Umuhanzi Christopher mu bucuruzi bw’ubunyobwa

0
156
SANGIZA ABANDI IYI NKURU

Muneza Christopher, uzwi nka Christopher wubatse izina mu muziki mu Rwanda yatangiye ubucuruzi bw’ubunyobwa.

Uyu muhanzi yabwiye IGIHE dukesha iyi nkuru ko ari ibintu amaze igihe kinini atekereza ariko akaba yarabishyize mu ngiro mu mezi make ashize.

Ati “Ni ibintu ndi gukorana na mubyara wanjye. Igitekerezo cyabyo nakigize bitewe n’isambu nini y’umuryango dufite mu Mutara, twatekereje ubwo twayibyazamo umusaruro. Twamaze igihe kinini turi kubitekerezaho tureba ibintu bishobora kweramo.”

Yakomeje agira ati “Twabonye ari ubunyobwa. Twatangiye turi kubuhinga tuza no kugira igitekerezo cy’uko twabucuruza. Twasabye uburenganzira turabubona, hashize amezi make dukora. Ubunyobwa bwacu twabwise ‘Iwacu’, kuko twe twakoze ibintu byo mu gikoni. Dufite ubuseye n’ububisi.”

Yavuze ko kuba yinjiye mu bucuruzi bw’ubunyobwa bitazatuma adindira mu muziki we.

Ati “Hoya ntabwo bizabangamira umuziki wanjye, niyo mpamvu mba mfite abantu dukorana. Hari n’ibindi by’ubucuruzi muzagenda mubona. Icyatumye tubona igishoro ntabwo tuba tugomba kucyibagirwa. Nabonye amahirwe yo guhura n’abantu benshi kurusha mbere bakambwira ku muziki.”

Yavuze ko mu byumweru bibiri azashyira hanze indirimbo nshya yise ‘So good’. Yari aherutse gushyira hanze indirimbo yise ‘Ibanga’ yahuriyemo na Dj Zizou. Uyu muhanzi anamaze iminsi ahugiye mu gukora album ye nshya y’indirimbo 12.

Christopher yamamaye cyane mu ndirimbo nyinshi zitandukanye zirimo ‘Iri joro’, ‘Ndabyemeye’, ‘Byanze’, ‘Uwo munsi’, ‘Habona’, ‘Abasitari’ n’izindi nyinshi.

Christopher Muneza yavutse ku wa 30 Mutarama 1994. Ni uwa gatatu mu muryango w’abana batandatu. Yatangiye ibijyanye n’ubuhanzi yiga mu mwaka wa Gatatu mu mashuri abanza aho yaririmbaga muri korali y’abana nyuma aza no kwinjira mu y’abakuru. Yatangiye kuririmba ku giti cye mu 2009.

Yinjiye mu buhanzi by’umwuga nyuma y’aho atsinze mu irushanwa ryari yateguwe na Producer Clement wa Kina Music.

Mu 2013 yatowe mu bahanzi 11 bari mu irushanwa rya PGGSS III, nyuma y’aho yari amaze no gutorwa mu marushanwa yandi arimo Salax Awards 2011, mu cyiciro cya Best RnB Artist.


SANGIZA ABANDI IYI NKURU

LEAVE A REPLY

Please enter your comment!
Please enter your name here