Umuryango wa Rusesabagina wanze umwunganizi yitoranyirije, we ati “Sinzi icyo bashingiraho”

0
176
SANGIZA ABANDI IYI NKURU

Umuryango wa Paul Rusesabagina watangaje ko utemera umunyamategeko watoranyijwe n’uyu mugabo w’imyaka 66, kuko ngo abogamiye ku ruhande rw’u Rwanda, ugena abandi barindwi barimo umunyarwanda umwe nk’abagomba kumwunganira.

Me Rugaza David, ni umunyamategeko watoranyijwe na Paul Rusesabagina kugira ngo abe ariwe umwunganira. Ni nyuma yo guhabwa urutonde rw’abandi banyamategeko benshi, n’imyirondoro yabo, hanyuma akihitiramo umwe ku wundi, akagira n’umwanya wo kubaganiriza bose.

Kathryne Kurth, Umuvugizi w’Umuryango washinzwe na Paul Rusesabagina, yatangaje ko batemera uyu munyamategeko kuko atazwi ndetse atifuzwa n’umuryango wa Rusesabagina, umushinja kuba “abogamiye ku ruhande rwa leta y’u Rwanda”.

BBC yatangaje ko Kurth yayimenyesheje amazina y’abanyamategeko barindwi batoranyije nk’itsinda ry’abagomba kunganira Rusesabagina. Muri bo harimo umunyarwanda umwe ariwe Me Gatera Gashabana wunganiye abarimo Ingabire Victoire mu gihe abandi barimo batatu bo muri Leta Zunze Ubumwe za Amerika, umwe wo muri Canada, uwo mu Bubiligi, n’undi wo muri Australie.

Me Rugaza David yabwiye IGIHE dukesha iyi nkuru ko nta muntu n’umwe wo mu muryango wa Rusesabagina yigeze avugana nawe, nibura ngo amugaragarize impungenge runaka, ari naho ahera avuga ko atumva icyo uyu muryango ushingiraho uvuga ko abogamiye ku ruhande rwa leta.

Ati “Biranatangaje kumva bavuga ibyo, ntawigeze ampamagara, babibonye he ko ndi mu kwaha kwa leta? Ikindi uregwa niwe uhitamo uwo ashaka, ntabwo uwo ashaka atoranywa n’umuryango. Mu gihe we agishaka njye, nzakomeza mwunganire, keretse avuze ati ntunyunganira.”

“Ikindi cyongeweho, ntabwo nigeze ntangwa na leta. Niwe wampisemo, yampisemo muri lisiti y’abavoka yahawe. Ni abavoka kandi ndi mu bafite ubunararibonye, yanampisemo kubera ubunararibonye yambonyeho.”

Me Rugaza asanzwe aburana ibyaha by’inshinjabyaha mu Rukiko rw’Ikirenga n’Urukiko Rukuru ndetse ni n’Umuyobozi ushinzwe abavoka baburanira abatishoboye ku buntu. Ni umwarimu muri Kaminuza, kandi yabaye Umuyobozi wungirije wa Kaminuza ayobora ishami rya Kaminuza ya Kigali ry’i Musanze.

Ati “Ibyo byose nibyo Rusesabagina yashingiyeho kugira ngo avuge ngo mwunganire. Kugira ngo ahitemo njye, ntiyanahisemo CV [umwirondoro ugaragaza ibyo umuntu yakoze] gusa, yahamagaye abavoka bose, yari afitiye lisiti, arabareba umwe ku wundi, akanamukoresha ibazwa kugira ngo ahitemo uwo yumva azamwunganira.”

Akomeza avuga ko atumva uko byaba ikibazo mu gihe umufungwa ashaka umwunganizi we, ashimangira ko we amwunganira biturutse ku kuba ariwe wamuhisemo.

Ati “Nishimiye kumwunganira kandi nzakomeza kubikora ndengera inyungu ze nk’uko amategeko abiteganya. Kandi n’ubundi ndabikora, nubwo ntamena ibanga ry’akazi ariko narabikoze. N’abo babivuga ntibarambaza ngo bumve ngo hakozwe iki […] yampisemo amaze no kumbona yewe ntari no mu gapfukamunwa.”

Me Rugaza David ni umuyobozi w’Ikigo gitanga ubwunganizi mu mategeko cyitwa Rugaza Law Firm.

Me Gatera Gashabana uri ku rutonde rw’abanyamategeko barindwi bivugwa ko uyu muryango wifuza ko aribo bakunganira Rusesabagina, yabwiye IGIHEdukesha iyi nkuru ko ntacyo yatangaza kuri ibi bivugwa.

Abajijwe niba yakwemeza niba koko ari mu bagiye kunganira Rusesabagina yagize ati “mu mahame yanjye, umbabarire uko ibintu bimeze ubu ntabwo nagira icyo mvuga mu binyamakuru”.

Umusesenguzi akaba n’Umunyamategeko, Gatete T. Ruhumiriza, yabwiye IGIHE ko abo bavuga ko ari abo mu muryango wa Rusesabagina bafite uburenganzira bwo kumushakira abandi bunganizi ariko ko ariwe ufite ijambo rya nyuma.

Ati “Aho bafite uburenganzira bashobora kuvuga bati twebwe umwavoka bahaye mwene wacu si we, bamushyizeho agahato, twe tumutoranyirije abavoka icumi, ni uburenganzira bwabo. Ariko Rusesabagina ni we wa mbere ugomba guhitamo umwavoka yifuza, ntacyo bitwaye.”

Yakomeje avuga ko impamvu ikibazo cya Rusesabagina cyavugishije benshi, ari uko hari abamufata kwinshi, cyane nka Rusesabagina wo muri filimi, wahawe imidali ku bwo gukiza abantu, ariko “uwo ntabaho”, hakaba na Rusesabagina w’umugizi wa nabi. Ati “Uwo wa kabiri niwe uri mu Rwanda, bo bari kuvugira uwa mbere utabaho”.

Barashaka kurega u Rwanda

Uyu muryango wa Rusesabagina ku munsi w’ejo wari watangaje ko ugiye gutanga ikirego muri Loni ukarega u Rwanda, urushinja kurenga ku mategeko mu itabwa muri yombi rye.

Ni mu gihe Urwego rw’Igihugu rw’Ubugenzacyaha, RIB, rwatangaje ko nta tegeko na rimwe ryigeze ryirengagizwa mu ifatwa ry’uyu mugabo, kuko yafatiwe i Kigali ku bushake bwe.

Gatete asobanura ko kuvuga ko bagiye kurega u Rwanda muri Loni bisa no kwikirigita ugaseka kuko usanga uwo urega ariwe uregera.

Ati “Icya mbere Loni bararegera nde? Loni ntabwo ari urukiko. Kuregera Loni uba uregeye u Rwanda, loni ni umuryango uhuje ibihugu byo ku Isi. Ibihugu byo ku Isi byibumbiye hamwe.”

Umwe mu nzobere usobanukiwe imikorere ya Loni yabwiye IGIHE ko atumva neza aho umuryango wa Rusesabagina ushaka kurega u Rwanda, gusa ngo n’iyo wakwandikira Umunyamabanga Mukuru wa Loni, ntacyo byatanga.

Ati “Niba ari urukiko rwa loni baregera ntabwo mbizi neza, abantu bose bashobora kwandikira Umunyamababnga Mukuru wa Loni ariko ntacyo bitanga. Ntabwo mpamya ko umuntu ku giti cye ashobora kurega gutyo akarega igihugu kandi nta n’impamvu afite zigaragara.”

“Nta hantu mbona bashobora kuregera, nta rukiko mpuzamahanga bashobora kuregera, kuba bakwandikira Umunyamabanga Mukuru wa Loni cyangwa Perezida wa Komisiyo ya Loni ishinzwe uburengranzira bwa muntu ibyo ni ibintu bisanzwe bikorwa n’abantu ariko bitajya bigira icyo bitanga.”

Rusesabagina akekwaho kurema no kuyobora umutwe n’ihuriro ry’imitwe y’iterabwoba yitwara gisirikare igizwe n’abahezanguni, irimo MRCD na PDR-Ihumure, ikorera mu bice bitandukanye mu karere no mu mahanga.

Harimo kandi ibyaha by’iterabwoba, gutwika, ubushimusi n’ubwicanyi byakorewe abaturage b’inzirakarengane, b’Abanyarwanda. Byakorewe mu duce turimo Nyabimata mu Karere ka Nyaruguru ahabaye ibitero muri Kamena 2018 no muri Nyungwe mu Karere ka Nyamagabe mu Ukuboza 2018.


SANGIZA ABANDI IYI NKURU

LEAVE A REPLY

Please enter your comment!
Please enter your name here