Trump yisubiyeho ati: ‘Uko nakabaye wese nshyigikiye udupfukamunwa’.Dore amagambo atangaje yari yarakoresheje mbere atwamagana

0
310
SANGIZA ABANDI IYI NKURU

Perezida Donald Trump wa Leta Zunze Ubumwe z’Amerika, wari umaze igihe arwanya ibyo kwambara agapfukamunwa ahahurirwa n’abantu benshi, ubu avuga ko “uko yakabaye wese” ashyigikiye kwambara udupfukamunwa. 

Bwana Trump yakomeje kuvuga ko bidacyenewe ko kwambara agapfukamunwa biba itegeko, nk’imwe mu ngamba yo kurwanya ikwirakwira ry’ubwandu bw’icyorezo cya coronavirus. 

Yongeye kuraguza umutwe avuga ko ubwandu “buzazimira”. 

Ni mu gihe Amerika yongeye guca undi muhigo wayo w’abanduye coronavirus benshi ku munsi – abantu 52,000 banduye ku munsi w’ejo ku wa gatatu.

Fox News nyuma y’umunsi umwe umunyapolitike wo ku rwego rwo hejuru wo mu ishyaka rye ry’abarepubulikani amusabye kwambara agapfukamunwa nk’uburyo bwo gutanga urugero rwiza ku Banyamerika. 

Kugeza ubu hafi abantu miliyoni 2,7 ni bo bamaze kwemezwa ko banduye coronavirus muri Amerika.

Muri bo abarenga 128,000 imaze kubica naho abarenga 729,000 barayikize, nkuko bigaragazwa n’imibare ya Kaminuza ya Johns Hopkins ikurikiranira hafi iki cyorezo. 

Ni iki nyirizina Trump yavuze? 

Mu kiganiro na televiziyo Fox News ejo ku wa gatatu, Bwana Trump yagize ati: “Uko nakabaye wese nshyigikiye udupfukamunwa”.

Abajijwe niba yakwambara agapfukamunwa, yasubije ati: “Mbaye ndi ahantu mu bucucike bw’abantu, nakambara rwose”. Yongeyeho ko no mu gihe gishize abantu bamubonye akambaye.

Bwana Trump yavuze ko “nta kibazo” byamutera kwambara agapfukamunwa mu ruhame ndetse ko “hari ukuntu akunda” uko agaragara iyo akambaye. 

Ariko Perezida Trump yongeye gushimangira ko adatekereza ko bicyenewe ko kwambara agapfukamunwa biba itegeko muri Amerika, kuko “hari ahantu henshi mu gihugu abantu basanzwe babayeho bahanye intera ndende cyane”. 

Ati: “Niba abantu bumva kabanogeye, bakwiye kukambara”. 

Muri icyo kiganiro, Bwana Trump yabajijwe niba acyemera ko coronavirus “izazimira” mu gihe kimwe kiri imbere. 

Arasubiza ati: “Ndacyabyemera. Ndacyabyemera. Yego, rwose. Igihe runaka”. 

Mu birori byo kwihiza umunsi w’ubwigenge bw’Amerika – yakolonijwe n’Ubwongereza – bizaba ejo ku itariki ya 3 y’uku kwa karindwi ku rwibutso rwa Mount Rushmore muri leta ya South Dakota, abashyigikiye Trump bazabyitabira ntibazahatirwa kwambara agapfukamunwa cyangwa guhana intera. 

Amerika yabonye ubwigenge ku itariki ya kane y’ukwa karindwi mu 1776. 

Trump yari yaravuze iki mbere yaho? 

Mu kwezi kwa kane, ubwo ikigo cy’Amerika cyo kurwanya no gukumira indwara cyatangiraga kugira inama abantu yo kwambara agapfukamunwa mu ruhame, Bwana Trump yabwiye abanyamakuru ko iyo nama we atazayikurikiza. 

Yagize ati: “Ntabwo ntekereza ko ibyo nzabikora”.

“Kwambara agapfukamunwa mu gihe nsuhuza abaperezida, ba minisitiri w’intebe, abanyagitugu, abami, abamikazi – ibyo rwose simbyiyumvisha”. 

Ariko Bwana Trump yakomeje gushimangira ko guhitamo gukurikiza inama y’inzego z’ubuvuzi ijyanye no kwambara agapfukamunwa ari icyemezo cy’umuntu ku giti cye. 

Mu kwezi gushize, yabwiye ikinyamakuru Wall Street Journal ko abantu bamwe bambara agapfukamunwa nk’uburyo bwa politike bwo kumurwanya. 

Mu kwezi kwa gatanu, ubwo yari yasuye uruganda muri leta ya Michigan, yabwiye abanyamakuru ko yakuyemo agapfukamunwa mbere yo kugera imbere ya za ‘cameras’ kuko “atashakaga ko abanyamakuru bashimishwa no kukabona”. 

Ibiro bye bya White House byashyigikiye amahitamo ye bivuga ko buri muntu wese ugira aho ahurira na we apimwa coronavirus kenshi, cyo kimwe na Bwana Trump ubwe. 

Ivanka Trump, umukobwa we akaba n’umujyanama mukuru we, na we yagiye agaragara mu ruhame yambaye agapfukamunwa. 

Ikusanyabitekerezo rya televiziyo ABC News n’ikigo Ipsos ryasanze ko mu cyumweru gishize Abanyamerika bagera kuri 89% bavuze ko bambaye agapfukamunwa hanze y’ingo zabo. 

Ubwo ni ubwiyongere bwa 20% ugereranyije no guhera hagati mu kwezi kwa kane.

Src:BBC


SANGIZA ABANDI IYI NKURU

LEAVE A REPLY

Please enter your comment!
Please enter your name here