Umugabo w’imyaka 51 yabaye umuntu wa 32 wishwe na Coronavirus mu Rwanda

0
1101
SANGIZA ABANDI IYI NKURU

Kuri uyu wa Mbere tariki ya 12 Ukwakira 2020,Minisiteri y’Ubuzima yatangaje ko Covid-19 yahitanye umugabo w’imyaka 51 wo mu mujyi wa Kigali, aba umuntu wa 32 uhitanwe n’iki cyorezo mu Rwanda.

Iyi Minisiteri yatangaje kandi ko abantu 09 barimoaba Nyagatare:8 (abatwara amakamyo) na Kayonza:1,basanzwemo COVID-19 mu bipimo 2,149 byafashwe, bituma umubare w’abamaze kwandura uba 4,905.

Uyu munsi kandi hakize abantu 271. Abamaze gukira bose hamwe ni 3,877.Abakirwaye: 996.

Abanyarwanda barasabwa kutirara ngo bumve ko icyorezo cyarangiye.Bagirwa inama yo gukomeza kubahiriza amabwiriza yashyizweho, bibuka kwambara agapfukamunwa n’amazuru buri gihe bavuye mu ngo, bakaraba intoki kenshi no kwirinda amakoraniro n’ibindi bintu byose bishobora guhuriza hamwe abantu benshi.

Umuntu ugaragaje ibimenyetso bya Coronavirus birimo inkorora, guhumeka nabi, gucika intege n’ibindi, agirwa inama yo guhamagara umurongo utishyurwa wa 114 kugira ngo ahabwe ubufasha n’abaganga.

Ikigo cy’Abanyamerika gikora Ubushakashatsi ku Buzima, National Institute of Health, cyagaragaje ko umuti wa Remdesivir usanzwe ukoreshwa mu kuvura COVID-19, ugabanya impfu z’abahitanwa n’iki cyorezo ku kigero cya 30% ugereranyije n’indi miti ikoreshwa mu kuvura abacyanduye.

Inzobere zakoze ubu bushakashatsi zagereranyije abarwayi ba Coronavirus bahabwa umuti ugabanya ubukana wa Remdesivir no kubahabwa uwitwa Placebo.

Ubushakashatsi bwagaragaje ko abahawe umuti wa Remdesivir bakize mu gihe kitarenze iminsi icumi ugereranyije n’abahabwa umuti wa Placebo bashobora gukira nyuma y’iminsi 15.

Remdesivir ifunga imisemburo ifasha Coronavirus kwiremamo uduce twinshi, uyu muti kandi utuma iyi virus itabasha gukwirakwira mu mubiri.

Umwe mu nzobere zari zigize itsinda ryakoze ubu bushakashatsi, Dr. John Beigel, yatangarije Daily Mail ko umuti wa Remdesivir ari wo ufasha abarwayi ba Coronavirus gukira byihuse.

Nk’uko ubushakashatsi bwabigaragaje mu barwayi bakiriwe bari ku rwego rwo kongererwa umwuka bahawe umuti wa Remdesivir babashije gukira mu minsi 15 mu gihe abahawe umuti wa Placebo bakize nyuma y’iminsi 21.

Ubu bushakasatsi bwagaragaje ko byibuze abarwayi 11% aribo bicwa na COVID-19 barahawe umuti wa Remdesivir mu gihe 15% aribo bapfa bavurwa hakoreshejwe Placebo. Ibi byagaragaje ko umuti wa Remdesivir ugabanya ikigero cyo gupfa ku ijanisha rya 30%.

Ubwo hakorwaga ubu bushakashatsi kandi byagaragaye ko uyu muti ushobora guhagarika virusi zo mu bwoko bwa SARS na MERS zose ziri mu muryango umwe na virusi ya Corona.

Kuri ubu Remdesivir ni wo muti uri kwifashishwa mu guhangana na COVID-19 muri Leta Zunze Ubumwe za Amerika.


SANGIZA ABANDI IYI NKURU

LEAVE A REPLY

Please enter your comment!
Please enter your name here