Ubushakashatsi bwerekana ko kunywa inzoga mu rugero bifasha ubwonko gukora neza

0
146
SANGIZA ABANDI IYI NKURU

Kunywa inzoga cyangwa se agasembuye muri rusange bizwiho kugira ingaruka mbi ku mubiri w’umuntu n’imikorere y’ubwonko, ubushakashatsi butandukanye bugaragaza ko iyo umuntu afata ‘alcohol’ iri ku gipimo cyo hasi bifasha mu gikorwa cyo gusukura ubwonko ndetse no kuba bwarushaho gukora neza.

Ubusanzwe iyo abantu bakoze akazi kenshi kananiza ubwonko, abafata agasembuye bakunze kuvuga ko kabafasha kuruhuka. Ni byo, agasembuye kagufasha kuruhuka kuko gafasha ubwonko gukora neza, ariko igihe wafashe igipimo cyo hasi nturengere.

Umuyobozi w’Ishami ryita ku buvuzi bw’indwara z’ubwonko muri kaminuza ya Rochester Medical Center, Maiken Nedergaard, avuga ko “alcohol iri ku gipimo cyo hasi igira akamaro kanini ku mibereho myiza y’ubwonko”, aho yavuze ko yongera ubushobozi bw’ubwonko mu gusohora imyanda.

Iki gikorwa cyo gusukura ubwonko kizwi nka “glymphatic system” giheruka kuvumburwa na Maiken Nedergaard, afatanyije na bagenzi be mu 2012 ngo gikunze kubaho iyo umuntu asinziriye, aho bagaragaza ko indwara ya Stroke n’ihungabana zibangamira iki gikorwa, mu gihe gukora imyitozo ngororamubiri ari byo bifasha iki gikorwa kugenda neza.

Iyi ‘glymphatic system’ ibaho ubwo imisemburo izwi nka “cerebral spinal fluid (CSF) ica mu dutsi two mu bwonko ihasukura. Alcohol iri mu rugero ngo ituma CSF itembera neza muri utwo dutsi bigatuma isuku igenda neza.

Mu nyigo Maiken Nedergaard, yakoze igaragara mu kinyamakuru Scientific Reports, anagaragaza ko kunywa alcohol nkeya bigabanya uburibwe buturuka ku kuba umuntu yakomeretse cyangwa yanduye (infection); ndetse no guhanagura imyanda mu bwonko ishobora kuba yatera indwara yo kwibagirwa izwi nka Alzheimer.

Iyi nyigo yakorewe ku mbeba, yagaragaje ko izahabwaga alcohol nyinshi ku munsi zagize ibibazo byo kwibagirwa, gukora buhoro kw’ingingo z’umubiri na glymphatic system ntikorwe neza.

Izindi mbeba zahawe udukombe tubiri n’igice bya alcohol ku munsi, byagaragaye ko ingingo zibasha gukora neza kandi zikabasha kwibuka, ndetse na glymphatic system ya zo ikabasha gukora neza kurusha izitahawe alcohol.

Kuba alcohol iringaniye ifasha ubwonko gukora neza no kwibuka, urubuga rutangaza amakuru n’ubumenyi ku bwonko ‘BrainHQ.com’ rurabihamya mu nyigo rwise “Alcohol and the Brain.”

Ikinyamakuru Science Daily gisanzwe gitangaza amakuru y’ubushakashatsi butandukanye mu bya siyansi; mu nkuru cyatangaje kuwa 2 Gashyantare 2018, cyagaragaje ko inyigo zinyuranye zakomeje gushimangira ko “kunywa alcohol nkeya bigabanya n’ibyago byo kurwara indwara z’umutima na za canser.”

Ibi birahura n’ibigaragara muri raporo yakozwe na Havard Health Publishing kuwa 14 Nyakanga 2017; aho yagaragaje ko kunywa alcohol mu rugero bigabanya ibyago byo kurwara umutima n’imfu ziterwa n’izo ndwara; stroke ndetse n’ubundi burwayi buterwa no kuvura kw’amaraso kubera mu mitsi.

Ku rundi ruhande, mu nyigo ya Nedergaard avuga ko “iyo umuntu yimenyereje kunywa alcohol irengeje urugero, bigira ingaruka zinyuranye ku gice kigenzura imikorere y’ubwonko n’umubiri kizwi nka central nervous system.”

Ibi bigaragarira ku kuba yagira ikibazo cyo kwibagirwa bikabije no kuba yagaragaza imyitwarire idahwitse mu bandi. Ni ibintu ahurizaho n’urubuga BrainHQ.com ndetse n’ikinyamakuru Science Daily.

Ikigo gishinzwe kwita ku buzima mu Bwongereza (NHS) kivuga ko umuntu akwiye kunywa nibura alcohol itarenze mililitiro 140 mu gihe cy’icyumweru kugira ngo itamugiraho ingaruka mbi.


SANGIZA ABANDI IYI NKURU

LEAVE A REPLY

Please enter your comment!
Please enter your name here