The Ben yasobanuye imikoranire ye n’umujyanama wa Bruce Melodie

0
190
SANGIZA ABANDI IYI NKURU

Ku mugoroba wo ku wa Kane tariki 20 Kanama 2020, Umuhanzi The Ben yasinye amasezerano y’imikoranire na Tecno Rwanda. Bemeranyije ko azahabwa miliyoni 42 z’amafaranga y’u Rwanda, na we akamamaza telefone nshya uru ruganda ruherutse gusohora ya Camon 15 Premier, mu gihe cy’umwaka.

Buri wese wari ahasinyiwe aya masezerano yabonye ko The Ben na Kabanda Jean de Dieu umujyanama wa Bruce Melodie, bafitanye imikoranire ya hafi.

Mu minsi ishize havuzwe amakuru yuko The Ben yaba yarasinye amasezerano mu nzu ifasha abahanzi ya Bruce Melodie.

Aya makuru, yaba The Ben cyangwa Bruce Melodie bayamaganiye kure bavuga ko ari ibihuha. Icyakora nyuma yayo hakomeje kugaragara imikoranire ye na Kabanda Jean de Dieu usanzwe areberera inyungu z’umuziki wa Bruce Melodie.

The Ben abajijwe imikoranire n’umujyanama wa Bruce Melodie yagize ati ”Abanzi neza bazi ko nasengeraga kwa Gitwaza muri Zion (Temple), niho namenyaniye na Jado, ni mbere wenda ataramenyana na Bruce Melodie. Ikindi ni umuturanyi wanjye, rero kuba twakorana nta kibazo rwose kuko turaganira cyane. abanzi neza bazi ko ndi umuntu w’abantu cyane.”

Uyu muhanzi yongeye gushimangira ko adashobora gusinya muri kompanyi ya Bruce Melodie, nubwo wenda hari uburyo bashobora gukorana, ariko ngo ibyavuzwe sibyo.

Icyakora yongeyeho ko abanye neza na Bruce Melodie, ndetse ahishura ko bamaze igihe kinini ari inshuti.

Akari ku mutima we nyuma yo gusinya amasezerano na Tecno yamuhesheje miliyoni 42 Frw

The Ben avuga ku cyo bivuze kuba abahanzi b’Abanyarwanda batangiye gusinya amasezerano ahenze, yagize ati ”Bivuze ikintu cyiza, umuziki wacu uri gutera imbere, ibigo bikomeye byatangiye kutwizerera. Ni ibintu twakoreye igihe kinini, ubu rero bitangiye kutwishyura.”

Ku kijyanye n’icyo amasezerano yasinye na Tecno ashobora gufasha umuziki we, yagize ati ”Tecno usibye amasezerano twasinyanye, turakorana, icyiza ni uko ibintu byose dukorana biganisha ku muziki. Urugero ni uko indirimbo nshya ngiye gusohora bamaze kuyishyiriraho irushanwa rizahemba uwa mbere ibihumbi 500 Frw.”

Uyu muhanzi avuga ko agiye gukora cyane, cyane ko yari amaze igihe acecetse.

Ni gute The Ben azakorana na Tecno Rwanda mu gihe asanzwe atuye muri Amerika?

Asubiza iki kibazo yagize ati ”Imikoranire y’iki gihe yabaye ikoranabuhanga, ahantu hose naba ndi nakora akazi, uretse ko nzaguma ngaruka mu rugo, aha ni iwacu.”

Nyuma yo gusinya amasezerano, The Ben yahise atangaza ko agiye gutangiza amarushanwa ku ndirimbo nshya yiteguye gusohora yise “Kola”.

Yakomeje ati “Indirimbo nimara gusohoka (mu masaha make ari imbere), abantu bazatangira guhatanira ibihembo ku bufatanye na Tecno.”

Kugira ngo umuntu ahatane bizasaba ko yifata amashusho ari kubyina iyi ndirimbo, akayashyira ku mbuga nkoranyambaga nka Tiktok, Instagram na Facebook.

Abazahatana bagomba gukora “Tag” kuri @TecnoMobileRW na @TheBen3 bagasaba abakunzi babo gukunda ibyo bakoze (Like), kubisangiza abandi (Share) no gutanga ibitekerezo (comment).

Iri rushanwa rizatangira tariki 22 Kanama 2020 kugeza tariki 12 Nzeri. Abanyempano 30 ba mbere bazatorwa kuva tariki 14 kugeza 19 Nzeri mu gihe 10 ba mbere bazatoranywa kuva tariki 21 kugeza 27 Nzeri. Ku wa 29 Nzeri 2020 nibwo hazamenyekana abatsinze.

Umuntu cyangwa itsinda rizaba irya mbere rizahabwa 500 000 Frw, uwa kabiri azahabwa telefone ya Camon 15 premier, uwa gatatu ahabwe Camon 15, uwa kane ahabwe Camon 15, uwa gatanu Camon15Air, uwa gatandatu azahabwa Camon 15 Air mu gihe guhera ku wa karindwi kugeza ku wa cumi bazahabwa ibindi bihembo bya Tecno.


SANGIZA ABANDI IYI NKURU

LEAVE A REPLY

Please enter your comment!
Please enter your name here