Sobanukirwa imikorere n’ibyo utaruzi ku kinini gifatwa ngo wirinde gusama ako kanya.

0
274
SANGIZA ABANDI IYI NKURU

Ni mukiganiro Ubuzima n’imyororokere, Dr Anicet Nzabonimpa Impuguke mu buzima bw’imyororokere yagiranye na HDI Rwanda, ubwo yasobanuraga imikorere y’iki kinini gifatwa nyuma yo gukora imibonano mpuzabitsina idakingiye cyangwa mu gihe wayikoze ikingiye ukagira impanuka.

Dr anicet yagize ati: “Iyo umuntu ageze muri cya gihe cy’ubugimbi n’ubwangavu, uko amaraso ye aba yirukanka cyane, umubiri ukora cyane, hazamo n’imbaraga zituma ashaka gukora imibonano mpuzabitsina bitewe n’imisemburo umubiri uba urimo gukora”.

Nk’uko hatekerejwe rero gahunda zo kuboneza urubyaro ku bantu bakuru, abahanga banatekereje ku kinini umuntu yafata mu rwego rwo kwirinda gusama mu gihe yakoze imibonano mpuzabitsina idakingiye, cyangwa igihe uburyo yari yakoresheje bwangiritse. Aha ni nko mu gihe agakingirizo kacitse igihe wakoraga imibonano mpuzabitsina, kwibagiwe gufata ibinini birinda gusama cyangwa gukoreshwa imibonano mpuzabitsina ku gahato. Ni ikinini umuntu afata amaze gukora imibonano mpuzabitsina idakingiye.

Dr Anicet akomeza avuga ko hari ubwo ujya aho bagurira iki kinini, bakaba baguha ikinini kimwe cya mg 1.5 cyangwa bakaguha ibinini bibiri bagaragaza ko buri kimwe gifite mg 0.75. Baguha kimwe, baguha bibiri byose akamaro kabyo ni kamwe. Ni ukukurinda kuba wasama.

Ati: “biba byiza iyo wihutiye kugura kiriya kinini ukimara gukora imibonano mpuzabitsina idakingiye. Kugirango gikore neza, ugomba kukinywa mu gihe kitarenze iminsi itatu cyangwa amasaha 72 umaze gukora imibonano mpuzabitsina idakingiye”.

Abahanga batubiwra ko kiriya kinini umuntu agifata nyuma yo gukora imibonano mpuzabitsina ariko kare gashoboka kuko ni bwo gikora neza. Ni bwo kitakugiraho ingaruka nyinshi mu mubiri ndetse n’umubiri ni bwo ugikoresha neza.

Akenshi habaho impungenge niba umukobwa utarabyara afashe iki kinini bitamugiraho ingaruka ku buzima bwe.

Aha naho Dr Anicet yahasobanuye avuga ko nta mpungenge zikwiye kubaho. Umusemburo ugize iki kinini, ni ya misemburo iyobora ukwezi k’umugore cyangwa umukobwa kandi iyo wagifashe muri cya gihe gikwiye ntakibazo wagira.

Mu migurire y’iki kinini hagomba kubaho kuvugisha ukuri ku ukigura kuko mu gutanga imiti, abaganga bagendera ku bintu bibiri; imyaka n’ibiro by’umuntu. Hari ubwoko burenga 20 bw’ibinini birinda gusama ariko ibikunda gukoreshwa cyane ni iby’ubwoko bwa Norlevo bya mg 1.5. Iyo ugiye kugura iki kinini, biba byiza gusobanura neza ndetse ukanavugisha ukuri.

Uvuga ko ushaka cya kinini umuntu anywa amaze gukora imibonano mpuzabitsina kigatuma adasama. Ibi bituma umuntu ugiye kukiguha (Muganga) agitandukanya na bya binini bindi byo kuboneza urubyaro umuntu afata buri munsi.

Bimwe mu byo Dr Anicet Nzabonimpa yasobanuye mu mikorere y’iki kinini yavuze ko ikinini cyo gufasha umuntu kudasama akimara gukora imibonano mpuzabitsina idakingiye ntigikuramo inda. Icyo gifasha umuntu ni ukudasama ya nda. Ati: “Iyo abantu bakoze imibonano mpuzabitsina, umukobwa cyangwa umugore yakira intanga ngabo nyinshi cyane zijya kugera kuri miliyoni. Zikamuzamukamo mu nda ibyara, mu mura zigakomeza mu miyobora ntanga zishakisha uko zihure n’intanga ngore ngo zikore igi”.

Cya kinini rero gituma intanga z’umugore zidahura n’iz’umugabo. Kugira ngo zizahure zivemo umwana, n’uko intanga z’umugore zigomba guhura n’iz’umugabo kandi zirukanka cyane kuburyo iy’umugabo yinjira mu y’umugore bigakora igi. Iki kinini rero kizica intege ntibishobore guhura”.


SANGIZA ABANDI IYI NKURU

LEAVE A REPLY

Please enter your comment!
Please enter your name here