Sadate Munyakazi yaburiye KNC ko ashobora kumutwara undi mukinnyi, nyuma y’uko Gasogi ireze Rayon Sports muri FERWAFA

0
361
SANGIZA ABANDI IYI NKURU

Umuyobozi wa Rayon Sports, Munyakazi Sadate, yaburiye Gasogi United ko igomba kwihutisha ibijyanye no kugura Umunye-Congo Bola Lobota Emmanuel, kuko ikipe asanzwe akinamo ikimufiteho uburenganzira.

Mu kwezi gushize, Gasogi United yatangaje ko yasinyishije rutahizamu w’Umunye-Congo Bola Lobota Emmanuel wifuzwaga na Rayon Sports.

Ibi ntibyaciye intege ubuyobozi bwa Rayon Sports bwamenye ko Bola Lobota ataraba umukinnyi wa Gasogi United burundu, kuko nta rwandiko rumurekura iyi kipe irabona.

Ku wa Kane, Ubuyobozi bwa Gasogi United bwishinganishije muri FERWAFA, buvuga ko Rayon Sports ikomeje gutesha umutwe umukinnyi wayo Bola Lobota.

Bwagize buti “Tubabajwe n’imyitwarire idahwitse ya Rayon Sports iri kwinjira mu buzima bwite bw’ikipe yacu Gasogi United Football Club aho iri kugirana ibiganiro binyuranyije n’amategeko n’abakinnyi bacu igamije gusenya ikipe yacu.”

“Nyakubahwa dufashe uyu mwanya tubamenyesha umwe mu bakinnyi bacu ikipe ya Rayon Sports iri kuvugana na we bitemewe n’amategeko ko ari Umunye-Congo Bola Lobota Emmanuel wasinyiye ikipe ya Gasogi United Football Club amasezerano y’umwaka umwe. Ni muri urwo rwego tubandikiye tubamenyesha iyo myitwarire idahwitse ya Rayon Sports.”

Kuri uyu wa Gatanu, Munyakazi Sadate uyobora Rayon Sports, yaburiye Gasogi United ko igomba kwihutisha ibyo kugura uyu mukinnyi kuko kugeza ubu ataraba uwayo byemewe.

Mu butumwa yanditse ku rubuga rwa Twitter, Munyakazi yagize ati “Bola Lobota ni umukinnyi wa Maniema Union ya Kindu/RDC, nta kipe n’imwe abarizwamo mu Rwanda kuko nta “Transfert internationale’ yaribwamuzane mu rwa Gasabo.

Aho gushakira ibibazo muri Rayon Sports abumva ko ari uwabo bakwihutisha ibijyanye niyo Transfert, bagira amahirwe bakayibona.”

Rayon Sports iherutse gusinyisha umutoza Guy Bukasa watozaga Gasogi United, akaba ari na we wagize uruhare mu kugira ngo ahuze abakinnyi b’Abanye-Congo (Beya Beya Hervé na Bola Lobota) na Gasogi United.

Undi Munye-Congo wakiniraga Gasogi United, Manace Mutatu Mbedi, yasinye muri Rayon Sports imyaka itatu ku wa Mbere, atanzweho miliyoni 10 Frw.


SANGIZA ABANDI IYI NKURU

LEAVE A REPLY

Please enter your comment!
Please enter your name here