Shampiyona y’umupira w’amaguru mu Rwanda igiye kubona abaterankunga bashya

0
61
SANGIZA ABANDI IYI NKURU

Ishyirahamwe ry’Umupira w’Amaguru mu Rwanda (FERWAFA) ryizeye ko mbere y’umwaka utaha w’imikino wa 2020/21 utangira, rizaba ryamaze kurangizanya n’abaterankunga bashya; uruganda rwenga ibinyobwa rwa BRALIRWA ndetse n’Ikigo cy’Igihugu cy’Itangazamakuru (RBA).

Hashize umwaka umwe nta muterankunga Shampiyona y’Icyiciro cya Mbere mu Rwanda ifite nyuma yo gutandukana na Azam TV yerekanaga imikino mu myaka ine yabanje.

Muri uyu mwaka nibwo FERWAFA yatangiye kuganira n’uruganda rwenga ibinyobwa rwa BRALIRWA kugira ngo rutere inkunga Shampiyona ndetse na Televiziyo Rwanda (binyuze mu Kigo cy’Igihugu cy’Itangazamakuru RBA) izerekana imikino.

Havugwaga ko BRALIRWA ishaka kujya iha FERWAFA miliyoni 380 Frw ku mwaka, yo igasaba miliyoni 460 Frw, ariko Ishyirahamwe ry’Umupira w’Amaguru mu Rwanda ryateye utwatsi aya makuru.

Mu kiganiro yagiranye na IGIHE, Perezida wa FERWAFA; Rtd Brig Gen Sekamana Jean Damascène, yavuze ko bizeye ko aba baterankunga bombi bazemezwa mbere y’uko umwaka w’imikino wa 2019/20 utangira mu Ukwakira.

Ati “Ibyo byose biragenda, ni ibintu bisaba kunonosora uretse ko na COVID-19 ishobora kuba yarabikomye mu nkokora kubera ko guhura kenshi bisa n’ibyahagaze, ariko biri mu murongo. Biratanga icyizere.”

“Ni amasezerano tugomba kurebera hamwe n’abo tuganira, biri mu murongo, icyizere cy’uko bizakunda, bizakunda. Ndibaza ko tuzajya gutangira byararangiye mbere. Ntabwo navuga ngo bazatanga angana gute, ibyo ubyizera iyo umaze gusinya.”

Yakomeje avuga ko muri gahunda FERWAFA ifite harimo kongera gukundisha Abanyarwanda umupira wabo.

Ati “Buriya ikibazo dufite muri iyi football ni abantu bake ku bibuga, ni nabyo bituma ntacyo amakipe yacu ageraho kuko ashingiye kubyo yakuye ku kibuga. Impamvu turwana tujya mu byo kwerekana umupira ni ukugira ngo dukangurire abantu kugaruka ku bibuga kugira ngo bongere bakunde umupira, baze ku bibuga.”

“Abantu nibamara kumva bibarimo n’imipira bakayibona [kuri Televiziyo] bizatuma bagaruka no ku bibuga.”

BRALIRWA yaherukaga kuba umuterankunga wa Shampiyona y’u Rwanda mu mwaka w’imikino wa 2013/14, binyuze mu kinyobwa cya Turbo King, aho yashoragamo miliyoni 170 Frw ku mwaka.

Azam TV yaguze Shampiyona y’u Rwanda guhera mu 2015, ishoramo akabakaba miliyoni $2.35 mu gihe cy’imyaka itanu nubwo aya masezerano yamaze imyaka ine gusa.

Mu mwaka wa mbere, Azam TV yatanze ibihumbi $350 mu gihe mu yindi myaka, uyu muterankunga yatangaga ibihumbi $500 buri mwaka.


SANGIZA ABANDI IYI NKURU

LEAVE A REPLY

Please enter your comment!
Please enter your name here