Rayon Sports yasinyishije Olivier Kwizera na Issa Bigirimana

0
508
SANGIZA ABANDI IYI NKURU

Kuri uyu wa Gatatu, Rayon Sports yasinyishije rutahizamu Issa Bigirimana uheruka gutandukana na Police FC, ku masezerano y’umwaka umwe.

Bigirimana Issa yatandukanye na Police FC nyuma y’uko itamwongereye amasezerano ku mpera y’amezi atandatu yari yamvikanye nayo muri Mutarama.

Nyuma y’ibiganiro byari bimaze iminsi hagati y’impande zombi, Issa Bigirimana yasinye umwaka umwe muri Rayon Sports.

Bivugwa ko mu ngingo zikubiye mu masezerano y’impande zombi harimo ko nta mafaranga yo kugurwa Rayon Sports yahaye Bigirimana, ariko niharamuka habonetse ikipe imushaka, azahita agenda.

Bigirimana Issa wavukiye mu Burundi, yageze mu Rwanda mu mwaka w’imikino wa 2014/15, aje gukinira APR FC.

Izina rye ryazamutse cyane mu 2017 ubwo yatsindaga Rayon Sports ibitego bitatu mu mikino ine yikurikiranya ndetse yavuye muri APR FC muri Kamena 2019, amaze gutsinda abakeba ibitego bitanu mu mikino 12.

Nyuma yo gutandukana na APR FC, Issa Bigirimana yaguzwe na Yanga SC yo muri Tanzania, ariko asezererwa nyuma y’amezi atanu kubera umusaruro muke.

Rayon Sports yasinyishije kandi umunyezamu Kwizera Olivier

Ku gicamunsi cy’uyu wa Gatatu kandi, Rayon Sports yasinyishije umunyezamu Kwizera Olivier nubwo ubuyobozi bwa Gasogi United buvuga ko ari umukinnyi wabwo.

Kwizera Olivier yasinye umwaka umwe nk’umusimbura wa Kimenyi Yves werekeje muri Kiyovu Sports.

Uyu munyezamu wazamukiye muri Isonga FC, akayikinira hagati ya 2011 na 2013, yamenyekanye cyane ubwo yakiniraga APR FC hagati ya 2013 na 2016.

Nyuma yo kurekurwa n’Ikipe y’Ingabo mu 2016, yakiniye Bugesera FC umwaka umwe, yerekeza muri Free State Stars yo muri Afurika y’Epfo mu 2017, ayikinira kugeza mu ntangiriro za 2019.

Mu 2015 ni bwo yatangiye guhamagarwa mu Ikipe y’Igihugu Nkuru ‘Amavubi’.

Rayon Sports yaherukaga gusinyisha Umurundi Nihoreho Arsène, Umunya-Togo Alex Harlley wakinaga mu cyiciro cya kane muri Leta Zunze Ubumwe za Amerika, Niyonkuru Sadjati wakiniraga Marines FC, Uwiringiyimana Christophe wakiniraga Gicumbi FC n’abandi bakinnyi 10 bakiri bato bazamuwe, ubuyobozi buvuga ko bazatizwa andi makipe.

Hakizimana Muhadjiri na Niziyigiyimana Karim ‘Makenzi’ badafite amakipe, umunyezamu Kwizera Olivier, Rukundo Denis ukinira Police FC yo muri Uganda na Muhoza Trèsor ukinira Musanze FC ni abandi bakinnyi Rayon Sports yagaragarije ko yifuza ko bazayikinira mu mwaka utaha.

Issa Bigirimana nta kipe yarafite
Umunyezamu Kwizera Olivier na we yasinyiye Rayon Sports nubwo Gasogi United ivuga ko akiri umukinnyi wayo

Src:Igihe


SANGIZA ABANDI IYI NKURU

LEAVE A REPLY

Please enter your comment!
Please enter your name here