakiye ampa agaciro bene wacu batampaye, agerekaho no kumpa amafaranga y’ingoboka yantunze igihe cyose nabayeho nyuma ya Jenoside yakorewe Abatutsi”

Yakomeje avuga ko “Yandinze gusaba abatari kunyumva abonye maze gusaza, anzana aho abandi bari [mu Impinganzima] ngo ntazicwa n’irungu. Ni we wampaye amasaziro meza nk’uko abana banjye bari kubigenza. Ni we ngomba kuraga ibyanjye.”

Minisitiri Uwizeye yavuze ko uwarazwe ari we Mukuru y’Igihugu yemeye iri rage kandi ko ubu butaka azabushyiraho igikorwa rusange kizagirira inyungu abaturage bahaturiye.

Umuyobozi wa AVEGA, Mukabayire Valérie yashyikirije Minisitiri irage rya Perezida Kagame 


SANGIZA ABANDI IYI NKURU

LEAVE A REPLY

Please enter your comment!
Please enter your name here