Rubavu: Hafashwe uwibaga abaturage akoresheje imbunda y’igikinisho

0
158
SANGIZA ABANDI IYI NKURU

Ku bufatanye bw’abaturage n’inzego z’umutekano umusore w’imyaka 25 yafatanywe imbunda y’igikinisho yakoreshaga yiba abaturage, abambura anabahohotera.

Uyu musore wari wambaye ipantalo ya gisirikare, yafashwe nyuma y’iminsi ashakishwa kuko abaturage bari barabimenyesheje ubuyobozi ko hari umuntu ubiba akoresheje imbunda.

Yafatiwe mu Mudugudu w’Isangano mu Kagari ka Rukoko mu masaha ya saa Tanu, kuri iki Cyumweru.

Amakuru yamenyekanye ni uko uyu musore yakoreraga akazi ko kuragira ingurube muri aka gace, akaza kwiba agatoroka ari nabwo ngo yatangiye kujya atega abaturage akabambura.

Umuvugizi w’Umusigire wa RIB, Dr. Murangira B. Thierry, yavuze ko uwafashwe akurikiranyweho kwiha ububasha ku mirimo itari iye no kwambara umwambaro utagenewe ugamije uburiganya.

Ati “RIB imukurikiranyeho icyaha cyo kwiha ububasha ku mirimo itari iyawe no kwambara umwambaro utagenewe ugamije kwiba ibya rubanda, ubwo yafatwaga akaba yari afite ikintu gikoze nk’imbunda yakoze mu giti yakoreshaga akangisha abantu agamije kwambura abambutsa ibintu bivuye muri Congo. Ubu afungiye kuri Sitasiyo ya RIB ya Gisenyi kandi iperereza riracyakomeje.’’

Ingingo ya 279 y’itegeko Nº68/2018 ryo ku wa 30/08/2018 riteganya ibyaha n’ibihano muri rusange ivuga ko kwiha ububasha ku mirimo itari iyawe no kwambara umwambaro utagenewe ugamije kuyobya rubanda, umuntu wese utabigenewe, wivanga mu mirimo y’ubutegetsi ya gisivili cyangwa iya gisirikare cyangwa wiha gukora umwe muri iyo mirimo, wiyita umukozi wa Leta atari we cyangwa wambara ku mugaragaro umwambaro w’ubutegetsi, umwambaro uhuriweho n’abahuje umurimo, urwibutso cyangwa ikimenyetso, agambiriye kuyobya rubanda, aba akoze icyaha.

Iyo abihamijwe n’urukiko, ahanishwa igifungo kitari munsi y’imyaka ibiri ariko kitarenze imyaka itatu n’ihazabu y’amafaranga y’u Rwanda atari munsi y’ibihumbi 300 Frw ariko atarenze ibihumbi 500 Frw.


SANGIZA ABANDI IYI NKURU

LEAVE A REPLY

Please enter your comment!
Please enter your name here