Uko Kabuga yacitse FBI muri Kenya: Uruhare rwa Perezida Moi, uw’imyaka 17 watanze amakuru – byose byashyizwe hanze

0
196
SANGIZA ABANDI IYI NKURU

Itabwa muri yombi rya Félicien Kabuga, umwe mu bantu bashakishwaga mu mateka y’u Rwanda kurusha abandi, rimaze ibyumweru bitatu mu itangazamakuru, ariko umunsi ku wundi hahishurwa amakuru mashya mu buryo bumwe cyangwa ubundi. Inkuru iva imuzi uburyo yahigishijwe uruhindu muri Kenya ni indi igezweho – aho FBI yamushakishije mu myaka 17 ishize, gusa n’ubu hari byinshi bitarasobanuka.

-  Abanyamerika bahigaga Kabuga muri Kenya bavuze intambwe zose y’ibikorwa byabo

-  Impamvu Amerika yashagaka Kabuga cyane

-  Urupfu rwa Munuhe wari watanze amakuru y’aho Kabuga ari

-  Umwana w’imyaka 17 na we yatanze amakuru, ubu Amerika yaramuhungishije

Ubuzima bwa Kabuga mu bwihisho bwarangiye tariki ya 16 Gicurasi 2020, ubwo benshi bari bagisinziriye mu rukerera rwa saa 6:30, Polisi y’u Bufaransa yakoze umukwabu mu nyubako z’i Paris aho Kabuga yabaga yiyita Antoine Tounga.

Ubushinjacyaha ndetse n’inyandiko z’iperereza byose bigaragaza ko uyu mugabo ari umuterankunga mukuru wa Jenoside yakorewe Abatutsi, ndetse ko ibikorwa bye byakongeje intambara muri Congo, akaba yaranagize uruhare mu bwicanyi bw’Abanyamerika, Abongereza n’Abanya-Nouvelle-Zélande.

Mu myaka irenga 20, yabashije guca mu rihumye inzego mpuzamahanga zamushakishaga uruhindu. Gusa ubu byose byarangiye agejejwe imbere y’inkiko aho agomba kuburanishwa n’Inkiko za Loni.

Ifatwa rya Kabuga ryibutsa benshi ibindi bikorwa bikomeye byabayeho mu myaka myinshi ishize, aho kuryoza abantu ibyo bakoze byagize uruhare rukomeye mu Isi ya none, abantu bagahanirwa ibyaha byabo.

Operation Finale yo mu 1960 yibukwa na benshi, ubwo Urwego rw’Ubutasi muri Israel, Mossad, rwahigaga bukware Adolf Eichmann ufatwa nk’umuntu wari ku isonga mu migambi y’Aba-Nazi, waje gufatirwa ku mihanda y’i Buenos Aires muri Argentine, akagezwa imbere y’ubutabera i Jerusalem.

Biragoye kumva uburyo mu myaka ya 2000, umuntu nka Kabuga yashoboye guca mu rihumye inzego zishinzwe iperereza za Amerika, uburyo inzego nk’izi zikomeye ku Isi zacyuye umunyu, igikorwa cyazo ntigitange umusaruro.

Ku nshuro ya mbere abagize uruhare muri iyo misiyo bagize icyo bavuga, bahishura amabanga akomeye y’uburyo umugabo ushinjwa ubwicanyi wakoraga nk’umucuruzi w’umugiraneza yabaciye mu myanya y’intoki.

Iperereza ryakozwe na Vanity Fair niryo ryahishuye byose ku makuru y’uburyo Kabuga yanyuze mu rihumye abashinzwe umutekano muri Kenya. Danni ni izina ryahinduwe kubera impamvu z’umutekano, yari umwe mu Banya-Kenya bahaga amakuru Abanyamerika.

Ati ”Twari dukwiriye kuba twarafashe uyu mugabo mu myaka 17 ishize. Yateye ubwoba abantu benshi. Ndi umwe muri bo. Ariko kuva yarafashwe, singikebaguza.”

Amerika yinjiye ite mu mugambi wo guhiga Kabuga?

Mu 1994, Félicien Kabuga yari umwe mu bantu bakize mu Rwanda, ndetse yari umuntu wa hafi cyane w’inshuti ya Juvénal Habyarimana dore ko bari baranashyingiranye.

Ubushinjacyaha busobanura ko usibye kuba ariwe wari umuterankunga mukuru wa RTLM, yanaguze imihoro yifashishijwe mu kwica Abatutsi.

Ibyaha bya Kabuga ntibyarangiranye na Jenoside, Interahamwe zahungiye muri Congo hanyuma zibumbira mu mutwe wa gisirikare urimo ALIR (yaje guhinduka FDLR), wari unafite umutwe wa politiki witwa PALIR.

Kabuga yari ku ruhande aho, ashyigikira ibikorwa byayo ndetse atera n’inkunga mu buryo bw’amafaranga abarwanyi bashakaga kugaruka mu Rwanda ngo basoze umugambi wabo. Ibikorwa byabo byakuruye amakimbirane akomeye mu karere, haba mu Burasirazuba bwa Congo intambara yasize benshi iheruheru.

Ku wa 2 Werurwe 1999, abambari ba Kabuga bakoze ikosa rikomeye, batega abakerarugendo muri Pariki ya Bwindi muri Uganda. Baje kubashimuta, babakorera iyicarubozo ndetse bica Abongereza bane, Abanyamerika babiri n’Abanya- Nouvelle-Zélande babiri. Bamwe bari bamaze no gufatwa ku ngufu mbere y’uko bicwa.

Iki gikorwa cyatumye Amerika irakara bitabaho, ivuga ko ALIR-PALIR ari Umutwe w’Iterabwoba ndetse nyuma ishyira miliyoni eshanu z’amadolari ku muntu wese uzatanga amakuru ya Kabuga, kuko ariwe wari umuterankunga mukuru wawo.

Umuntu wateye iyi ntambwe yari Ambasaderi Pierre-Richard Prosper wari ufite mu nshingano ze ibijyanye no kurwanya ibyaha by’intambara ku butegetsi bwa George W. Bush.

Nyuma y’ifatwa rya Kabuga, Pierre-Richard Prosper, na we yagarutse kuri ibyo bihe aho yavuze ko nyuma y’icyo gikorwa cy’ubwicanyi, “Kabuga yakomeje gushyigikira ibikorwa by’ubwicanyi, gusenya n’iterabwoba. Yakomeje kuba ikibazo gikomeye ku mahoro n’umutekano.”

Pierre-Richard Prosper afite inkomoko ku mwimukira wo muri Haiti, yatangiye urugendo rwe nk’Umushinjacyaha i Los Angeles aho yakurikiranaga ibyaha by’ubugizi bwa nabi. Mu 1996 yoherejwe muri Afurika kugira ngo afashe mu Rukiko Mpuzamahanga Mpanabyaha rwashyiriweho u Rwanda, ICTR.

Yoherejwe kugira ngo abe Umushinjacyaha ndetse yanaburanye neza mu rubanza rwa Jean-Paul Akayesu, rwabaye urwa mbere ruburanishijwe ku byaha bya Jenoside.

Prosper yagize uruhare rukomeye mu kumvisha uru rukiko ko gufata ku ngufu bikwiye kwemezwa nk’igikorwa cya Jenoside n’icyaha cyibasira ikiremwamuntu.

Muri icyo gihe George W. Bush yamuhaga inshingano nka Ambasaderi ku bibazo bifitanye isano n’ibyaha by’intambara. Mu kwibuka uko byari bimeze icyo gihe, agira ati “Buri wese yari abirimo neza. Akanama gashinzwe Umutekano, FBI, CIA.

Kandi twari dushyigikiwe guhera kuri Perezida Bush, Condoleezza Rice (wari Umunyamabanga wa Leta ushinzwe Ububanyi n’Amahanga) na Colin Powell. Twakoze gahunda igaragaza uburyo bwo gukurikirana abakekwaho Jenoside. Kandi Kabuga yari umuntu wa mbere dushaka.”

Kumushaka byari kimwe ariko kumugeraho bikaba ikindi ari nacyo cyari ihurizo rikomeye. Inzego z’iperereza za Amerika hamwe n’abashinzwe iperereza muri ICTR batangiye gushakisha Kabuga mu Bubiligi, muri Congo, mu Bwongereza mu Bufaransa, mu Burundi, muri Kenya, Madagascar na Seychelles.

Kubera uburemere bw’uburyo Amerika yamushakaga, Ibiro bya Perezida, White House, byohereje Jendayi Frazer wari Umujyanama wihariye wa Perezida ndetse n’Umuyobozi w’ibikorwa bireba Afurika mu Kanama k’Umutekano, kugira ngo aherekeze Prosper muri Afurika.

Aba bagabo bokeje igitutu abayobozi ba Afurika kugira ngo batange Kabuga n’abandi bakekwaho uruhare muri Jenoside. Ndetse bajya ku mugaragaro batangaza ko Amerika ishyizeho igihembo cya miliyoni eshanu z’amadolari ku muntu uzatanga amakuru azaganisha ku gufata Kabuga, bamamaza mu itangazamakuru ritandukanye iyo gahunda ku buryo imenyekana.

Uko Abanyamerika batangiye ibikorwa byo gushaka Kabuga muri Kenya

F. Scott Gallo, wari Intumwa yihariye y’Urwego rushinzwe Umutekano muri Amerika, yageze muri Kenya muri Nzeri 2002 aho yagombaga gukora nk’ushinzwe ibikorwa by’umutekano mu karere.

Ambasade ya Amerika muri Kenya yari yoherejwemo, hari hashize imyaka ine igabweho igitero na Al-Qaeda cyaguyemo abantu 213. Byatumye kugeza icyo gihe abadipolomate ba Amerika n’abashinzwe ubutasi barakoreraga hanze yayo igihe kinini ndetse Gallo n’umugore we ntibari bakinjiye mu buzima neza ubwo yahamagarwaga ngo ajye guhura n’umukoresha we mushya, Johnnie Carson.

Carson yabaye Ambasaderi wa Leta Zunze Ubumwe za Amerika muri Kenya ku ngoma ya Clinton n’iya Bush. Ati “Nka Ambasade twari mu bikorwa byo gushaka kumenya mu buryo bwihuse abantu bakekwaho ibyaha by’intambara. Umwe mu bari ku isonga yari Félicien Kabuga. Byakekwaga ko agendagenda muri Afurika y’Uburasirazuba by’umwihariko i Nairobi.”

Carson avuga ko inshuro nyinshi yagejeje iki kibazo ku bayobozi ba Kenya, barimo na Perezida Daniel arap Moi.

Ati “Namuhaye amakuru menshi amugaragariza ko nzi neza ibyo mvuga. Moi agatsimbarara avuga ko Kabuga atari muri Kenya, ko badashobora kumuhisha.”

Kuri Amerika Kabuga ntiyari cyo kibazo cyonyine, ahubwo Amerika yari ihangayikishijwe no kubona Moi amaze imyaka 24 ku butegetsi ndetse Carson ni umwe mu bayobozi bakuru ba Amerika bakoze ibikorwa byo kumwumvisha ko akwiriye kuva ku butegetsi.

Byageze n’aho bategura urugendo kugira ngo azajye muri Amerika asure White House kugira ngo ajye mu isomero ryayo ku buryo byamufasha kubona amateka, na we agatangira gutekereza uburyo yakwandika amateka ye mashya.

Umunsi umwe muri Nzeri uwo mwaka, Gallo yibuka ko Carson yari ashishikajwe n’amakuru Ambasade yari yabonye y’umuntu wavugaga ko azi neza aho Kabuga aherereye n’uruhare rwa Guverinoma ya Kenya mu kumuhisha.

Inshingano zahise zijya mu biganza bya Gallo ku ishyirwaho rya gahunda igamije guhemba umuntu watanga amakuru yaganisha ku itabwa muri yombi rya Kabuga. Yahise yihutira gutegura inama n’uwo muntu wari watanze amakuru.

Uwo muntu yari William Munuhe wari ufite imyaka 27 icyo gihe akora akazi k’itangazamakuru ariko afite ibindi bikorwa bimwinjiriza ku ruhande yakoreraga umunyepolitiki Zakayo Cheruiyot wari ushinzwe Ibijyanye n’umutekano w’imbere mu gihugu ku bwa Moi.

Gallo ati “[Munuhe] yari umuntu wishimye kandi w’umunyabwenge.”

Zakayo Cheruiyot ni we wari ufite mu nshingano polisi ndetse n’inzego z’ubutasi. Ntabwo yari umuntu upfa kumenyerwa ariko Munuhe yari yarashituwe n’igihembo cya miliyoni eshanu z’amadolari. Hanyuma rero yicarana na Gallo amaso ku maso mu Mujyi wa Nairobi amubwira ibijyanye na Kabuga byose.

Munuhe yahishuye ko Cheruiyot yamujyanye we n’abandi bashinzwe umutekano ariko bari bambaye imyenda isanzwe, mu bikorwa byo kwimura Kabuga mu nzu yabagamo i Nairobi agashyirwa mu yindi.

Gallo ngo yumvaga ari inkuru idasanzwe y’uburyo umunyamakuru n’umuntu w’umunyabyaha ruharwa basangiriye ku meza amwe bari kureba televiziyo.

Gallo ati “Ndi kwibuka iyi nkuru. Ntabwo mfite amakuru ahagije, ndi kugenzura ibimenyetso akora, ndi kumureba mu maso ndetse n’ibiganza. Afite ubushake bwo gusubiza n’ibibazo bigoye. Hanyuma avuzemo Cheruiyot.”

Undi muntu wavuze aho Kabuga aherereye yari umunyeshuri w’imyaka 17

Mu kanya gato, Gallo yahawe uburenganzira na Ambasaderi Carson bwo guhamagara FBI i Washington abasaba kohereza imashini yifashishwa mu kugenzura ibyo umuntu avuga niba ari ukuri, kugira ngo arebe neza ibyo Munuhe yavuze. Mu gihe Ambasade yari iri muri gahunda zo kurangiza kugenzura ibyavuzwe na Munuhe, hahise haza undi muntu utanga amakuru.

Danni yari umunyeshuri w’imyaka 17. Umunsi umwe yari ari kugenda mu gace ka Lavington, hanyuma imodoka nyinshi zirinzwe zimunyuraho zinjira mu nzu yibuka neza. Yabonye umugabo wambaye amadarubindi n’ishati y’amabara agenda hagati y’imodoka ebyiri za guverinoma. Yabonye isura ayizi ariko ntiyamenya neza amazina ye.

Abashinzwe umutekano bahise bamwegera, bamwaka ikarita ye y’ishuri hanyuma bamubaza icyo ari gukora aho. Bamusabye kumushyira mu modoka kugira ngo bamusubize ku ishuri, Danni asubizanya ikinyabupfura abyanga.

Ati “Sinzi ikintu cyanjemo ko nagenda ubutagaruka”. Icyo gihe yafashe mu mutwe purake zose z’izo modoka ndetse na aderesi z’uwo muhanda.

Danni wari urajwe ishinga no gukurikirana neza amasomo ye ntabwo yigeze atekereza kuri iyo sanganya cyane. Ni mu gihe kuri we abifata nko kurokoka kuko abo bashinzwe umutekano bari batwaye ibyangombwa bwe, banamuburiye ko bazi neza aho bamusanga igihe bamushakira.

Hashize iminsi, Danni yaje kubona mu kinyamakuru itangazo ryatanzwe na Prosper na bagenzi be rivuga ku muntu ushakishwa ku ruhare rwe muri Jenoside. Uwo musore yatangiye guhuza iyo foto yabonye n’umugabo uri mu kigero cy’imyaka 60 yabonye. Umutima watangiye gutera niko kwirukira muri cybercafé yandikira email yari yarabonye umuntu yatangaho amakuru.

Ati “Nari mfite imyaka 17. Natekerezaga ko ndi gukora ikintu cyiza. Natekerezaga ko ntomboye. Ntabwo natekerezaga ko nishyize hagati y’ibibazo mpuzamahanga.”

Ku rundi ruhande, Ambasaderi Prosper i Washington nawe ntaryamye. Ati “Twahoraga turi intambwe imwe inyuma ye. Twashoboraga kubona amakuru y’inzu Kabuga abamo, hanyuma nyuma tukaza gushiduka yagiye. Yahoraga aburirwa.”

Mu buhamya bwe, yerekanye email ya Danni itanga amakuru kuri Kabuga, niko guhita ahamagara Gallo amumenyesha. Umukozi wa FBI icyo gihe yari mu rugendo ajyanye muri Kenya imashini ya polygraphe igenzura ukuri kw’ibyo umuntu avuga.

Isuzuma ryo kureba ukuri kw’amakuru yatanzwe ryakorewe mu nyubako zakoreragamo Ambasade hafi ya Pariki ya Nairobi. Gallo na Prosper bavuze ko batunguwe n’ibisubizo, FBI yanzura ko Danni na William Munuhe ibyo bavuga ko ari ukuri. Iza no gutahura ko Moi amaze igihe kinini abeshya abayobozi bo hejuru muri Amerika.

Gallo ati “Ikintu cyari kimpangayikishije icyo gihe ni uko Cheruiyot agenzura Polisi ya Kenya. Ndetse ko namenya ko William na Danni bari gukorana natwe, baza kuba bari mu bibazo.”

Bwana Gallo n’uwahaga amakuru Amerika wiswe Danni muri Iyi nkuru

Yagishije inama Prosper kuri telefoni na Ambasaderi Carson; William Brencick wari Umuyobozi wungirije muri Ambasade, Paul A. Hayes Jr wakoreraga FBI ashinzwe ibijyanye n’Amategeko ndetse n’Ubutasi.

Iri tsinda ryashyizeho amabwiriza ajyanye n’umutekano, harimo ko Gallo agomba buri gihe kujya yimura aba batangabuhamya aho batuye buri minsi itatu. Munuhe na Danni batari basanzwe baziranye, bahawe telefoni bazajya bavuganiraho n’Abanyamerika. Bari biteze ko bazahabwa igihembo mu gihe amakuru batanze yaba atanze umusaruro.

Ibikorwa byo guta muri yombi Kabuga muri Kenya byatangiye gushyuha umunsi ku wundi. Ku wa 28 Ugushyingo 2002, abantu bakorana na Al-Qaida baturikirije igisasu kuri Hotel yitwa Paradise hafi ya Mombasa. Abantu 13 barapfuye.

Mbere y’icyumweru, Moi yari yakiriwe muri White House, Perezida Bush amwakira neza cyane ndetse amurata ibigwi. Muri Ambasade muri Kenya ho akazi kari gatangiye kuba kenshi, kuko hahise hakorwa iperereza kuri icyo gitero no mu gihe bakomeje irijyanye n’abajenosideri.

Munuhe yaje gushimutwa

Hashize ibyumweru bike, Munuhe yaburiwe irengero aho yongeye kubonekera ahamagara Gallo amuha amakuru atari meza. Yamubwiye ko yashimuswe ari mu ijoro akuwe ku muhanda agashyirwa mu modoka akajyanwa ahantu agakubitwa bikomeye ndetse akihanangirizwa ko akwiye guhagarika kuvugana n’Abanyamerika ndetse ko “ubutaha bizaba bibi”.

Gallo avuga ko abo bantu “bari abantu William azi bakoreraga Cheruiyot ndetse bafashaga Kabuga kugenda hirya no hino muri Kenya.”

Munuhe ntabwo ariwe wenyine wari mu byago. Danni ati “Polisi ya Kenya yarambonye, barampamagara banshyira ahantu mu nzu iminsi myinshi. Natekereje ko bagiye kunyica, barankubise. Bashakaga kumenya icyo Ambasade ya Amerika izi. Bashakaga kumenya umubare w’abantu bari gukora kuri dosiye ya Kabuga, ni bande, batuye he?”

Danni yababwiye ko Ambasade ya Amerika ifite cassette ye avuga ko yabonye aho Kabuga aherereye ndetse ko izayishyira mu itangazamakuru mu gihe baramutse bamwishe. Ati “Nagombaga kuvuga ibishoboka byose kugira ngo bandeke.”

Muri Mutarama 2003, nyuma y’uko Munuhe ahohotewe, Gallo yahuye na we, amubona yarangiritse mu maso afite ibisebe n’inkovu. Ikintu cyatunguye izi ntasi za Amerika ni uko yari agishikajwe no kuba Kabuga yafatwa kugira ngo abone igihembo cye.

Munuhe yasobanuye ko abakozi ba Cheruiyot bamenye ibijyanye n’igihembo cy’amafaranga, ndetse ko bashaka nabo kuyaryaho. Ni ibintu byatunguye Gallo, uburyo abo bantu bari baherutse gushimuta Munuhe, none bakaba bashaka kumwiyungaho. Gusa na none ntabwo Abanyamerika batunguwe cyane kuko bari bazi neza gahunda y’Abanyakenya kuri Kabuga, gusa bemera ko bashyiraho igihembo mu gihe ibintu byagenda neza.

Gahunda yari yoroshye: Abo bantu ba Cheruiyot bagombaga kuzajyana Kabuga mu rugo rwa Munuhe kumusura, hanyuma yahagera Munuhe agahamagara Ambasade ya Amerika igahita ihagera igata muri yombi Kabuga.

Gallo ati “Naratekereje nti, ubu tugiye gufata uyu mugabo. Ni umuntu wazengurutse ibi bihugu byose nta guhanwa. Twaratekereje tuti, mwana, nitubigeraho, bizaba ari igitego kuri buri wese.”

Gallo hamwe n’abandi bashinzwe umutekano bakoranye n’Intumwa yihariye mu by’Umutekano, Hayes, n’umwungiriza we, bakora itsinda rigamije guta muri yombi Kabuga. Ni nkaho ibintu byose byari mu murongo, kuko hari abantu babiri batanze amakuru yizewe batakibigiramo uruhare bonyine ahubwo na raporo zitandukanye z’ubutasi zagaragaza ko Kabuga yakomeje ubucuruzi bwe afatanyije n’umuntu wa hafi wa Perezida Moi.

Prosper ati “Amafaranga menshi yaracicikanaga hagati y’umuntu ushakishwa cyane ku Isi n’umuryango wa Moi ndetse n’abayobozi bo hejuru bashinzwe umutekano muri Kenya.”

Mu nama ya nyuma yiga kuri uyu mugambi, umwe mu bayobozi ba Amerika yavuze ko yategetswe kumenyesha bagenzi babo ba Kenya iby’igikorwa cyo guta muri yombi Kabuga.

Gallo ngo yaratunguwe, ndetse yinginga uwo muntu ngo ntamenyeshe Abanyakenya, cyangwa se nubwo hagira ababimenya, bakaba atari abantu ba hafi ba Cheruiyot. Gallo yavuye mu nama afite icyizere ko Abanyakenya bazahera mu rungabangabo kugeza Kabuga afashwe.

Prosper ku ruhande rwe yibuka ko yibutsaga Ambasaderi Carson ko ibinyuranye n’ibyo byavamo urupfu.

Urupfu rwa Munuhe

Mu kwanga ko yabonwa n’inzego z’umutekano za Kenya, Gallo na Munuhe bagiranye inama yabanjirije igikorwa yabereye ahantu muri parking i Nairobi.

Gallo yaramubwiye ati “Ufite nimero yanjye. Igihe Kabuga araba ageze mu nzu yawe, umpamagare tuzaza tumufate’. Namuhaye andi mahirwe yo kubivamo, ariko avuga ko yashakaga kubikora.”

Yibuka Munuhe amubwira ko yaza gutegereza ikimenyetso cyo gutangira mu masaha 24 kugera kuri 48.

Kuri Ambasade Ikipe yo kumuta muri yombi yari iryamiye amajanja, Prosper nawe yagenzuriraga ibyabaga byose mu Biro bye i Washington.

Umunsi umwe warirenze n’undi urarangira nta makuru ya Munuhe. Mu gitondo cyakurikiye ku wa 17 Mutarama, ubwoba bwari bwazamutse maze Gallo washakaga ko ibintu bikomeza kuba ibanga, yerekeza mu rugo rwa Munuhe wenyine.

Ati “Mbona imodoka ye hanze ku ruhande rw’imbere. Ngenda nerekeza ku muryango nsanga rurafunze. Nta gisubizo. Ngerageza kurebera mu idirishya nabyo ntibyagira icyo bitanga. Ntangira gucyeka.”

Gallo yahamagaye Umunya-Kenya wakoraga muri Ambasade amusaba kohereza abapolisi, bamaze kuhagera Gallo mu buryo buteruye yarababwiye ati “murabona, hari umuntu nkorana nawe mu buryo bwa hafi. Mpangayikishijwe n’ubuzima bwe.”

Umwe mu Banyakenya arurira yinjira anyuze ku rubaraza rwa etaje ya kabiri, ubundi aramanuka aza gufungura umuryango w’imbere. Uruganiriro rwari rusandaguje, amafoto ya Munuhe n’umuryango we n’inshuti yari atondetse ku meza.

Ati “Tujya hejuru, mbona William ku buriri bwe aryamye agaramye. Umuvu w’amaraso wari wahinguranyije matora ugera hasi, uratemba kugera mu muryango w’icyumba cye.”

Gallo yitegereje inguma ziri muri nyiramivumbi ya Munuhe no kwishushanya kw’imigozi ku maboko n’inkokora ze – ikimenyetso kigaragaza ko yari yaboshywe ku gahato. Gusa Polisi yari iherekeje Gallo yitwaje indobo y’amakara yari aho hafi yanzura ko yapfuye azize uburozi bwa carbon monoxide.

Mbere y’uko polisi itwara umurambo, umukozi wa FBI yarahageze anafotora aho byabereye.

Ubwo Prosper yamenyaga urupfu rwa Munuhe, yagerageje guhumuriza Gallo, ati “Nk’uwahoze ari Umushinjacyaha, ndabizi uko kubura uwaguhaga amakuru bimera.”

Ntibari bafite umwanya wo kwibaza cyane gusa bahamyaga ko abantu ba Cheruiyot aribo bari inyuma y’ubu bwicanyi, ako kanya Abanyamerika bihutiye gukura Danni mu gihugu igitaraganya.

Gallo yashakaga ko FBI ikora isuzuma ry’umurambo wa Munuhe muri Kenya cyangwa muri Amerika ariko Abanyakenya bahari. Gusa ubu busabe bwombi bwateshejwe agaciro.

Abanya-kenya babwiye Gallo ko Ambasade ishoboraga kugira abayihagarariye aho, ariko ubwo abayobozi ba Amerika bahageraga ku gihe cyari cyateganyijwe, abaganga bakoraga isuzuma bari bamaze gufungura umutwe wa Munuhe.

Gallo ati “Byageze n’aho uwasuzumaga yageze mu mutwe imbere akurura igice cy’igufa ry’umutwe ariko agerageza kujya impaka ko yari imvune ya kera. Mu gihe hari ibizinga by’amaraso ku bwonko kandi byabagaragariraga neza ko ashobora kuba yakubiswe ikintu ku mutwe.”

Abanyakenya bakomeje kuvuga ko ari ukwiyahura kandi uko niko byarangiye.

Prosper na Gallo barakariye bikomeye inzego z’umutekano za Kenya ku bw’ibyo kuko byaragaragaraga ko arizo ziri inyuma y’urwo rupfu, aho bashimangira ko hari Umunyamerika waba waratanze amakuru ku Banyakenya.

Gusa Carson ntiyemeranya nabyo. Ati “ntabwo ntekereza ko hari amakuru yaba yarahawe Abanya-Kenya. Twari twitwararitse cyane ku byo kubasangiza, kuko hari Abanya-Kenya bari ku ruhande bafasha Kabuga.”

Icyo gihe Kabuga yarabuze, hanyuma Abanyamerika bashaka uburyo bwo kurinda Danni. Bamushakiye icyumba muri hotel bamurindiramo, nyuma abwirwa ko agiye kuvanwa mu gihugu. Yashyizwe mu modoka itamenwa n’amasasu hanyuma baramujyana.

Ati “Twahagaze ku nzu ya Gallo kugira ngo abe yampobera ansezera. Yambwiye ko yagerageje ibishoboka byose ariko ko ntacyo yari agishoboye gukora ku buryo naguma muri Kenya ntekanye. Ibigoryi byari bunyice.”

Ku kibuga cy’indege yari acungiwe umutekano kugeza yinjiye mu ndege. Yageze muri Leta Zunze Ubumwe za Amerika nyuma akomeza amasomo ye ubu yararangije afite akazi. Mu 2008 yabaye umuturage wa Amerika.

Hashize imyaka itatu Kabuga acitse muri Kenya, Umuyobozi wa Polisi ya Kenya yategetse ko habaho ikipe ishinzwe guperereza igahamya niba Kabuga yarigeze aba muri iki gihugu n’uwamukingiraga ikibaba.

Hashingiwe kuri raporo yabonywe na Vanity Fair imyanzuro ivugamo Zakayo Cheruiyot mu bikorwa byo gukingira ikibaba abanyabyaha. Ivuga ko urwego rw’igihugu rw’iperereza “rwakurikiranaga iki kibazo mu bwitonzi kuko bemeraga ko ari ikirego kirimo abantu bakomeye”.

Bategetse “kugenzura Cheruiyot bigomba kwiyongera kuko bishoboka cyane ko yaba afite amabanga ajyanye na Kabuga.

Vanity Fair yagerageje kuvugisha Cheruiyot, abajijwe ibijyanye n’inyandiko zimuhuza na Kabuga avuga ko nta n’imwe ndetse abigaragaza nk’ibidafite agaciro naho abajijwe ibijyanye na Munuhe ahita akupa telefoni.

Icyumba cyasanzwemo umurambo wa Munuhe

Isoko y’inkuru:Igihe


SANGIZA ABANDI IYI NKURU

LEAVE A REPLY

Please enter your comment!
Please enter your name here