Umutoza wa Kiyovu sport Karekezi Olivier yageze i Kigali

0
183
SANGIZA ABANDI IYI NKURU

Umutoza mushya wa Kiyovu Sports, Karekezi Olivier, yageze i Kigali ku gicamunsi cyo kuri iki Cyumweru, aho aje gutoza iyi kipe bumvikanye mu mezi abiri ashize.

Karekezi Olivier wahagurutse muri Suède ku wa Gatanu, yari yitezwe mu Rwanda ku wa Gatandatu.

Nyuma yo kugera mu Bubiligi, Karekezi yagize ikibazo cy’icyangombwa yipimishirijeho icyorezo zya Coronavirus, cyataye agaciro mbere y’uko ava muri icyo gihugu biba ngombwa ko yongera kwipimisha, akanahinduza itike.

Ku gicamunsi cyo kuri iki Cyumweru nibwo Karekezi Olivier yageze i Kigali, aho agomba kujya mu kato muri The Mirror Hotel, hakarebwa niba nta cyorezo cya Coronavirus arwaye.

Byitezwe ko azava mu kato ku wa Kabiri nyuma yo kumara amasaha 72 yatangiye kubarwa kuva ahawe icyemezo gishya yafatiye mu Bubiligi ku wa Gatandatu.

Karekezi agiye gutoza Kiyovu Sports mu gihe yaherukaga mu Rwanda muri Gashyantare 2018, ubwo yatozaga mukeba wayo w’ibihe byose, Rayon Sports.

Mu mezi atanu yatojemo Rayon Sports hagati ya Nyakanga 2017 na Gashyantare 2018, yayihesheje igikombe cy’irushanwa ryateguwe na Agaciro Development Fund, akurikizaho icya Super Cup yatsindiyeho APR FC ibitego 2-0, mbere yo kwegukana Igikombe cy’Intwari cya 2018.

Aje muri Kiyovu Sports yiyubatse, aho yaguze abakinnyi barimo umunyezamu Kimenyi Yves wavuye muri Rayon Sports, Babuwa Samson wavuye muri Sunrise FC, Irambona Eric wavuye muri Rayon Sports na Ngendahimana Eric wavuye muri Police FC.

Hari kandi Bigirimana Abed wavuye mu Burundi ndetse na Ngandu Omar wakiniye APR FC na AS Kigali.


SANGIZA ABANDI IYI NKURU

LEAVE A REPLY

Please enter your comment!
Please enter your name here