Rutahizamu Mohamed Salah wa Liverpool bamusanzemo Covid-19 ari kumwe n’ikipe y’igihugu cye cya Misiri.

0
35
SANGIZA ABANDI IYI NKURU

Ejo ku wa gatanu nibwo ishyirahamwe ry’umupira w’amaguru mu Misiri (EFA) ryatangaje ko ibizamini byafashwe Salah w’imyaka 28 byerekana ko yanduye Covid-19 ariko ko nta kimenyetso na kimwe cyayo agaragaza.

Nyuma EFA yongeyeho ko Salah yasuzumwe bwa kabiri, ibizamini bigashimangira ko afite Covid-19.

Mu itangazo ishyirahamwe EFA ryasohoye, ryagize riti: “Salah akomeje kwigiramo icyizere cyinshi kandi ntabwo agaragaza ikimenyetso na kimwe cy’iyi virusi”.

EFA yatangaje ko nta wundi muntu wo mu ikipe y’igihugu ya Misiri basanzemo Covid-19.

Kuri uyu wa gatandatu, Misiri irakira Togo mu mukino wo gushakisha itike yo gukina imikino y’igikombe cy’Afurika cy’ibihugu (CAN), ku wa kabiri iyi kipe ikinire muri Togo mu mukino wo kwishyura.

Ubu Salah agiye kwishyira mu kato ndetse birashoboka ko atazakina imikino ibiri ya Liverpool iri imbere.

Ku cyumweru ku itariki ya 22 y’uku kwezi kwa 11, Liverpool izakira Leicester, naho ku wa gatatu ku itariki 25 y’uku kwezi yakire Atalanta mu mukino wa Champions League.

Muri uyu mwaka w’imikino, Salah yagiye abanza mu kibuga mu mikino umunani yose ya Premier League Liverpool yakinnye, ayitsindira ibitego umunani.


SANGIZA ABANDI IYI NKURU

LEAVE A REPLY

Please enter your comment!
Please enter your name here