Perezida Macron yarubiye nyuma yo kubwirwa na Erdogan ko akeneye ubuvuzi bwo mu mutwe

0
165
SANGIZA ABANDI IYI NKURU

Perezida w’u Bufaransa Emmanuel Macron nyuma yo kubwirwa na mugenzi wa Turikiya, Recep Tayyip Erdogan ko akeneye ubuvuzi bwo mu mutwe yahise afata umwanzuro wo guhamagaza ambasaderi we muri iki gihugu ngo asubire i Paris.

Nyuma y’uko mu Bufaransa umwarimu yishwe kubera kwerekana ibishushanyo by’intumwa y’Imana Muhammad mu ishuri, Perezida w’iki gihugu Emmanuel Macron yakunze kumvikana avuga ko ‘badateze kuzacika ku bishushanyo byabo’ ndetse yamaganira kure abakoze ubu bwicanyi.

Ibi bikorwa bya Macron ntibyishimiwe na mugenzi we Erdogan utabasha kwiyumvisha ‘neza icyo ngo uyu mugabo ashaka kuri Isilamu’.

Ati “Ni ikihe kibazo cy’uyu muntu witwa Macron na Isilamu n’Abayisilamu, Macron akeneye ubuvuzi bwo mu mutwe. Ni iki kindi cyabwirwa umukuru w’igihugu utumva ubwisanzure mu myemerere kandi akitwara gutya ku baturage b’igihugu cye babarirwa muri za miliyoni bari mu myemerere itandukanye.”

Ibiro by’Umukuru w’Igihugu mu Bufaransa byabwiye AFP ko bitanejejwe n’iyi mvugo ya Erdogan binemeza ko ariyo yabaye intandaro yo guhamagazwa kwa Ambasaderi w’u Bufaransa muri Turikiya.

Byagize biti “Amagambo ya Perezida Erdogan si ayo kwihanganirwa. Kurengera n’ikinyabupfura gike sibwo buryo. Turasaba Erdogan guhindura ingamba ze kuko ziteje inkeke muri buri ruhande.”

Erdogan asanzwe abarizwa mu idini rya Islam ndetse kuva ishyaka rye ryajya ku butegetsi mu 2002 akaba atarahwemye kugaragaza ko atakira umuntu uvuga nabi iri dini.

Si ubwa mbere mu Bufaransa hagabwa igitero cy’abiyahuzi bitewe no gushushanya intumwa y’Imana Muhammad dore ko mu 2015 ikinyamakuru Charlie Hebdo cyagabweho igitero kubera impamvu nk’iyi.


SANGIZA ABANDI IYI NKURU

LEAVE A REPLY

Please enter your comment!
Please enter your name here